O le a Mafai Ona Ou ‘Osooso e Pei o le ʻAila’

FAAMATALAINA E FRANCESCO ABBATEMARCO

“Aiseā ua tuu mai ai e le Atua lenei mea iā te aʻu?” O le tele ia o taimi ou te manatu ai faapea! Sa ou musu i le manatu e faapea o le a ou ola ai lava i se nofoa faataavalevale, ona ua lē o toe aogā oʻu lima ma oʻu vae.

I LE 1962, i se tamaʻi taulaga i Basilicata i Italia, na toetoe lava a uma loʻu ola i le aso tonu lea na ou fanau mai ai. Na faigatā loʻu fanauga mai, ma sa fai e fomaʻi tui o loʻu tinā, lea na matuā tupu ai lava le faalētonu iā te aʻu. I le aso lona tolu na sosoo ai, na matuā tetete lava loʻu tino laʻitiiti, ma pepē oʻu lima ma vae, ma faalētonu ma loʻu alāleo.

A o oʻu tuputupu aʻe, na tumu aʻu i le lē fiafia ona o le faalētonu o loʻu tino. Na ou lagona le itaitagofie ma ou fai ai tala faatigā i isi. Na iā te aʻu le lagona e pei ua faaesea aʻu mai isi, ma ua leai se uiga o le olaga. E oo ane i le 25 oʻu tausaga, ua tumu aʻu i le mafatia. Talu ai ou te lē iloa pe aiseā ua tuu mai ai e le Atua nei mau puapuaga, pau le faaiʻuga talafeagai na oo mai iā te aʻu, e leai se Atua.

Se Isi Vaaiga

I se tasi taeao i le faaiʻuiʻuga o le 1987, a o oʻu nofonofo i fafo i loʻu nofoa faataavale, e toʻalua ni alii ofu lelei na savavali mai iā te aʻu. Sa ou manatu o loo fia talanoa i loʻu uso, ma e ui e faigatā ona ou tautala, na ou fai i ai, e lē o i le fale loʻu uso. Ae na la tali mai: “Leai, o oe lea e ma te fia talanoa i ai.” Na ou teʻi i lea mea auā e seāseā se tagata fia talanoa iā te aʻu.

Na la fesili mai: “E te talitonu i le Atua?” O laʻu tali tuu taseʻi na fai i ai, “E faafefea ona ou talitonu, ae seʻi vaai i loʻu tino.” Na faaauau le matou talanoaga ma na ou iloa ai, o i laʻua o ni Molimau a Ieova. Na la tuu mai se tusi, Life—How Did It Get Here? By Evolution or by Creation? * ma na ou talia toaʻi. Ona la fai mai lea e toe foʻi mai, ae na ou faapea, talosia ia lē toe ō mai.

Na toe foʻi mai tama Molimau, ma faaauau le matou talanoaga. Ou te manatua mau na la faitauina, o le Isaia 35:5, 6: “Ona faapupulaina ai lea mata o ē tauaso, e faalogoa fo’i taliga o e tutuli; ona osooso ai lea o le pipili e pei o le ʻaila, e pese fo’i le laulaufaiva o le gūgū.” E matagofie tele ia upu, ae na ese lava ma le tulaga o loo iai loʻu olaga. E lē gata ina lē mafai ona ou osooso, ae e lē mafai foʻi ona ou tū. Na ou ioe e matou te suʻesuʻe i le Tusi Paia, ae ou te leʻi talitonu e mafai ona aogā le Tusi Paia i oʻu faafitauli. E aunoa ma soʻu faamoemoe o le a iai se aso e aveese uma ai faalētonu o loʻu tino.

E leʻi umi, ae valaaulia aʻu e Molimau i se sauniga i le Maota mo Sauniga. Ou te lē manatua le mataupu o le Tusi Paia, ae e lē mafai ona galo iā te aʻu le māfana ma le alofa na faaali mai e Molimau iā te aʻu. Na ou matuā lagona lo latou fiafia moni e feiloaʻi iā te aʻu. O le aso Sa lenā na ou iloa ai, o le mea e tatau ona ou iai, o sauniga i le Maota mo Sauniga, ma na amata loa ona ou auai e lē aunoa.

