Aiseā ua Lē Taofia ai e le Atua Puapuaga?

O NISI taimi, o loo fia maua e lē ua fesili i lea fesili “Aiseā” sina faamāfanafanaga ma se tali, auā afai ua ia manatu faapea ona o ona puapuaga, o loo ia manaʻomia foʻi faamāfanafanaga. O le ā se faamāfanafanaga o aumaia i le Tusi Paia? E tolu ni mea moni tāua mai le Tusi Paia e tusa o lenei mataupu, o le a iloiloina.

Muamua lava, e leai se afāina o le fia iloa pe aiseā e lē taofia ai e le Atua puapuaga. Ua popole nisi ona e manatu, a latou fesili faapea, ua faaalia ai e lē lava lo latou faatuatua, ma e lē migao ai i le Atua. Ae afai e faamaoni lau fesili, ua pei oe o nisi o le ʻaufaatuatua. Na fesili le perofeta faatuatua o Sapakuka i le Atua: “Se ā ea le mea ua e faaali mai ai iā te aʻu le amio leaga, ma e silasila i le puapuaga? e i oʻu luma le faatafunaina ma le sauā, e i ai foʻi le fefinauaʻiga ma le faatupuina o le misa.” (Sapakuka 1:3) Sa leʻi manatu Ieova e sesē Sapakuka. Ae na ia faamauina le fesili a lea tagata faatuatua ina ia tatou faitau ai.—Roma 15:4.

Lona lua, e tāua lou iloaina, o loo alofa mai le Atua ona o ou mafatiaga. O le Atua, e lē o se tasi e tūtū mamao e faigatā ona tatou iloa, ae ‘e fiafia o ia i le faamasinoga,’ ma e ʻinoʻino o ia i amioga leaga, ma mafatiaga ua oo mai ai. (Salamo 37:28; Faataoto 6:16-19) I aso o Noa, na ‘tigā lona finagalo’ ona ua tele le leaga i le lalolagi. (Kenese 6:5, 6) E lē suia le Atua, ma ua tigā foʻi lona finagalo i mea o loo tutupu i nei aso.—Malaki 3:6.

Lona tolu, e lē taitai avea le Atua ma pogai o le amioleaga. Ua manino lea manatu mai le Tusi Paia. O ē tuuaʻia le Atua i fasiotigātagata ma faiga faatupu faalavelave, ua latou taufaaleaga i le Atua. Mātau mai le Iopu 34:10: “E mamao ma le Atua ona ia amio leaga, ma Lē e ona le malosi uma lava ona ia amiolētonu.” Ua fai mai foʻi le Iakopo 1:13: “A faaosoosoina se tasi, aua le faapea, ‘Ua faaosoosoina aʻu mai le Atua,’ auā e lē mafai ona faaosoosoina o le Atua i mea leaga, e lē faaosooso atu foʻi o ia i se tasi.” O lea, e lē o le Atua le pogai o ou puapuaga.

O Ai o Pulea le Lalolagi?

Peitaʻi, o loo tulaʻi mai pea le fesili, Afai e alofa le Atua, ma e tonu ma mamana, aiseā  ua tumu ai le lalolagi i le leaga? O loo iai se manatu sesē e ao ona faasaʻo muamua. Ua tele tagata o loo manatu, o le Atua e ona le malosi uma, ua ia pulea mea uma i le lalolagi. Fai mai le peresitene o se kolisi faafaifeʻau, “E leai sina mea itiiti o le vateatea e lē o pulea e le Atua.” Po o iai lea manatu i le Tusi Paia?

E leai, ma e fou i le toʻatele le upu a le Tusi Paia, e tusa ai ma lē o loo pulea le lalolagi. O se faataʻitaʻiga, fai mai le 1 Ioane 5:19: “O le lalolagi uma o loo nofo toʻilalo i loo leaga.” O ai ia lea? Na fai mai Iesu Keriso, o ia lea o Satani le Tiapolo, ma na ia taʻu o ia, o “le alii o lenei lalolagi.” (Ioane 14:30) Ua talafeagai le manatu lea, a ea? Auā e lē alofa Satani, ma e taufaaʻoleʻole ma leaga, o uiga ia ua pogai ai mafatiaga o tagata. Aiseā ua tuu ai e le Atua Satani e pule?

