Suia le Loto Vaivai i le Loto Fiafia

FAAMATALAINA E VICENTE GONZÁLEZ

Ina ua logotala oʻu tuaoi e faafā ona ou fanaina aʻu ae ou te lē oti, na latou taʻua aʻu o le Supameni. Ae e lē o aʻu o se supameni. O lea, seʻi oʻu faamatala le māfuaaga na ou nofo ai ma fana aʻu.

NA OU fanau i Guayaquil, i Ekutoa, i le 1951. O oʻu mātua, faapea ma i matou le fanau e toʻaiva, sa nonofo i se vaipanoa e taʻu o le Invasions, e lata i le sami. O le ogāeleele lea, e ui e leʻi faatagaina mai e le malo, ae ua faamautū ai tagata matitiva, ma fau ai o latou fale e puipui i ofe, ae ato i ʻapa. O ia ogāeleele o togātogo ma le pala, o lea na fauina ai fale i luga o pou laau uumi. E leʻi iai se eletise, o lea, na faaaogā ogaumu malala e kuka ai meaʻai, ma e ʻafa maila le mamao o le mea e laʻu mai ai le matou vaiinu.

Na amata ona faigaluega oʻu uso ma tuafāfine a o laiti, e fesoasoani ai i lo matou aiga. Ina ua 16 oʻu tausaga, na tiaʻi laʻu aʻoga, ae na maua laʻu galuega o se avefeʻau i se fale gaosimea. O le taimi lea na amata ai ona matou inu ma aʻu uō ma faia ni amioga e lē tusa ai. A oo ina ou lagona ua tele loʻu leaga, ona ou alu lea e fai laʻu kofesio. E leʻi aumaia e le patele se fesoasoani faaleagaga, ae na ona fai mai, “Loʻu atalii e, faamālō lava kofesio.” Ona ou fai ai lava lea faapena. Na oo ifo le lagona iā te aʻu, e leai se uiga o lea faiga, ma na ou lē toe alu ai loa i le lotu. O le taimi lava foʻi lea na ou mātauina ai le pagatia o olaga o le tele o tagata. Ua faigatā i le toʻatele o tagata matitiva ona maua se mea e ola ai, ae o le toʻaitiiti o ē mauʻoa, ua ova mea ua latou maua. E foliga mai e leai se uiga o le olaga. Na ou manatu ifo, e leai soʻu lumanaʻi po o se uiga o loʻu olaga.

I se tasi aso na ou iloaina ai, e toʻafā oʻu tuafāfine o loo faitau i lomiga a Molimau a Ieova, ona ou faitau foʻi lea i ai. O se tusi na sili ona ou fiafia i ai, O le Upu Moni E Taʻitaʻi Ai I Le Ola Faavavau. Na faigofie ona ou malamalama ai i le tele o mataupu o le Tusi Paia. Ou te manatua pea le manatu na oo iā te aʻu, ‘Ua ou maua le upu moni!’ Ae i le 15 tausaga lea na sosoo ai, na ou iloaina ai, e lē faigofie le ola e tusa ai o le upu moni.

I le 22 o oʻu tausaga, na amata ai ona ou faigaluega i se faletupe. I se tasi aso, na faasino mai ai e se tagata e ma te faigaluega lona “nonō” faalilolilo o tupe a le faletupe, ma toe totogi i se taimi mulimuli ane. Ona ou nofo foʻi lea ma “nonō” ni tupe, ae ina ua ova aʻu faiga, na lē mafai ona toe nanāina. Na tumu aʻu i le atuatuvale, auā e lē taitai mafai ona ou totogia. O lea, sa ou faapea ai e sili pe a taʻu laʻu agasala, ma pule i loʻu ola e taʻu atu ai ua ou matuā salamō.

Ina ua uma ona fai saʻu tusi i le faletupe, sa ou faatauina loa se tamaʻi fana, ma ou alu loa i se nofoaga tuufua i le  matafaga. E lua pulufana na fana ai loʻu ulu, lua foʻi i loʻu fatafata. E ui i loʻu tigāina, ae ou te leʻi oti. Na tau atu se tagata o tiʻetiʻe atu i lana uila iā te aʻu, ma faatopetope ai loa le aveina o aʻu i le falemaʻi. Ina ua ou malosi, na fai loʻu faamasinoga ma loka ai loa aʻu i le falepuipui ona o loʻu gaoi. Ina ua ou magalo, na ou lagona le māsiasi ona ua iloa uma o aʻu sa pagota. Na taʻu aʻu e tuaoi o Supameni (superman), ona ou te leʻi oti i pulufana e fā ia na ou lavea ai.

