Le Tāua Moni o le Toto
Le Tāua Moni o le Toto
“O le mea ua tutusa ai tagata uma e tusa ai o le ola: o le toto. O le malosi lea o le ola o loo i tagata uma, e ui ina eseese lanu, ituaiga, ma lotu.” —Peresitene o le Fono Sili o Malo Aufaatasi.
UA IAI se mea moni i lenā faamatalaga. E manaʻomia le toto e tagata ola uma. O se mea e tāua tele. Ae po o e mautinoa, o saogalemu, ma poto le faaaogāina e tagata o le toto mo togafitiga?
E pei ona tatou iloa, e matuā lē tutusa lava atunuu eseese o le lalolagi e tusa o le sefe o le faaaogāina o le toto, ma o loo iai toʻatugā e lē o iloa e le toʻatele. Ua eseese foʻi fomaʻi e tusa o le faaaogāina o le toto, e fua i a latou aʻoaʻoga, tomai, ma manatu. Ae ua tele fomaʻi o loo ʻalofia togafitiga e faaaogāina ai le toto. Ua faatupulaʻia foʻi le aofaʻi o fomaʻi ua sili lo latou mananaʻo i togafitiga e lē faaaogā ai le toto.
O lea la, ua tulaʻi mai ai le fesili, o le ā le māfuaaga ua ala ai ona tāua tele le toto? Afai ua lē faamoemoeina le faaaogā o le toto i togafitiga, o le ā tonu se isi aogā o le toto?
Le Silafaga a le Atua e Tusa ai o le Toto
I ona po o lo tatou augātamā o Noa, na tuu mai ai e le Atua se tulafono tāua. E ui na ia faataga tagata e ʻai le aano o manu, ae na ia faasā ona latou aai i le toto. (Kenese 9:4) Na ia faamatala mai le māfuaaga, ona o le toto, o le ola lea o le manu. Na ia faapea mai mulimuli: “Auā o i le toto le ola o le tino.” I le silafaga a Lē na faia le tagata, e paia le toto. Ua faaatagia ai le ola, le meaalofa tāua o loo iai i tagata uma. Ua tele taimi o taʻu mai pea e le Atua lea manatu autū.—Levitiko 3:17; 17:10, 11, 14; Teuteronome 12:16, 23.
E leʻi umi talu ona amata le Faa-Kerisiano i le tusa ma le 2,000 tausaga ua tuanaʻi, na faatonuina ai Kerisiano ia “faamamao . . . ma le toto.” Na ala ona fai lea faasāsāga, ona o le paia o le toto, ae lē mo le soifua mālōlōina. (Galuega 15:19, 20, 29) Ua finau mai nisi, o lea faasāsāga, ua na o le ʻaina o le toto o loo faatatau i ai, ae peitaʻi ane, o loo manino lava le uiga o le upu, ia “faamamao.” Afai e faatonuina i tatou e se fomaʻi ia faamamao ma le ʻava malosi, e mautinoa e tatou te lē mafaufau e tui atu i o tatou tino.
Ua faamatala atili e le Tusi Paia le māfuaaga ua paia tele ai le toto. Ona o le autū o le faamoemoe faa-Kerisiano, o le toto maligi o Iesu Keriso, lea na faaata ai lona ola faaletagata na foaʻiina mo tagata. Ua mafai ona magalo ai agasala, ma maua ai le faamoemoe o le ola e faavavau. Pe a taumamao le Kerisiano ma le toto, ua faaalia ai lona faatuatua, ua na o le toto maligi o Iesu Keriso e mafai ona togiolaina lona ola, ma faasaoina ai.—Efeso 1:7.
Ua lauiloa Molimau a Ieova ona o lo latou piiama i faatonuga a le Tusi Paia. Latou te teena le tuiina o le toto atoa, ma vaega autū o le toto, e iai sela mūmū, vaega faasuavaia, sela papaʻe, ma sela faatoʻa toto. Ae e lē o iai se faamatalaga a le Tusi Paia e tusa o vaega ninii o le toto, ma mea o loo fai mai ai. O lea, ua tuu atu e fai
e le Molimau lana lava filifiliga. E tusa ai ma le talitonuga o Molimau mai le Tusi Paia, po o lona uiga la, e latou te teena togafitiga, pe e lē manatu mamafa foʻi i o latou ola? E leai!—Tagaʻi i le pusa, “Le Manatu o Molimau a Ieova i le Soifua Mālōlōina.”I tausaga lata mai nei, ua toʻatele fomaʻi ua iloaina le aogā o le usitai o Molimau a Ieova i taʻiala a le Tusi Paia. O se faataʻitaʻiga, na faailoa mai e se fomaʻi tipitipi o neula le aogā o le faaaogā o isi togafiti ae aua le tuia le toto. Na fai mai o ia: “O le tulaga lea e sili ona sefe, e lē mo na o Molimau a Ieova, ae mo tagata uma.”
O filifiliga tāua e tusa o le soifua mālōlōina, e lagona ai le popole, ma e faigatā foʻi ona fai. Mātau mai upu a Dr. Dave Williams, o se fomaʻi faapitoa o māmā, ma o se faatonu, e tusa o le tuiina o le toto: “E tāua tele le amanaʻia o manaʻoga o tagata, . . . ma e ao ona tatou faaeteete i mea e tui i o tatou tino.” Ua sili le moni o na upu i nei aso.
[Pusa/Ata i le itulau 19]
O ā Nei Mea e Taʻu o Vailaau e Aveina le Okesene?
