Pe Iai se Afāina o Mea E te Talitonu i Ai?
Pe Iai se Afāina o Mea E te Talitonu i Ai?
O LE ā sou manatu, pe e iai se māfuaaga ua ala ai ona tatou ola? Pe afai e moni le evolusione, o lona uiga la ua talafeagai le faamatalaga o loo i le mekasini Scientific American e faapea: “O le malamalama ua iai nei e tusa o le evolusione, ua manatu ai . . . e leai se uiga o le olaga.”
A fua i lea faamatalaga, afai e leai se uiga ua ala ai ona tatou ola, o lona uiga foʻi la e leai la se māfuaaga o le olaga, pau lea ia fai se mea aogā, ma ia maua se isi tupulaga mai iā te oe. A oo ina e oti, ua galo atu oe e te lē toe iai lava. O lou faiʻai lea e te mafaufau, ma fefulisaʻi ai, ma manatunatu loloto e tusa o le uiga o le olaga, ua na o se mea na teʻi lava ua iai.
Ae e lē pau ai lenā. O le toʻatele o ē talitonu i le evolusione ua faapea mai, e leai se Atua, pe e lē fia aiā mai o ia i meafai a tagata. O lona uiga e faalagolago la lo tatou lumanaʻi i tagata e taʻitaʻi i polotiki, aʻoaʻoga, ma lotu. Ae a fua i a latou taumafaiga ua tuanaʻi, o le a tumau lava la le fenumiaʻi, feteenaʻi ma faiga piʻopiʻo lea e malaia ai tagata. O lea la, afai e moni le evolusione, ua tatau la ona ola e tusa ma le manatu e faapea: “Inā tatou aai ma inu, auā o a taeao tatou te oti ai.”—1 Korinito 15:32.
Ae, ia mātau mai le mea moni lenei. E lē talitonu Molimau a Ieova i manatu o loo taʻua i luga. E latou te lē lagolagoina foʻi le evolusione, lea e faavae mai ai ia manatu. Ae ua talitonu Molimau, e moni le Tusi Paia. (Ioane 17:17) O lea, ua latou talitonu i le māfuaaga ua tatou iai i inei e tusa o le upu a le Tusi Paia: “Auā o loo iā te oe [le Atua] le puna o le ola.” (Salamo 36:9) E ese le tāua o ia upu.
Ua iai se māfuaaga ua ala ai ona tatou ola. O loo iai le fuafuaga alofa a le Atua mo i latou uma o loo fia ola e tusa ma lona finagalo. (Failauga 12:13) Ua aofia ai i lea fuafuaga le folafolaga i le iai o se olaga e aunoa ma le fenumiaʻi, feteenaʻi, ma faiga piʻopiʻo, faapea ma le oti. (Isaia 2:4; 25:6-8) E faitau miliona Molimau a Ieova i le lalolagi aoao ua latou faamaonia e faapea, o le iloaina o le Atua ma faia lona finagalo, e maua ai se fuafuaga matagofie i le olaga!—Ioane 17:3.
E tāua tele mea o loo e talitonu i ai auā e aafia ai lou fiafia i le taimi nei, faapea lou lumanaʻi. Ae e pule oe i lau filifiliga. Po o le a e talitonu i se talitonuga o loo teena faamaoniga ua iai, e tusa o le matagofie o mea na faia? Po o le a e talia le mea o fai mai ai le Tusi Paia, o le lalolagi ma mea o iai na faia e Lē ofoofogia na “faia mea uma lava” o Ieova le Atua lea?—Faaaliga 4:11.