Se Avanoa e Sui Ai

E tusa o le taimi lea na asia ai aʻu e Paul Sánchez, o se misionare Molimau a Ieova. E ese le manaia o lana ataata. O Paul, o se tagata e fiafia ma faalaeiau mai, ma na ou talia lona fai mai e fai saʻu suʻesuʻega o le Tusi Paia. Na ou faapea ifo, ‘Atonu e mafai ona ia fesoasoani mai ia ou maua le fiafia ma le uiga o le olaga.’

O le fesoasoani a Paul na ou iloa ai, e iai le fuafuaga a le Atua mo tagata, ma o ē alolofa ma usiusitai iā te Ia, o le a ola i le parataiso i le lalolagi. (Salamo 37:29) Na ou iloa ai foʻi, e lē tuuaʻia le Atua ona o le lē faamasinotonu ma le mativa o loo iai, ae ona o le fouvale o le tagata i le Atua. (Teuteronome 32:4, 5) Na avea ia upu moni o se malamalama i loʻu olaga. E faigofie le suʻesuʻega, ae e leʻi faigofie le suia o oʻu uiga.

Na toe maua saʻu galuega i se kamupani, ou te taulimaina ai mea tautupe. Na lē mafai ona ou teena le tofotofoina ai, ma na iʻu ai foʻi ina ou toe gaoi. Na lē mafai ona nanā laʻu gaoi, o lea na ou sola ai i se isi aai i Ekutoa, mo se tausaga. Sa ou taumafai e tuua le atunuu, ae na lē mafai, o lea na ou toe foʻi ai i loʻu aiga.

Na ma toe feiloaʻi ma Paul, ma toe fai laʻu suʻesuʻega. Ae o le taimi lea, na ou filifili e faaaogā taʻiala o le Tusi Paia i loʻu olaga, ma auauna iā Ieova. Na ou faamatala iā Paul laʻu gaoi, ma na tuusaʻo mai lana aʻoaʻiga. Na ia aumai mau e iai le Efeso 4:28, e faapea: “O lē gaoi aua neʻi toe gaoi, a e lelei ina faamalosi o ia i galuega.” Na ou iloa, e tatau ona taʻu laʻu gaoi ma talia le faasalaga e oo mai.

Na amata ona ou galue o se tusiata, a o oʻu mafaufau i lea tulaga. I se tasi aso, na sau se tamāloa i laʻu galuega ma faaalia lona fiafia i saʻu ata na iai. Ae o le mea moni, o ia o se leoleo na sau ma loʻu tusi samania. O lea, na toe fai se isi oʻu faamasinoga, ma toe faafalepuipui foʻi. Na asia aʻu e Paul, ma na ou folafola iā te ia, “O le a lē iʻuvale au taumafaiga ia ou malamalama i le Tusi Paia.” Na faaauau la ma suʻesuʻega i le falepuipui.

Faamaonia Loʻu Faamaoni

Ina ua ou magalo, na ou filifili e auauna iā Ieova ma loʻu loto atoa, ma i le lua tausaga na sosoo ai, na faamaonia ai loʻu faamaoni i laʻu filifiliga ua fai. I le 1988, na ou papatiso ai o se Molimau a Ieova. Sa ou naunau e faaaogā le taimi lea na ou faamaumau, ma amata loa laʻu faiva faataimi atoa o se paeonia. Na faapitoa laʻu talaʻiga i talavou o loo auai i kegi.

Na iai se kegi na masani ona tusitusi ma faaleagaina la matou Maota e fai ai sauniga. Ou te iloa tama o le kegi lea ma le mea e nonofo ai, o lea na ou oo i ai e faamatala i ai le aogā o le Maota, ma talosaga ia soia le lē migao. Na gata ai i inā lo latou faaleagaina o lo matou Maota.

I se taimi mulimuli ane, ina ua toe faaleleia la matou Maota ma aveese le vali tuai, na tau Fernando, o se Molimau talavou i se faaupuga, “Le Rane” ae o le “La Rana” (i le gagana Sipaniolo). Na teʻi o ia ma fai mai: “Oi, o aʻu na tusia!” A o avea Fernando ma vaega o se kegi, na ia tusia lona igoa i le puipui, ae o lea ua ia toe fufulueseina!

 O le taimi muamua lava na ou vaai ai iā Fernando, o loo aafia lava i fualaau faasāina. E lua ni nofoaga na ave i ai e lona tinā ina ia tuu lana amio, ae e leʻi aogā. Na fiu o ia, ma alu ese ai ae tuu na o Fernando i le fale. Na faatau atu e Fernando faitotoʻa, faamalama, ma le taualuga o le latou fale, auā se tupe o ana fualaau faasāina. Na ou faafeiloaʻi iā te ia i le auala ma ave i ai sana faguinu, ma fai i ai e ma te suʻesuʻe i le Tusi Paia. Na ia talia, ma na ou fiafia lava ona o lona naunau i le upu moni. Na ia lē toe auai i le kegi, lē toe faaaogā ni fualaau faasāina, auai i sauniga, ma e leʻi umi ae papatisoina loa.