 Manumalo i se Toʻatugā

Na matuā suia lava oʻu faalogona talu ona ou suʻesuʻe i le Afioga a le Atua. E peiseaʻī ua toe maua se ola i se laau na mate. Na toe oo mai ni lagona sa ou faapea ua lē o toe iai iā te aʻu. Oka le manaia o le lagona e pei ua toe ola! Na oo iā te aʻu le faanaunauga ia taʻu i isi le faamoemoe matagofie lea ua iā te aʻu. (Mataio 24:14) Ae o le a faapefea nei ona ou talaʻi? Na ou tatalo faatauanau iā Ieova e tusa o lea mataupu, ina ia ona faasino mai le ala.

Iā Setema 1991, na tofia mai ai se paeonia (o sē e talaʻi faataimi atoa) i le matou faapotopotoga. I se tasi aso, a o oʻu iai i lona fale, na ou taʻu i ai loʻu faanaunauga e fia talaʻi. Talu ai e lē manino laʻu tautala, na ma talanoa e tusa o le faaaogā o se laau lomitusi e tusi ai tusi. Ae e faigatā ona ua pepē oʻu lima. E tele ni auala na taumafai le paeonia ia ou faataʻitaʻi ai. Na ou taumafai e ū le peni ma tā ai ki o le laau lomitusi. Ona faaaogā foʻi lea o se pulou e faapipii i ai se laau ma lue loʻu ulu e tā ai ki. Ae e leʻi aogā uma na taumafaiga.

Mulimuli ane, a o ma talanoa i le faafitauli, na tala tausua le paeonia ma faapea mai: “O le manaia ia o lou isu.” Ona ou tāina lea o ki i loʻu isu, ma na aogā lea faiga. Ua mafai ai loa ona fai aʻu tusi. O le faigatā ia ona faaaogā o loʻu isu e faasaʻo ai le sipelaina o upu! Ona ma manatu lea e faapea, ana iai se komepiuta, e faigofie. Ae o fea o le a maua ai se tupe e faatau ai? Na ou talanoa i oʻu mātua ina ua maua se avanoa lelei. E leʻi umi ae maua loa se komepiuta e fai ai aʻu tusi.

Taunuu Loʻu Faanaunauga

Na amata ona ou tusi i uō ma aiga, ona sosoo ai lea ma tagata o le matou nuu ma nuu lata mai. E leʻi umi ae matou fetusiaʻi ma tagata mai vaega eseese o Italia. E leai ni upu e faamatala ai loʻu fiafia pe a tali mai se tasi i saʻu tusi. Iā Tesema 1991, na avea ai aʻu ma tagata talaʻi e leʻi papatisoina o le tala lelei. Na ou auai foʻi i le Aʻoga o le Faiva Faatiokarate, o se aʻoga e faia i vaiaso taʻitasi i faapotopotoga a Molimau a Ieova. Pe a aumai saʻu lauga o le aʻoga, e faaaogā laʻu komepiuta i le fale e sauniuni lelei ai. A oo la i le sauniga, ona faitau mai lea e se tasi o aʻu uō laʻu lauga mai le pulelaa.

Ou te lagona pea le faafetai iā Ieova mo lona alofa iā te aʻu, ma na ou iloaina, o le isi laasaga faaleagaga, o le tuuina atu lea o loʻu ola i le Atua, ma papatisoina. Na ou faamalosi ou te talanoa i oʻu mātua e tusa o laʻu filifiliga. E leʻi fiafia oʻu mātua, ae na malosi atu loʻu faanaunauga ia papatisoina na i lo loʻu fefe. Na ou papatiso iā Aokuso 1992, ma na lagolagoina aʻu e Ieova ma oʻu uso Molimau. E uiga ese loʻu fiafia ona sa auai loʻu uso ma lona toʻalua i loʻu papatisoga!

Suiga i Oʻu Manatu

A o faasolo ina manino mataupu silisili o le Afioga a le Atua iā te aʻu, na ou iloa, e manaʻomia ona sui oʻu uiga. Talu ai loʻu maʻi, na avea aʻu o se tagata e fuā ma manatu faapito. Na ou tauivi ia teʻa ia uiga leaga. Na tatau ona ou loto maulalo ma ia lē avea loʻu faalagolago i isi ma mea e oso ai le fiu.

