Pe e Feteena‘i le Kenese ma le Faasaienisi?
Le Manatu o le Tusi Paia
Pe e Feteenaʻi le Kenese ma le Faasaienisi?
UA TOʻATELE ua fai mai, ua faalēaogā e le faasaienisi faamatalaga a le Tusi Paia e tusa o le foafoaga o le lalolagi. Ae e lē o le Tusi Paia, ae o ē mapolotu o loo feteenaʻi ma le faasaienisi. Ua sesē lo latou manatu e faapea, e tusa ai ma le Tusi Paia, na faia mea uma i aso e ono e taʻi 24 itula, pe ā ma le 10,000 tausaga ua tuanaʻi.
Ae ua lē lagolagoina lea manatu e le Tusi Paia. A na fai o lea, semanū ua lē moni le Tusi Paia, pe a fua i mea ua iloa mai le faasaienisi i le faitau selau o tausaga ua tuanaʻi. Peitaʻi ane, a suʻesuʻe lelei i le Tusi Paia, e lē o iai se feteenaʻiga ma mea moni faasaienisi. O le māfuaaga lenā e lē auai Molimau a Ieova i manatu o i latou e mapolotu, ma le tele o tagata e suʻesuʻe i le foafoaga. Ua faamatalaina i lalo le mea moni o loo taʻua i le Tusi Paia.
O Anafea Tonu “le Amataga”?
E faigofie lava le faamatalaga amata o le Kenese, e faapea: “Na faia e le Atua le lagi ma le lalolagi i le amataga.” (Kenese 1:1) Ua ioe tagata suʻesuʻe o le Tusi Paia, ua faamatala i lea fuaiupu se gaoioiga e ese mai aso o le foafoaga, ia o loo amata ona faamatala i le fuaiupu e 3. E tāua tele lea manatu. E tusa ai ma le fuaiupu muamua o le Tusi Paia, ua leva ona iai le vateatea, lea e aofia ai lo tatou Lalolagi, a o leʻi amata aso o le foafoaga.
O ē suʻesuʻe i le eleele, ua fai mai e tusa ma le 4 piliona tausaga talu ona iai le laueleele, ae fai mai ē suʻesuʻe i le vateatea, e tusa ma le 15 piliona tausaga talu ona iai le vateatea. Po o feteenaʻi ia manatu ma le Kenese 1:1? E leai. E lē o taʻu patino maia e le Tusi Paia le umi talu ona iai le “lagi ma le lalolagi.” O lona uiga, e lē o taʻusesēina e le faasaienisi le Tusi Paia.
O le ā le Umi o Aso Faalefoafoaga?
Ae o le ā le umi o aso faalefoafoaga? Pe moni e 24 itula? Ua manatu nisi, o lē na tusia le Kenese, o Mose, na ia taʻu le aso na sosoo ma aso faalefoafoaga e ono, e tusa o se ata o le Sapati faalevaiaso, ma o lona uiga la, e taʻi 24 itula le uumi o aso faalefoafoaga. (Esoto 20:11) Po o lagolagoina e le Kenese lea manatu?
E leai. Ona o le upu Eperu o le “aso,” e lē na o se aso e 24 itula o loo faatatau i ai, ae e faatatau foʻi i vaitaimi. O se faataʻitaʻiga, ina ua faamatala galuega faalefoafoaga a le Atua, na taʻu atoa e Mose aso faalefoafoaga e ono, faapea o le aso. (Kenese 2:4) E lē gata i lea, i le aso muamua o le foafoaga: “Ua faaigoa e le Atua le malamalama, O le ao [po o le aso]; a ua faaigoa e ia le pōuliuli, O le pō.” (Kenese 1:5) Ua na o se vaega o le periota e 24 itula ua taʻu o le “aso.” E leai la se faavae o i le Tusi Paia e faapea ai, e 24 itula le umi o le aso faalefoafoaga.
O le ā la le umi o le aso faalefoafoaga? O le faamatalaga o loo i le Kenese mataupu 1 ma le 2, e taʻu mai ai e umī lava se vaitaimi o aofia ai.
Faasolosolo Ona Aliaʻi Mai Mea na Faia
Na tusia e Mose le Kenese i le gagana Eperu, mai le vaaiga a sē tasi o loo i le lalolagi. O ia vala e lua, faapea ma le malamalamaga na iai le vateatea a o leʻi amataina “aso” o le foafoaga, ua faigofie ai ona malamalama e tusa o le finauga e faatatau i le taimi o le foafoaga. I le ā le itu?