Pe a ma ō la ma Fernando i le talaʻiga, e tele tagata e iloa i maʻua ma valaau mai e faapea, “Le Rane!” po o le “Supameni!” ma fesili mai e tusa o la ma galuega. E matuā teteʻi lava ona o i maʻua na avea muamua o se tama o le kegi, ma gaoi, a o lea ua ō atu ma Tusi Paia.

I se tasi aso, na ou talaʻi ai i se tamāloa, ae talanoa Fernando i lona tuaoi. Na tusi le tamāloa iā Fernando ma fai mai: “O e iloa atu le alii lale? Na ia faalālā se fana i loʻu ulu.” Na ou fai i ai ua lē toe faapena Fernando, ona ua ola o ia e tusa o le Tusi Paia. Ina ua uma le talanoaga a Fernando, na ou valaau i ai e sau e feiloaʻi ma le tamāloa. Na fai le tamāloa iā Fernando: “Alii, ou te faamālō atu ona o suiga ua e faia i lou olaga.”

Ou te lē mātaua le tele o taimi ua fai mai ai e tagata na tala iā i maʻua ma Fernando. O lenā tulaga, ua mafai ai ona avatu se molimau lelei, ma maua ai ni suʻesuʻega faale-Tusi Paia. Ioe, o se faaeaga iā i maʻua le taʻua o ni Molimau a Ieova.

Se Laasaga Tāua i Loʻu Olaga

I le 2001, i le 50 o oʻu tausaga, na faateʻia aʻu ma na ou fiafia lava ina ua ou iloa, o le a ou auai i le Aʻoga mo Toleniga i le Faiva, i Peru. O lea aʻoga e valu vaiaso, e matuā aʻoaʻo ai lava Molimau ua agavaa e tusa o le faatinoina o la latou faiva.

E ese loʻu fiafia ona e manaia vala uma o le aʻoga, seʻi vaganā ai le lauga atu i luma o tagata. O le tele o uso talavou, e ese le mananaia o a latou lauga, ma e toʻa foʻi. Ae ina ua fai laʻu lauga muamua, o oʻu lagona lē aogā lea na iai a o oʻu laʻitiiti, na ou toe lagonaina i lea taimi. Na tetete oʻu tuli faapea ma oʻu lima na afu, ma tete ma loʻu leo. Ae na lagolago mai Ieova e ala i lona agaga ma le ʻauuso alolofa. Na faapitoa le fesoasoani mai o se tasi faiaʻoga, auā a māeʻa le vasega, ona fesoasoani lea i le faia o aʻu lauga. Ae na sili ona tāua lana fesoasoani mai ina ia ou faalagolago iā Ieova. E oo ane i le faaiʻuga o le aʻoga, o le taimi muamua lea na ou lagonaina ai le fiafia e lauga atu i luma o tagata.

Na matuā luʻia lea lagona ina ua fai le tauaofiaga a Molimau a Ieova i Guayaquil. Na ou tū ai i luma o tagata e 25,000, ma faamatala le avea o aʻu ma Molimau. A o ou tautala, na ou lagona le ootia ona o le faaeaga e faalaeiau atu ai i lenei aofia e toʻatele, ma na tete loʻu leo. Ae na fai mai mulimuli se tasi na auai i le fono, “Uso González, a o faamatala lou olaga, e leai se isi e leʻi maligi ona loimata.” O le mea sili, talosia na aogā laʻu tala i nisi o loo matuā tauivi ia tuu o latou uiga tuai.

O loo avea nei aʻu o se toeaina ma paeonia sauatoa, ma e 16 tagata ua mafai ona ou fesoasoani i ai ia iloa le poto saʻo mai le Tusi Paia. Ua tumu aʻu i le fiafia ona ua uma foʻi ona tuuina atu iā Ieova oʻu mātua ma isi oʻu tuafāfine e toʻafā. Na maliu loʻu tinā i le 2001 a o auauna pea i le Atua. Ou te matuā faafetai iā Ieova ona ua mafai ona ou iloa o ia, ma e leai se isi auala sili e faaalia ai loʻu talisapaia na i lo le valaaulia o isi e faalatalata iā te ia.—Iakopo 4:8.

[Ata i le itulau 13]

O Fernando, (Le Rane), na ou fesoasoani i ai, sa auai muamua i se kegi

[Ata i le itulau 13]

O Paul Sánchez, o le misionare na ma suʻesuʻe i le Tusi Paia

[Ata i le itulau 14]

O Vincente González i aso nei