Na ou tauivi foʻi ia tuu loʻu faanoanoa ma lagona ai e pei ua lē mafai se mea. Na amata ona ou iloa le mālie o mea. I se tasi aso, a o  auai i le talaʻiga i le fale i le fale, na sau se teineitiiti i le faitotoʻa. Na fesili se tasi o Molimau na matou ō, po o iai ona mātua i le fale. Na valaau le teineitiiti i lona tinā, “Mama, e toʻalua tamāloloa ma le tamāloa maʻi lea ua ō mai.” Ina ua sau le tinā ma vaai mai, na mā lava si fafine ma ua lē iloa lana tala a fai. Ae fai atu le isi aʻu uō lea na matou ō: “E toʻalua le au mamaʻi, ae tasi e malosi.” Ona matou taliē uma lava lea ma na manaia lava le matou talanoaga.

Faanaunau ia Faatele Atu le Auaunaga

Ina ua māeʻa loʻu papatisoga, na ou paeonia lagolago mo le iva masina, tusa e 60 itula ou te talaʻi ai i masina taʻitasi. Ae o loʻu manaʻoga, ia tele atu mea ou te faia. E leʻi umi ae amata laʻu paeonia sauatoa, ma tele atu le taimi e auai i le talaʻiga. Na fai si faigatā ina ua faatoʻā amata laʻu paeonia. Na manatu le tele o tagata o loo oʻu suʻe tupe, ma o se tulaga lea na ou lagona ai lava le mā, faapea foʻi ma isi matou te galulue faatasi.

E lē gata i lea, na faigatā ona malamalama le toʻatele o le faapotopotoga i aʻu tala ma na lē iloa, po o le ā se auala e fesoasoani mai ai. Ae o le fesoasoani mai o Ieova, faapea le alolofa o le ʻauuso, na oo ai ina feoloolo le tulaga na iai. O le manatu lea ua iai nei i tagata, o aʻu o se Molimau a Ieova o loo taumafai e fesoasoani i tagata ia iloa le finagalo o le Atua, ae e lē na o se tagata maʻi.

Iā Iulai 1994, na ou auai i se aʻoga faapitoa mo paeonia, mo le lua vaiaso. Na matou aʻoaʻoina ai mataupu silisili mai le Tusi Paia e fai ma taʻiala i le galuega talaʻi ma le faia o soo. Na toleniina ai foʻi i matou i le galuega talaʻi. E tusa ma le 40 maila (60 kilomita) le mamao o le mea e fai ai le aʻoga ma loʻu fale, ma na iai ni toʻatugā na tatau ona foʻia ina ia mafai ona ou auai. E lē mafai ona ou moe ese mai loʻu aiga, o lea na auauaʻi le ʻauuso e piki aʻu ma toe momoli i le fale i le afiafi. I le aoauli, e sii aʻu e se isi ma ave i le fogāfale lua, e matou te aai faatasi uma ai.

O se Matafaioi Telē

Iā Mati 2003, na tofia ai aʻu e avea ma toeaina i le faapotopotoga, ma na manaʻomia ona ou galue malosi mo le ʻauuso. O lea ua ou malamalama atili i le faamatalaga a Iesu e faapea: “E sili le manuia o lē na te foaʻi atu, i lo lē na te talia mai.” (Galuega 20:35). E ese le lelei o toeaina o loo matou galulue, ma ua latou fesoasoani mai i oʻu tiute o se toeaina. Ou te lagona le talisapaia o aʻu e le faapotopotoga atoa, aemaise le ʻautalavou, ma e latou te valaaulia aʻu i a latou mea e fai. Ua latou iloaina ua ou mafaia ni mea faigatā ma auauna ai iā Ieova, ma e toʻatele ua talanoa mai i se fesoasoani i o latou faafitauli.

Ua ou iloa nei, ina ia maua le fiafia, e lē tāua le malosi o le tino. Ae o le mea e tāua, ia maua le finagalo malie o Ieova ma fai lona finagalo. Ua sili ona ou faafetai iā te ia ona o le faamoemoe matagofie, lea ua toeitiiti ona lē toe manaʻomia lea o loʻu nofoa faataavale. Ioe, ou te faamoemoe o le a mafai ona ou ‘osooso e pei o le ʻaila’ ma auauna i le Atua moni e faavavau.—Isaia 35:5, 6.

[Faaopoopoga i lalo]

[Faamatalaga faaopoopo i le itulau 30]

O le manatu lea ua iai nei i tagata, o aʻu o se Molimau a Ieova o loo taumafai e fesoasoani tagata ia iloa le finagalo o le Atua, ae e lē na o se tagata maʻi

[Ata i le itulau 29]

Suʻesuʻe mo le sauniga a le faapotopotoga e ala i le faaaogā o loʻu isu e lolomi ai