A suʻesuʻe lelei i le faamatalaga a le Kenese, ona iloa lea, o mea na amata faia i le tasi aso, na faaauau ona fai i le aso po o aso na sosoo ai. O se faataʻitaʻiga, a o leʻi amata le “aso” muamua faalefoafoaga, e leʻi mafai ona susulu atu le lā i le fogāeleele, atonu na punitia i ao māfiafia. (Iopu 38:9) I le “aso” muamua, na mou atu le mea na punitia ai le malamalama, ma mafai ai loa ona āti atu le malamalama i le atimosifia. *
I le aso lona lua, na manino mai le faasolosolo ona malamalama, ma maua ai le vanimonimo i le va o ao māfiafia i luga, ma le vasa i lalo. I le “aso” lona fā, ua manino le vanimonimo ma ua iloa atu ai le lā ma le masina “i le va nimonimo o le lagi.” (Kenese 1:14-16) O lona uiga, ua mafai ona iloa atu le lā ma le masina e se tagata o loo i le lalolagi. O nei mea na faasolosolo ona tutupu.
Ua fai mai atili le Kenese, a o faasolo ina manino mai le vanimonimo, na amata ona iai manu felelei eseese, e aofia ai ma iniseti, i le “aso” lona lima. Ae ua faaalia i le Tusi Paia, i le “aso” lona ono, sa faaauau ona faia ai e le Atua “o manu vaefā uma lava, ma manu felelei uma lava.”—Kenese 2:19.
Ua manino mai le faamatalaga a le Tusi Paia, e iai ni mea autū na faia faasolosolo i “aso” faalefoafoaga taʻitasi, ae e leʻi faafuaseʻi ona iai, ma atonu o nisi o na mea e oo atu lava i “aso” na sosoo ai, o loo faia lava.
E Taʻitasi ma Lona Uiga
Afai na faia faasolosolo ona iai laau ma meaola, po o lona uiga la, na faaaogā e le Atua le evolusione e faia ai meaola eseese? E leai. Ua faamatala manino mai, na faia e le Atua ituaiga eseese o laau ma manu e tusa ma o latou “uiga.” (Kenese 1:11, 12, 20-25) Pe na faia laau ma manu eseese ina ia sui e tusa ma suiga i le siʻomaga? O faailoa mai suiga e oo i ai “uiga” o ituaiga taʻitasi? E lē o taʻu maia i le Tusi Paia. Ae ua taʻua e faapea, o meaola uma “ua tele ona tutupu mai . . . , e taʻitasi ma lona uiga.” (Kenese 1:21) E tusa ai ma lea fuaiupu, e iai le mea e gata ai suiga o “uiga” o se ituaiga. Ua iloa mai mea na eli mai le palapala ma saʻiliʻiliga i ona po nei, e leai se suiga tele ua oo i laau ma manu a o faagasologa tausaga e tele.
E ese ai ma manatu o le ʻau mapolotu, e lē o taʻua i le Kenese le manatu e faapea na faia le vateatea, ma le lalolagi ma meaola uma o loo iai, i se taimi puupuu e leʻi leva atu. Ae ua ōgatusa le faamatalaga a le Kenese e tusa o le faia o le vateatea ma le iai o meaola i le lalolagi, ma mea ia ua iloa mai saʻiliʻiliga faasaienisi talu ai nei.
O o latou lava talitonuga faasaienisi ua teena ai e le tele o saienitisi faamatalaga a le Tusi Paia e faapea, na faia e le Atua mea uma. Ae na tusi Mose i le Kenese, lea e mai anamuā, faapea na iai le amataga o le vateatea, ma na faasolosolo ma auauaʻi ona iai le ola, a o faagasolo le taimi. Na faapefea ona iloa e Mose ia faamatalaga moni faasaienisi, i tuā i le 3,500 tausaga ua tuanaʻi? E tasi lava le tali. Na ave iā Mose lea malamalamaga uiga ese, e Lē ōna le mana ma le poto na faia ai le lagi ma le lalolagi, ma ua faamaonia atili ai faapea, o le Tusi Paia, e “mai le Agaga o le Atua.”—2 Timoteo 3:16, 17.
[Faaopoopoga i lalo]
^ pala. 14 E tusa ai ma le faamatalaga o le mea na tupu i le “aso” muamua, o le upu Eperu o le malamalama, o le ʼohr, e faatatau lea i so o se malamalama, ae i le “aso” lona fā, o le upu o loo faaaogāina, o le ma·ʼohrʹ, e faatatau lea i le puna o le malamalama.
PO O E TAUMĀNATU EA I NISI TAIMI?
▪ O le ā le umi talu ona faia e le Atua le vateatea?—Kenese 1:1.
▪ Pe na faia le lalolagi i aso e ono e taʻi 24 itula?—Kenese 2:4.
▪ E tusa ma le faasaienisi, aiseā e saʻo ai faamatalaga a Mose e tusa o le amataga o le lalolagi?—2 Timoteo 3:16.
[Faamatalaga faaopoopo i le itulau 11]
E lē o taʻua i le Kenese le manatu e faapea na faia le vateatea i se taimi puupuu e leʻi leva atu
[Faamatalaga faaopoopo i le itulau 12]
“Na faia e le Atua le lagi ma le lalolagi i le amataga.”—Kenese 1:1
[Ē Ana le Ata i le itulau 10]
Le Vateatea: IAC/RGO/David Malin Images
[Ē Ana le Ata i le itulau 12]
Ata a NASA