Le Manatu o le Tusi Paia

Pe Mafai Ona E Fesoasoani i Ē ua Maliliu?

“Mai le amataga, ua fai e le Lotu. . . tatalo mo [ē ua oti] . . . ina ia faamamāina, ma latou vaaia ai le mamalu o le Atua.” —“Catechism of the Catholic Church.”

O SE mea o loo fia iloa e tagata uma, po o le ā tonu le tulaga o ē ua maliliu. Atonu ua oo iā te oe le faanoanoa ma le mafatia, ina ua maliu sē e pele iā te oe. Atonu o loo e fia iloa pe faamata o loo ola pea i se isi mea, po o puapuagatia po o filemu, ma pe e mafai ona e fesoasoani iā i latou.

O loo talitonu le tele o tagata lotu, e mafai ona latou fesoasoani i ē ua maliliu. O se faataʻitaʻiga, e talitonu tagata Hinitū, afai e susunu le tino o lē ua oti i auvai o le Ganges, ma faasalalau lona lefulefu i le vai, o le a fiafia lē ua oti, e faavavau. I atunuu i Sasaʻe, ua susunu e tagata lotu ata o taavale, fale, lavalava, ma tupe, ina ia mafai e lē ua maliu ona faaaogā na mea i le isi mea o loo alu atu i ai. I Aferika, ua sasaaina fagu ʻava malolosi i autafa o le tuugamau, ona e manatu e aogā lea i lē ua maliu.

I aʻoaʻoga Katoliko, a maliu se tasi ae leʻi salamō mai sana agasala matuiā, ua ia aveesea o ia lava mai le finagalo lelei o le Atua. Ua latou taʻua lea tulaga o “seoli.” I le isi itu, ua aʻoaʻo e faapea o lē e maua le finagalo malie o le Atua e faamoemoe e na te maua le “fiafiaga sili” faatasi ma le Atua i le lagi, ae e manaʻomia ona faamamā muamua. E faia lea e ala i le nofo mo sina taimi i pulekatolio e “faamamā ai i le afi,” tusa o le faasalaga lea ona  o ni agasala e mafai ona faamagaloina. A o iai o ia i pulekatolio, e fai tatalo ma Misasā a le lotu, mo ia. O ia talosaga, e totogiina e uō ma aiga o lē ua maliu.

O se tulaga masani lo tatou mananaʻo ia faamāmā puapuaga o sē e pele iā i tatou. Ae afai e mafai moni ona fesoasoani i lē ua maliu, pe e lē tatau la ona faamatala manino mai e le Atua le auala e fai ai? Seʻi o tatou vāai i le aʻoaʻoga a le Tusi Paia e tusa o le fesoasoani mo ē ua maliliu.

Le Tulaga o Ē ua Oti

O faiga uma o loo taʻua i luga, e faavae mai le talitonuga o loo iai se vaega o le tagata o loo ola pea i se isi mea pe a oti. Ae, o le ā le aʻoaʻoga a le Tusi Paia? Ua fai mai le Tusi Paia: “Auā o ē ua ola, ua latou iloa e oti i latou; a o ē ua oti, latou te lē iloa se mea; ua leai foʻi se toe totogi iā te i latou; auā ua faagalogaloina i latou. O lo latou alofa foʻi, ma lo latou ita, ma lo latou matauʻa, ua mavae lava ia; ua le toe aiā i latou e faavavau i mea uma ua faia i lalo o le la. O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 6, 10) O Seoli, o le upu Eperu lea mo tuugamau uma.

A oo ina oti le tagata, na tusi le faisalamo: “E alu ese lona agaga, e foʻi atu i le eleele na i ai o ia; e faaumatia i lea lava aso ona manatunatu.”—Salamo 146:4.

O upu a le Tusi Paia, e faamoemoeina, ma e talafeagai. O le ā sou manatu? Pe faamata e faapuapuagatia e se tamā alofa lana fanau ona o ni faalētonu na latou feola mai ma i latou? (Kenese 8:21) E leai. Aiseā la o le a faia ai se tulaga faapea e lo tatou Tamā o i le lagi? Na iai nisi i Isaraelu anamua na faia le faiga faapaupau o le susunuina o a latou fanau e fai ai taulaga i atua sesē, ma na matuā inosia e Ieova lea faiga, ma fetalai mai o ia, “o le mea ou te leʻi poloaʻi atu ai, ou te leʻi manatu foʻi i ai.”—Ieremia 7:31.

O le iʻuga o le agasala, o le oti, ae lē o le faapuapuagatiaina pe a oti. Fai mai le Tusi Paia: “O le oti, o le totogi lea o le agasala,” ma “o lē ua oti ua tuusaunoa ia nai le agasala.”—Roma 5:12; 6:7, 23.

E lē o faapuapuagatiaina ē ua oti i se isi mea. Ae ua pei o loo moe gase i latou, latou te lē lagona se mea fiafia, po o se mea tigā. E mautinoa la, o taumafaiga uma a tagata e fesoasoani ai i ē ua oti, ua lē tusa ai ma aʻoaʻoga a le Tusi Paia.

O le ā se Faamoemoe mo Ē ua Oti?

E lē faapea o le uiga o lea mea o le a tumau ai i le oti, i latou e pele iā te oe. Auā e matuā mataʻina lava le faamoemoe ua iai mo i latou.

A o leʻi toe faatūina mai e Iesu lana uō pele o Lasalo mai le oti, na ia fai mai o le a alu e “fafagu iā te ia.” (Ioane 11:11) Na ia fetalai mai foʻi i se isi taimi e faapea, “e faalogo ai i lona leo o i latou uma ua i tuugamau, ma latou ō mai ai.” (Ioane 5:28, 29) O lona uiga, o ē toetutū, ua mamā i latou mai a latou agasala sa fai, ma e lē toe faasalaina ona o mea na latou fai a o leʻi feoti. O le a latou maua le avanoa e aʻoaʻo ai ia maua le ola i se tulaga lelei atoatoa. Oka se faamoemoe ina a matagofie!

Afai e te naunau i lea faamoemoe, aua e te faatalatū, ia e aʻoaʻo i le moni o ia folafolaga. E fiafia tele Molimau a Ieova e fesoasoani iā te oe.

PO O E TAUMĀNATU EA I NISI TAIMI?

▪ Faamata o iloa ni mea e ē ua maliliu?—Salamo 146:4; Failauga 9:5, 6, 10.

▪ Pe faapuapuagatia e le Atua ē ua oti i se afi?—Ieremia 7:31.

▪ O iai se faamoemoe mo ē ua oti?—Ioane 5:28, 29.