O Fao e le TV Lou Taimi?

AFAI e ofo atu e se tasi le miliona tālā e tuu ai lau matamata TV i le olaga atoa, e te mafaia? Na fai se suʻesuʻega i nai tausaga ua tuanaʻi, ma e 1 mai le 4 tagata Amerika na fai mai e lē mafai. I se isi suʻesuʻega na fesiligia ai tamāloloa po o le ā se mea e sili ona latou fia maua, ma o le tali a le toʻatele, e latou te manaʻomia le filemu ma le fiafia. O le mea lona lua lenā i le latou lisi, ae o le mea sili i le olaga, ia maua se TV telē!

E toʻatele tagata i le lalolagi, e fiafia tele i le TV. I le 1931 ina ua faatoʻā amata ona iai televise, na faapea mai le taʻitaʻifono o le Sosaiete o Leitiō i Amerika: “E faatalitalia pe a oo ina taulau fuafuaga tau televise, o le tele o tagata matamata i TV, e tusa o le aofaʻi foʻi lea o tagata o le a iai i le lalolagi.” Atonu e leʻi manatu e taunuu ia upu, ae o le tulaga lenā ua iai nei. E tusa ma le 1.5 piliona le aofaʻi o televise o loo iai i le lalolagi, ae e sili atu le aofaʻi o tagata o loo matamata ai. O lea, pe fiafia i ai pe leai, ua telē le vaega a le televise i olaga o tagata.

E uiga ese le tele o le taimi, ua alu i le matamata TV. O se suʻesuʻega na faia i le lalolagi aoao na iloa ai, e sili teisi ma le tolu itula i aso taʻitasi o loo matamata ai tagata i le TV. E fā ma le ʻafa itula i le aso e matamata ai tagata i Amerika i Mātū, ae ua sili atu itula e matamata ai tagata Iapani, e lima itula i le aso. A tuu faatasi, ua ova lava itula ua alu i le TV. Afai e fā itula e alu i le TV i le aso, e oo ane i le 60 tausaga o le tagata, ua tusa ma le 10 tausaga ua alu i le TV. Ae ailoga e iai se isi e manaʻo e tusi i lona maa faamanatu le faamatalaga : “O la matou uō peleina lea, e tusa ma le tasi vae ono o lona olaga na alu i le matamata TV.”

Faamata ua ala ona alu lea taimi tele o tagata i le TV, ona e fiafia i ai? E leai, e lē na o le pau lenā o le māfuaaga, auā e manatu le toʻatele, ua ova le taimi ua alu i le TV, ae e lē o faaaogāina tatau. O nisi ua fai mai, e lē mafai ona tuu. Ae e iai vala e tutusa ai se tagata e lē mafai ona tuu le TV, ma se tagata e lē mafai ona tuu fualaau faasāina. O le tagata ua pulea e fualaau faasāina, e tele lona taimi e alu ai. E tusa foʻi pe manaʻo e tipi le taimi ma tuu lea amioga, ae e lē mafai. E latou te faamuamua fualaau faasāina na i lo mea tāua faaleaiga ma tagata, ma latou te lagona foʻi le maʻi pe a tuu. O lagona foʻi na e iai i le tagata e ova lana matamata TV.

 Na faapea mai le tupu poto o Solomona: “O le ʻai tele i meli, e lē lelei lea.” (Faataoto 25:27) O le mea moni foʻi lenā e tupu i le matamata TV. E ui e iai le aogā o nisi mea i le TV, ae e avea ma faalavelave i le aiga pe a ova le taimi e alu ai, ma e lē aogā i taumafaiga a tamaiti ia faitau faapea ma le aʻoga, ma e tupu ai foʻi le lapoʻa. Afai o tele sou taimi o loo alu i le TV, o se mea poto lou manatunatu po o le ā sau mea o maua mai ai. E tāua tele le taimi, aua le faamaʻimaua. O se mea poto foʻi le vaai totoʻa i mea o loo tatou matamata ai. O le a talanoaina lea tulaga i le mataupu o loo sosoo mai.