Se Mataupu na Lāgā i Etena

Faamata o le ā se lagona e oo i se matua alofa pe afai e tuuaʻia o ia i luma o le lautele faapea e pepelo i lana fanau, e pule sauā, ma taofia mea lelei mai iā i latou? Pe o le a ia teena tuuaʻiga ma faaoolima i ē faia faamatalaga? O le mea moni, e leai! Auā a ia faia faapea, atonu o le a manatu ai tagata, e moni ia tuuaʻiga.

O lea faataʻitaʻiga, e faamalamalama ai le auala o loo taulima ai e Ieova le Atua le luʻia o lana pule i Etena. Na faailoa e le Atua i iā Atamu ma Eva, se fuafuaga matagofie mo lana fanau i le lalolagi. Ia latou faatumu le lalolagi, faatoʻilalo i ai, ma ia avea ma parataiso. (Kenese 1:28) Ma e faitau miliona atalii agaga o le Atua na naunau e fia iloa lenei fuafuaga matagofie.—Iopu 38:4, 7; Tanielu 7:10.

Ona o ia o se Atua e limafoaʻi, na tuu ai e Ieova Atamu ma Eva i se nofoaga matagofie, na tumu i fualaau ʻaina susua. Ae na o le tasi lava le laau na faasāina, “le laau [lea] e iloa ai le lelei ma le leaga.” Afai e lē ʻaina e Atamu ma Eva le fua o lea laau, o le a faaalia ai lo la faatuatuaina atoatoa o lo la Tamā, ua na o ia e iai le aiā e filifili ai mea e lelei ma mea e leaga mo lana fanau.—Kenese 2:16, 17.

Peitaʻi ane, talu ai le manaʻonaʻo o se tasi atalii agaga o le Atua ia tapuaʻi tagata iā te ia, na ia fai ai iā Eva, e lē oo le oti iā te ia pe a ia ʻaina le fua faasāina. (Kenese 2:17; 3:1-5) Na matuā tetee lea agelu leaga, o Satani, i le Atua, ma e tusa ua ia taʻua le Atua, o le pepelo! Na tuuaʻia foʻi e Satani le Atua e faapea ua ia taofia mai iā Atamu ma Eva se poto e tāua ona la iloaina. E tusa ua ia fai mai, e ao ona tuu le tagata e filifili i le lelei ma le leaga. I se isi faaupuga, ua fai mai Satani, e lē o se Tamā lelei le Atua, e lē lelei lana Pule, ma e sili pe a tuu atu le pule iā te ia.

O lona taufaaleaga ma lona pepelo, na avea ai lea agelu ma Satani le Tiapolo. O le uiga o ona igoa, o “Lē Tetee,” ma “Lē Taufaaleaga.” O le ā na fai e Atamu ma Eva? Na la ʻau iā Satani, ae fulitua i le Atua.—Kenese 3:6.

E lē faigatā iā Ieova ona faaumatia loa le ʻaufouvale i lenā taimi. Ae, e pei ona taʻua muamua i le faataʻitaʻiga, o le a lē iloa ai le tonu o le mataupu pe a tali i le sauā. E lē gata i lea, ina ua luʻia e Satani le Atua, e faitau miliona agelu na faalogologo ane. E lē iloa le aofaʻi, ae e toʻatele i latou na mulimuli ane auai ma Satani i lana fouvale, ma ua avea ma temoni.—Mareko 1:34; 2 Peteru 2:4; Iuta 6.

Aiseā ua Tuu ai Pea e le Atua?

Ina ua faasesē e Satani Atamu ma Eva ia tutoʻatasi mai Lē na faia i laʻua, e tusa ua ia faavaeina se aiga e lē o maua moni se tutoʻatasi, auā o loo ia pulea i latou. Pe e iloa e lea aiga pe leai, ae ua aafia a latou filifiliga i sini ma amioga mai lo latou “tamā,” le Tiapolo. (Ioane 8:44) Ae pe faamata e latou te  maua ai se saʻolotoga moni ma se fiafiaga tumau? Na silafia lelei e Ieova, e lē o le tulaga lenā e oo i ai. Ae na ia tuu ai pea le ʻaufouvale seʻi fai lo latou fia tutoʻatasi, auā e pau lea o le auala e faamalieina ai le mataupu lea na lāgā i Etena.

