Le Auala e Pulea ai le Matamata TV

UA FAI mai Claudine, “E ki loa le TV, ona soloatoa ai lava lea o le matamata. Faatoʻā tapē lava pe a momoe.” Ae o nisi ua fai mai: “E matuā lē mafai lava ona aveese ou mata mai le TV,” ae fai mai isi, “Ou te lē fia matamata tele i le TV, ae e leai se mea e mafai i ai.” Po o ova lau matamata TV? O e popole i aafiaga o le TV i lou aiga? O ni fautuaga nei e aogā auā le puleaina o lau matamata TV.

1. IA ILOA LE TELE O LE TAIMI O ALU AI. Ua fai mai le Faataoto 14:15: “O lē ua mafaufau, ua faautauta o ia i lona ala.” E lelei le vaai po o ā taimi o loo e matamata ai ina ia fai ni suiga. Faamaumau po o le ā le tele o le taimi o loo alu i le TV mo se vaiaso, pe ā. Ia fai se lisi o polokalame o loo e matamata ai, o mea aogā na maua ai, ma lou fiafia i ai. O le mea tāua, ia vaai po o le ā le tele o le taimi o alu e matamata ai i le TV. Atonu e faateʻia oe i le iloaina o le tele o le taimi o loo maumau i le TV. O le iloaina o lea tulaga e ono uunaʻia ai oe e fai ni suiga.

2. FAAITIITI LE TAIMI E MATAMATA AI. Faataʻitaʻi ona lē matamata i se TV i se aso se tasi, se vaiaso atoa, po o se masina foʻi. Pe taumafai ia faaitiitia le taimi e matamata ai i aso taʻitasi. Pe afai e ʻafa itula e te matamata ai i aso taʻitasi, o le a maua la itula faaopoopo e 15 o le masina. Faaaogā lenā taimi i mea aogā, e pei o mea faaleagaga, faitau se tusi lelei, pe talanoa ma aiga ma uō. Ua iloa mai suʻesuʻega, e sili atu ona fiafia le tagata matamata e itiiti le taimi e matamata ai i le TV, na i lo i latou e ova le matamata. O se tasi auala e faaitiitia ai le matamata i le TV, o le aua le tuuina i le potumoe. E toeitiiti atoa le itula ma le ʻafa e ova ai le matamata a tamaiti e iai TV i o latou potu, i lo tamaiti e leai ni TV i potu. E lē gata i lea, e lē o iloa atu e mātua mea o loo matamata ai tamaiti. A aveese le TV mai le potumoe, o le a iloa ai e mātua ma ulugalii, o le a maua le taimi e talatalanoa ai. O nisi ua filifili ia leai se TV i totonu o latou fale.

 3. FUAFUA ATA E TE MATAMATA AI. E tele le mau polokalame lelei e mafai ona matamata ai. Ia muaʻi siaki le polokalame po o ā ata e faaali, na i lo le suisui solo o ala TV po o ā polokalame o loo sau ai, pe matamata foʻi i so o se ata o sau. Ki le TV i le taimi e sau ai le polokalame e te manaʻo ai, ma tapē pe a uma. A lē o lenā, puʻe lau polokalame, e matamata ai i se isi taimi. O le a mafai ona e matamata i le taimi e fetaui ma oe, ma aveese ai ma faasalalauga o loo iai.

4. IA FILIFILI LELEI. Na valoia e le Tusi Paia e faapea, i o tatou taimi, o le a avea “tagata ma ē alolofa i latou iā i latou, o ē mananaʻo i tupe, o ē loto vii, o ē faamaualuga, o ē upu leaga, o ē lē faalogo i mātua, o ē lē faafetai, o ē amio leaga, o ē lē lotoaiga, o ē lē ma faaleleia, o ē faatuaupua, o ē lē taofi manaʻo o le tino, o ē faasauā, o ē ʻinoʻino i le amio lelei, o ē faalata, o ē soona fai, o ē ua faafefeteina, [ma] ē ua tele le manaʻo i mea faafiafia a e leai se manaʻo i le Atua.” Atonu e te ioe, e faapena le tele o tagata i ata TV. Ua fautua mai le Tusi Paia, ia “alo ese lava i tagata faapena.” (2 Timoteo 3:1-5) Ua lapataʻia i tatou, “Aua neʻi faasesēina outou, O le feoaʻi ma ē amio leaga e leaga ai amio lelei.”​—1 Korinito 15:33.

O le filifili lelei e manaʻomia ai le pulea. Po ua e matamata i le amataga o se ata ma e iloa ai e lē lelei, ae na uma lava le ata o e matamata ona o lou fia iloa o le mea e tupu? Ua tupu lenā mea i le toʻatele. Ae peitaʻi, pe a e faamalosi e tapē le TV ae fai se isi mea aogā, o le a e iloaina ai, e te lē o popole po o le ā tonu na tupu.

A o leʻi taitai ona iai ni TV, na tusi le faisalamo, “Ou te lē tuu i oʻu luma se mea leaga.” (Salamo 101:3) O se sini lelei tele mo i tatou le manatua e filifili polokalame e matamata ai! O nisi ua pei o Claudine, ua lē toe iai se TV. Ua fai mai o ia, “Ou te leʻi iloaina loʻu aafia tele i le TV. A ou toe matamata i le taimi nei, ou te matuā teʻi i mea ia sa lē afāina muamua iā te aʻu. Sa ou faapea o lea ou te filifili lelei, ae ua ou iloa nei, e leai. A ou matamata la i polokalame lelei, ua sili ona manaia laʻu matamataga.”

[Ata i le itulau 8]

Faamaumau le tele o le taimi o loo alu i le TV

[Ata i le itulau 8]

Faaaogā le taimi sa alu i le TV i mea aogā

[Ata i le itulau 9]

Aua e te faalotolotolua e tapē le TV!