E Mataʻina Fua o Laau

O E MĀTAUINA le auala e tutupu aʻe ai le tele o laau, e pei a lapotopoto ma taviʻo? O se faataʻitaʻiga, o le fala ʻai, e tusa e 8 vaega o le paʻu e taamilo i le tasi itu ae 5 pe 13 e taamilo i le isi itu. (Ata 1.) A e tilotilo i fatu o le laau o le mata o le lā, e te vaai ai i liʻo e 55, pe 89, pe sili atu, o loo felavasaʻi. E faapena foʻi le fualaau faisua e taʻu o le cauliflower. A e mātauina la lea tulaga i fua o laau, o le a avea lou alu e faatau fualaau ma mea e pei e fou iā te oe. O le ā le māfuaaga ua ala ai ona tutupu faapea fualaau? Pe e iai se tāua o lea tulaga?

Le Auala e Tutupu ai Laau

O le tele o laau, e amata feosofi o latou tātupu, lau, ma fugālaau, mai se vaega autū (meristem). E feosofi aʻe lau o fuga mai le ogatotonu, ae e faasasa ese mai le lau po o vaega na feosofi muamua. * (Ata 2.) O le tele lava o laau, e iai lava le va o vaega taʻitasi a o tutupu aʻe. O le ā le telē o le va lea?

Manatu mai i le mea lenei: Seʻi faapea la o lea o le a taumafai e fai se laau, ia feosofi mai tātupu fou ma fua i le ogatotonu, ma ia aogā uma avanoa. Faapea la o lea ua fua ia tusa o le lua vae lima le va o le lau e oso aʻe, ma le lau lea na oso muamua. O le faafitauli e oo i ai, o le a oo ina laina tutusa uma lau, ae telē le avanoa e lē aogā. (Ata 3.) Po o le ā lava le laʻitiiti po o le telē o le va e feliuaʻi ai le lau, o le tulaga lava lenā e iai. Ae a fai e 137.5 tikeri le va o le lau muamua ma le lau e sosoo ai, e matagofie lava le lapotopoto lelei o liʻo o fugālaau. (Ata 5.) Aiseā ua tāua tele ai le va lenei?

O le va lea o le 137.5 tikeri, e lē faigofie ona faaliliuina ia avea o se vaega o se mea atoa. O se faataʻitaʻiga, e lata le  5/8 i le 137.5 tikeri, ae e sili atu ona lata i ai le 8/13, ma e silisili atu ona lata i ai le 13/21, ae e lē tutusa ia numera ma le 137.5 tikeri. O lea, o lau fou uma o se fugālaau e tutupu mai i le 137.5 tikeri le lautele o le va, e fetaui lelei ma le va o le lau na tupu muamua, ma e lē mafai ona faalua ona tupu mai ni lau se lua i se tulaga se tasi. (Ata 4.) O le māfuaaga lenā e pei a lapotopoto ma taviʻo ai lau o fugālaau, ae lē o ni laina sasaʻo.

O se mea e ao ona mātauina, a faataʻitaʻi ona fai e se komepiuta le oso mai o lau o fugālaau mai le ogatotonu, e fua ia 137.5 tikeri le va o lau, e manaia lava le lapotopoto pe afai e tutusa tonu le va o lau ma le lautele lea. Ae afai e fai sina salaese laʻitiiti, e lē manaia le lapotopoto o faasologa o lau.—Ata 5.

E Fia Lau o le Fugālaau?

O se mea e ofo ai, ona o le aofaʻi o liʻo o lau o se fugālaau, ua taʻu mai e se faasologa o fuainumera ua faaigoaina, o numera a Fibonacci. O Leonardo Fibonacci, o se tagata Italia e tomai i matematika i le senituri lona 13, ma na ia faamatalaina faamatematika le va o lau o fugālaau. O le numera amata o le 1, a o numera e sosoo ai o lea faasologa, e maua pe a faaopoopo numera e lua o loo muamua atu—1, 1, 2, 3, 5, 8, 13, 21, 34, 55, ma faaauau ai lava faapena.

O laau o loo vaaia ai le tutupu faataaliʻoliʻo o lau o o latou fugālaau, o loo taʻu mai i le faasologa o numera a Fibonacci le tele o ona lau. Ua mātauina e nisi tagata, o fugālaau o buttercups, e taʻi 5 lau o o latou fua, o bloodroots e taʻi 8, o fireweeds e taʻi 13, o asters e taʻi 21, o se vao e taʻu o le daisy e taʻi 34, ma le isi ituaiga daisy e taʻu o le Michaelmas, e 55 pe 89. (Ata 6.) Ae o fualaau ʻaina ma fualaau faasua, e iai foʻi vala o loo tutusa ai ma ia numera. E pei o faʻi, e taʻi lima o latou tafa.

‘Faia Mea Uma e Matagofie’

Ua loa ona iloa e tagata tusiata le manaia o ia vala. Aiseā ua ala ai ona faapea le tutupu o laau? O le manatu o le toʻatele, o se tasi lea o faataʻitaʻiga ua faaalia ai le poto o le auala ua faia ai mea uma.

Pe a manatunatu i le fausaga o mea na faia, ma le fiafia ua tatou maua ai, ua iloa ai o galuega ia a Lē na faia i tatou, ma o lona finagalo ia tatou olioli i le ola. Ua fai mai le Tusi Paia e tusa ma Lē na faia i tatou: “Ua faia e ia mea uma lava e matagofie i o latou lava tausaga.”—Failauga 3:11.

[Faaopoopoga i lalo]

[Siata i le itulau 24, 25]

Ata 1

(Tagaʻi i le lomiga)

Ata 2

(Tagaʻi i le lomiga)

Ata 3

(Tagaʻi i le lomiga)

Ata 4

(Tagaʻi i le lomiga)

Ata 5

(Tagaʻi i le lomiga)

Ata 6

(Tagaʻi i le lomiga)

[Ata i le itulau 24]

Ata faatelē o le meristem

[Ē Ana le Ata]

R. Rutishauser, Iunivesitē o Zurich, Suisilani

[Ē Ana le Ata i le itulau 25]

Fugālaau paʻepaʻe: Thomas G. Barnes @ USDA-NRCS PLANTS Database