Le Manatu o le Tusi Paia

Pe Avea Tagata ma Agelu pe a Maliliu?

NA MALIU se teineitiiti e igoa iā Argyro ae na o le fitu ona tausaga. Na tilotilo ma le faanoanoa ona mātua iā te ia a o taoto i lona pusa oti, o loo ofu lona ofu paʻepaʻe. Na faamāfanafana atu le faifeʻau iā i laʻua e faapea: “Ua ave e le Atua Argyro e la te faatasi ona ua ia manaʻo i se isi agelu. O loo feleleleleaʻi lona agaga i le nofoālii o Lē ona le malosi uma lava.”

E tāua i le toʻatele o tagata lea talitonuga faapea, o agelu, o agaga ia o ē ua feoti, e ui ina toʻaitiiti tapuaʻiga e lagolagoina lea manatu. Ae ua uunaʻia e faasalalauga lea manatu, e ala i ata ma TV e faatatau i ē ua oti ua avea ma agelu, ona ua latou fesoasoani ma puipui i ē o ola.

Ae pe mafai moni ona e faapea o le a avea ē pele iā te oe ma agelu, pe a feoti? O le ā tonu le manatu o loo aʻoaʻoina e le Tusi Paia? A o leʻi taliina lea fesili, seʻi tatou vāai muamua po o le ā le faamatalaga a le Tusi Paia e faatatau i agelu, ma le tulaga o ē ua oti.

E Ese Agelu Mai Tagata

O agelu, o auauna a le Atua e lē mafai ona vaaia e mata, e mamana, o loo i le nofoaga agaga i le lagi. Latou te lē faalagolago pe puleaina i latou e tagata. O agelu, o foafoaga agaga ia na faia e le Atua. Ua fai mai le Tusi Paia: ‘Ia vivii atu agelu i le suafa o Ieova; auā o ia na fetalai ane, ona faia lava lea.’—Salamo 148:2, 5.

Ua faaalia i le Tusi Paia, e faitau miliona foafoaga agaga faamaoni, e iai serafi ma kerupi, o loo auauna faamaoni i tiute faapitoa e tusa ma o latou tulaga ma tofiga. (Salamo 103:20, 21; Isaia 6:1-7; Tanielu 7:9, 10) Pe na tatau ona feoti tagata ina ia maua uma ai na agelu a le Atua? Ua matuā lē talafeagai lava lea tulaga. Aiseā?

Ua faaalia i le Tusi Paia, na muamua faia agelu, a o leʻi taitai ona faia ni tagata. Ina ua faia e le Atua le paneta lea na mulimuli ane ainā e tagata, na ‘pepese faatasi ma alalaga fiafia’ le ʻauagelu, lea o loo taʻua o fetu o le taeao. (Iopu 38:4-7) O lona uiga, ua leva ona iai agelu, a o leʻi faia le tagata.

E lē gata i lea, e matuā eseese lava le natura ma le tulaga o agelu, ma tagata, i le fuafuaga a Ieova. * Na faia le tagata ‘e faamaulalo ane teisi i agelu,’ o lea, ua sili atu ona malolosi agelu i lo tagata, i le mafaufau ma le mana. (Eperu 2:7) E ao ona latou ‘nonofo’ i le lagi. (Iuta 6) Ae e tusa ai ma le finagalo o le Atua mo le tagata i le amataga, e tatau ona ola o ia e faavavau i le lalolagi. (Kenese 1:28; 2:17; Salamo 37:29) A na usitai le uluaʻi ulugalii i le Atua, semanū  e lē oo le oti iā i laʻua. O lea la, mai lava i le amataga, ua lē tutusa le fuafuaga a le Atua mo tagata, ma agelu.

O le ā e Tupu pe a Oti?

O nisi fesili tāua e ao ona tatou suʻesuʻe i ai: O le ā e tupu pe a oti le tagata? Po o ola pea i se isi tino e ese, pe atonu e avea o se agelu i le nofoaga agaga? E faigofie ma manino le tali a le Tusi Paia: “O ē ua ola, ua latou iloa e oti i latou; a o ē ua oti, latou te lē iloa se mea.” (Failauga 9:5) O lea la a oti le tagata, ua leai lava. O ē ua oti, ua lē iloa, pe lagonaina se mea e tupu iā i latou.

Pe toe iai se faamoemoe pe a oti? Ioe! Ua faaalia i le Tusi Paia le faamoemoe mo le toʻatele o loo feoti, o le toe tū lea. O le a toe faatutū mai le toʻatele o ē ua feoti, i se lalolagi parataiso.—Luka 23:43; Ioane 5:28.

E iai nisi o loo faamoemoe e toe tūtū i le ola i le lagi. E toʻaitiiti lo latou aofaʻi, e 144,000. Ae ua ese le vaega lea mai agelu. O le a avea i latou ma tupu ma faitaulaga faatasi ma Keriso, e lē oo le oti iā i latou. E avea i latou ma faamasino. (1 Korinito 6:3; Faaaliga 20:6) Po o i latou o ni pepe na feoti? E leai. O i latou o ē mulimuli iā Keriso, ua tofotofoina ma faamaonia atoatoa!—Luka 22:28, 29.

Seʻi mātau foʻi le eseesega o ē oti, ma agelu. O ē ua oti, ua “lē iloa se mea,” ae o agelu, o loo iloa mea, e iai o latou faalogona, ma e latou te faia ni filifiliga. Ua iā i latou le saʻolotoga e filifili ai. (Kenese 6:2, 4; Salamo 146:4; 2 Peteru 2:4) O ē ua oti, ua ‘lē o toe ola,’ po ua latou lē toe mafaia se mea, ae o agelu, “e malolosi tele.” (Isaia 26:14; Salamo 103:20) E lē gata i lea, o loo oti tagata uma ona o le agasala ma le lē lelei atoatoa mai iā Atamu, ae o agelu, e lelei atoatoa ma matataʻu i le Atua, o loo iai se latou faiā lelei ma Ieova.—Mataio 18:10.

E ui o loo faaali i TV ma tifaga e faapea o agelu o agaga ia o ē ua oti, ae e lē o iai lea manatu i le Tusi Paia. E aogā upu moni ua taʻua i luga ina ia tatou ʻalofia ai manatu sesē i le mea e tupu i o tatou aiga pe a maliliu. Ua taʻu manino mai e le Tusi Paia, e leʻi faia faatasi agelu ma tagata, ae o latou o ni auauna mamana ma faamaoni a le Atua, ua sili atu i lo tagata, ma ua sauni e fai le finagalo o Ieova. O se tulaga fiafia, ona o se vaega o le finagalo o le Atua, ia vaavaaia e agelu tagata e faaalia le āva iā Ieova ma taumafai e auauna iā te ia.—Salamo 34:7.

[Faaopoopoga i lalo]

PO O E TAUMĀNATU EA I NISI TAIMI?

▪ Po ua avea tagata o lou aiga ua maliliu ma agelu o loo auauna i le Atua i le lagi?—Failauga 9:5, 10.

▪ Po ua maliliu tamaiti ona o loo finagalo le Atua ia tele agelu e auauna iā te ia?—Iopu 34:10.

▪ Pe e mafai e i latou ua feoti ona puipui ē o ola?—Isaia 26:14.

[Faamatalaga faaopoopo i le itulau 15]

‘Ia vivii atu agelu i le suafa o Ieova; auā o ia na fetalai ane, ona faia lava lea.’—Salamo 148:2, 5