I sela mūmū taʻitasi o le toto, e pe ā ma le 300 miliona vaega ninii o le hemoglobin o loo iai. O le tasi vaetolu o le sela mūmū, e faia aʻe i hemoglobin. Ua iai i le hemoglobin se polotini e taʻu o le globin, ma le mea e maua ai le lanu e taʻu o le heme, lea e iai ma se atoma uʻamea. Pe a taunuu sela mūmū i le māmā, e sao atu le okesene i sela, ma pipii i le hemoglobin o sela. I sekone mulimuli ane, e avatu ai le okesene i le aano o le tino, ma fafagaina ai sela o le tino.
O nisi kamupani, ua latou aumai hemoglobin e ala i le vavae mai sela mūmū o toto o tagata, po o povi. E vaimamā le hemoglobin, ona sui lea i vailaau ma faamamā, toe sui i isi vailaau, ma teu auā le taimi e faaaogā ai. O le taʻu o lea vailaau o le HBOC (hemoglobin based oxygen carriers), po o vailaau e aveina le okesene, ae e lē o taga ona faaaogāina i le tele o atunuu. Talu ai o le lanu mūmū o le toto e sau mai le vaega e taʻu o le heme, ua tutusa lava le lanu o le paina HBOC, ma paina o sela mūmū o le toto, po o le vaega autū o le toto lea o loo fai mai ai.
O sela mūmū o le toto, e ao lava ona teu i le aisa, ma tiaʻi pe a mavae ni nai vaiaso ona ua lē aogā, ae o le HBOC, e lē tau teuina i se pusaʻaisa ma e lelei pea mo ni masina mulimuli ane ai. E leai foʻi ni paʻu o sela mumū o iai i le HBOC, lea e tupu ai le faalētonu i nisi, talu ai e teena e o latou tino ia toto mai isi. Ae ua tulaʻi mai ai se luʻi mo Kerisiano o loo taumafai ia usitai i le tulafono a le Atua e tusa o le toto. I le ā le itu? Auā afai o le HBOC e fai mai le toto, e lua la ni vala e ono avea ma faafitauli. Muamua, o loo faia e le HBOC le galuega autū a sela mumū o le toto. Lua, e telē se vaega o le HBOC o loo fai mai le hemoglobin. O lea, ua fesagaʻi Kerisiano ma se filifiliga tāua e tusa o ia ituaiga o vailaau. E ao ona latou tatalo ma ia manatunatu lelei e faatatau i mataupu silisili e tusa o le paia o le toto. E ao ona avea le lotofuatiaifo o le tagata ua aʻoaʻoina i le Tusi Paia ma taʻiala, i lona faanaunauga ia tumau le la faiā lelei ma Ieova.—Kalatia 6:5.
[Ata i le itulau 19]
O LE HEMOGLOBIN
[Pusa/Ata i le itulau 20]
Se Isi Auala Manaia
Ua lipotia mai e le Wall Street Journal e faapea, ua faateleina falemaʻi ua fai ai taotoga e lē faaaogāina ai le toto. Ua faamatala mai e le mekasini: “Na amata ona fai ona o Molimau a Ieova, ae ua avea ma togafitiga masani, ma o le tele o falemaʻi, ua latou faailoaina i le lautele le faia o taotoga e lē faaaogāina ai le toto.” Ua iloa e falemaʻi i le lalolagi aoao, e tele aogā mo ē mamaʻi, pe a faaaogāina togafitiga e faaitiitia ai le faaaogāina o le toto. I le taimi nei, e faitau afe fomaʻi o loo togafitia maʻi e aunoa ma le faaaogāina o le toto.
[Pusa/Ata i le itulau 20]
Le Manatu o Molimau a Ieova i le Soifua Mālōlōina
Ua iloa e le lalolagi, o Molimau a Ieova, o nisi o i latou o ni fomaʻi, e teena le tuiina o le toto, po o ona vaega autū. Pe e latou te teena le toto ona o ni mafaufauga faaletagata, po ona e latou te manatu, ua lava le faatuatua e avea ma vailaau? E leai, e lē o lenā.
Ua tāua iā i latou le ola, o se meaalofa lea mai le Atua, ma ua latou taumafai ai ia faia le mea sili ia ola e tusa ai ma le Tusi Paia, lea e latou te talitonu “e mai le Agaga o le Atua ia.” (2 Timoteo 3:16, 17; Faaaliga 4:11) O loo faalaeiauina ai i latou e tapuaʻi i le Atua, ia ʻalofia faiga ma amioga e aafia ai le soifua mālōlōina ma le ola, e iai le soona ʻai, le ulaula tapaa, le soona inu ʻava, ma le faaaogā o vailaau faasāina.—Faataoto 23:20; 2 Korinito 7:1.
E ala i le tausia ia mamā o o tatou tino ma mea e tatou te nonofo ai, ma faagaoioi o tatou tino auā le soifua mālōlōina, ua tatou faia lea e tusa ma taʻiala a le Tusi Paia. (Mataio 7:12; 1 Timoteo 4:8) Pe a mamaʻi Molimau a Ieova, latou te faaalia le magafagafa e ala i le ō atu i fomaʻi ma talia togafitiga o loo faia mo tagata. (Filipi 4:5) E moni ua latou usitai i le faatonuga mai le Tusi Paia “ia faamamao . . . ma le toto,” i lo latou tausisi lea i togafitiga e lē faaaogāina ai le toto. (Galuega 15:29) Ona o lea filifiliga, ua latou maua ai togafitiga e sili atu ona lelei.