Ua Fesili Mai Talavou . . .

Pe Iai se Aogā o le Faitau?

“Ou te lē lavā faitau. E sili ai le matamata i le TV.”—Makerita, 13, Rusia.

“A faapea ou te filifili i le faitau tusi po o le taalo pasiketipolo, e sili iā te aʻu le taalo.”—Oscar, 19, Iunaite Setete.

AFAI o lea ua oo mai i ī lau faitau, atonu o lenā e te iloa, e ese le tāua o le faitau. Ae atonu e tutusa lava le faitau tusi iā te oe ma le inuina o se vai mai le fomaʻi: Ua e iloa e aogā, ae e te taumafai e ʻalofia.

Na faatalanoa e le Ala Mai! ni talavou mai atunuu e 11 po o ā ni o latou manatu e tusa ai o le faitau tusi. O loo taʻua i lalo a latou faamatalaga.

Aiseā ua avea ai le faitau o se mea e faigatā ona fai?

“E seāseā maua soʻu taimi e faitau ai.”—Semsihan, 19, Siamani.

“E lē faigofie le faitau. E fai si oʻu paiē.”—Esekielu, 19, Filipaina.

“Ou te lē fiafia e faamalosi mai loʻu faitau i mataupu e lē tupu ai se naunau.”—Christian, 15, Egelani.

“A manifinifi le tusi, atonu ou te faitau i ai. Ae a telē, ou te fāʻatu e faitau.”—Eriko, 18, Iapani.

“E vave lava ona alu loʻu mafaufau i isi mea. E faigatā ona ou uaʻi e faitau.”—Francisco, 13, Aferika i Saute.

Ua faalaeiauina talavou Kerisiano e faitau le Tusi Paia. (Salamo 1:1-3) Pe faigatā lenā mea iā te oe? Aiseā ua faigatā ai?

“E ese le telē o le Tusi Paia! Ailoga a mafai ona ou faitauina uma i loʻu olaga atoa!”—Ana, 13, Rusia.

“E iai vaega o le Tusi Paia e ese le faitaugatā, ma e lē mālie i le faitau.”—Isereelu, 11, Initia.

“E faigatā ona ou faitau i le Tusi Paia i aso uma ona e lē lelei laʻu faasologa.”—Elsa, 19, Egelani.

“E faigatā ona e alu le tele o loʻu taimi i feʻau ma meaaʻoga.”—Zurisadai, 14, Mekisikō.

“E faigatā ona ou faitauina le Tusi Paia ona e lē mafai ona aveesea mai le taimi lea e alu i mea ou te fiafia i ai.”—Sho, 14, Iapani.

Ua manino, e lē faigofie le faitau. Ae e aogā. Po ua iai ni aogā ua e maua mai le faitau?

“Ua tele mea ou te iloa ai, ma ua faigofie ai ona ou talanoa i tagata.”—Monisha, 14, Initia.

“Ou te lagona le mapu pe a ou faitau, ma galo ai ma oʻu faafitauli.”—Alison, 17, Ausetalia.

“Ua ou malamalama ai i vaipanoa e lē mafai ona ou oo i ai.”—Duan, 19, Aferika i Saute.

“E aogā le faitau ou te suʻesuʻe ai i mea ia ou iloa, ae lē faalagolago i mea ua fai mai ai isi.” —Abihú, 16, Mekisikō.

O le ā se mea ua aogā ina ia e fiafia ai e faitau?

“Talu ina ou itiiti, na uunaʻi lava aʻu e oʻu mātua e toʻaga e faitau leotele.”—Tania, 18, Initia.

“Na faalaeiau aʻu e oʻu mātua e taumafai ia mafaufau i mea o loo ou faitauina.”—Tanielu, 18, Egelani.

“Na fai mai loʻu tamā ou te amata faitau i tusi o le Tusi Paia e sili ona ou fiafia i ai, e iai le Salamo ma le Faataoto. O lea la, ua ou fiafia lava e faitau le Tusi Paia.”—Charene, 16, Aferika i Saute.

“E oo ane i le fā o oʻu tausaga, ua aumai e oʻu mātua saʻu laulau ma se fatatusi ua iai uma tusi na la faaputu mo aʻu talu ona ou fanau mai.”—Airi, 14, Iapani.

O le ā sou manatu, aiseā e tāua ai le faitauina o le Tusi Paia?

“Ua tele mea ua talitonu i ai tagata ae e lē tusa ma le Tusi Paia. E aogā lou faitau i ai ona e iloa ai lea pe moni.” (Galuega 17:11)—Mataio, 15, Iunaite Setete.

“E manaʻomia le manatunatu i le Tusi Paia. Ae ua avea loʻu faitau i ai ma mea e mafai ona ou tautala mautinoa atu ai ma le manino i isi e tusa o oʻu talitonuga.” (1 Timoteo 4:13) —Sieni, 19, Egelani.

“A ou faitau i le Tusi Paia, e pei o loo talanoa mai Ieova iā te aʻu. O nisi taimi, e pāʻia ai oʻu faalogona.” (Eperu 4:12)—Opetaia, 15, Initia.

“O loo oʻu faamasani ia fiafia i le faitauina o le Tusi Paia, auā o loo taʻu mai ai le manatu o Ieova e uiga iā te aʻu ma ou maua ai fautuaga lelei.” (Isaia 48:17, 18)—Vitoria, 14, Rusia.

O le ā le taimi ua e faaavanoa e faitau ai le Tusi Paia ma lomiga faale-Tusi Paia?

“E fai laʻu faasologa. E tasi le mataupu o le Tusi Paia ou te faitauina pe a ou alafaʻi mai i taeao uma.”—Lais, 17, Pasili.

“Ou te faitau le Tusi Paia ma lomiga faale-Tusi Paia a o oʻu malaga atu i le aʻoga. Ua fā nei tausaga talu ona ou faia faapea.”—Taichi, 19, Iapani.

“Ou te faitau i le Tusi Paia i pō uma ae ou te leʻi moe.”—Maria, 15, Rusia.

“E fā itulau o le ‘Olomatamata’ po o le ‘Ala Mai!’ ou te faitauina i aso taʻitasi. E uma ona ou faitau se mekasini a o leʻi oo mai le mekasini fou.”—Eriko, 18, Iapani.

“Ou te faitauina le Tusi Paia i taeao uma ae ou te leʻi alu i le aʻoga.”—Simi, 17, Egelani.

 E pei ona taʻua i luga, a e toʻaga e faitau, o le a e lagonaina le fiafia ma tele ai lou iloa. O lou faitau o le Tusi Paia ma lomiga e faavae i le Tusi Paia e pei o le mekasini lenei, o le a e ‘faalatalata atu ai i le Atua.’ (Iakopo 4:8) O lea, a faigatā iā te oe ona faitau, aua le vave ona fiu!

MEA E MAFAUFAU I AI

▪ Aiseā e tāua ai lou faitau o le Afioga a le Atua?

▪ E faapefea ona e “faaaogā,” pe sema se taimi e faitau ai le Tusi Paia ma lomiga faale-Tusi Paia?—Efeso 5:15, 16.

 [Pusa i le itulau 24]

IA FAATUSATUSA

Ia faatusatusa mea o loo e faitauina ma mea ua e iloa e tusa iā te oe ma lou siʻomaga. Fesili ifo e tusa o fesili ia:

▪ Mataupu Eseese Pe e tutusa mataupu po o faafitauli ia, ma mataupu ua ou faitau ai i isi tusi, mekasini, po o tala? Pe e tutusa uiga o tagata o loo taʻua ai, ma isi tagata ua ou faitau i ai?

▪ Mataupu iā te Oe Lava O le ā se sootaga o ia mea ma loʻu tulaga, laʻu aganuu, ma oʻu faafitauli? Pe e mafai ona ou faaaogā e feagai ai ma faafitauli, pe ina ia faaleleia atili ai loʻu olaga?

▪ Mataupu i Lou Siʻomaga O le ā se mea ua ou aʻoaʻoina ai e tusa o manu ma laau, le siʻomaga, o aganuu, ma faafitauli o tagata? O le ā ua ou iloaina ai e tusa o Lē na foafoaina mea?