Ua silia nei ma le 6,000 tausaga o fai le mea e manaʻo i ai le tagata, i pulega ma olaga eseese ua taumafai i ai. Po o e fiafia i iʻuga o na taumafaiga? Po o maua e tagata le fiafia, filemu, ma le autasi moni? Ua manino le tali, e leai! Ae ua pagatia tagata i taua, o oge, mala faalenatura, maʻi, ma le oti, lea ua māfua ai le “iʻu vale,” le “oi,” ma le “oono,” e pei ona taʻua i le Tusi Paia.—Roma 8:19-22; Failauga 8:9.

Ae o le a fesili pea nisi, Aiseā la ua lē taofia ai e le Atua nei mala? Afai e taofia e le Atua, e lē tonu lea tulaga, ma o le a nenefu ai le mataupu, auā o le a foliga mai ai, e leai se afāina o le fouvale i le Atua. O lea, e lē o taofia e Ieova solitulafono ma puapuaga ua māfua ona o le lē usiusitai iā te ia. * E matuā lē mafai lava ona lagolagoina e Ieova le pepelo e faapea, e taulau le pulega a Satani, ma o lea le auala e fiafia ai! Ae, e lē o galo i tatou iā te ia. O le mea moni, o loo galue malosi o ia.

“O Loo Galue Loʻu Tamā”

Ua faaalia i upu a Iesu, e lē o nofoaʻi le Atua. (Ioane 5:17) Ae o loo galue malosi o ia, talu le fouvalega i Etena. O se faataʻitaʻiga, na ia faagaeeina tagata ia tusia lana  folafolaga i le Tusi Paia, e faatatau i le “fanau” o le a tuʻimomomoina Satani ma ē o loo pipii atu iā te ia. (Kenese 3:15) E ala i lea Fanau, ua faavaeina e le Atua se pulega, o le Malo faalelagi, e faamanuia ai tagata usiusitai, ma aveese ai pogai uma o mafatiaga, e oo foʻi i le oti.—Kenese 22:18; Salamo 46:9; 72:16; Isaia 25:8; 33:24; Tanielu 7:13, 14.

Ina ia taunuu ia folafolaga matagofie, na auina mai ai e Ieova i le lalolagi Lē o le a avea ma Pule autū o lea Malo. O lona Alo lea, o Iesu Keriso. (Kalatia 3:16) Na faaautū le aʻoaʻoga a Iesu i le Malo o le Atua, e tusa ai ma le fuafuaga a le Atua mo ia. (Luka 4:43) O le mea moni, na faaalia mai i le soifuaga o Keriso, mea o le a ia faia pe a avea ma Tupu o lea Malo. E faitau afe na ia fafagaina, ma faamālōlō i ē mamaʻi, toe faatutū i ē oti, ma faaali lona mana e pulea ai matagi malolosi. (Mataio 14:14-21; Mareko 4:37-39; Ioane 11:43, 44) Ua fai mai le Tusi Paia e uiga iā Iesu: “O mea uma ua folafolaina e le Atua, ua ioe ia iā te ia.”—2 Korinito 1:20, LT.

O i latou e faalogo iā Iesu ma ō mai “nai le lalolagi,” po o le faiga o mea e pulea e Satani ua talia ma le fiafia i le aiga o Ieova. (Ioane 15:19) Ua faatautaia i le alofa ma le filemu lenei aiga o Kerisiano moni i le lalolagi aoao, ma ua iloaina i latou ona o lo latou filigā ia leai se faailoga tagata ma se faailoga lanu iā i latou.—Malaki 3:17, 18; Ioane 13:34, 35.

E lē lagolagoina e Kerisiano moni lenei lalolagi, ae latou te faamuamua ma faalauiloa le Malo o le Atua, auā ua latou usitai i le faatonuga a Keriso, i le Mataio 24:14. Faamata la o ai o loo talaʻia le “tala lelei o le malo” i le lalolagi aoao? O ai ua teena le auai i taua ma feteenaʻiga a nuu ma ituaiga, ona o i latou o se aiga e autasi faaleagaga i le lalolagi aoao? O ai ua avea le Afioga a le Atua ma o latou taʻiala i amio, e tusa pe lē fiafia isi ona o le maualuga o ana tapulaa? (1 Ioane 5:3) Ua mātauina e le toʻatele, o uiga ia ua iloa ai Molimau a Ieova. E lelei ona e iloilo faamaoniga.

Ia Filifili mo le Pulega a le Atua!

O ē tetee i le Atua ma faasesēina e Satani, ua latou faia se lalolagi ua faatupulaʻia ai mafatiaga ma ua aunoa ma se faamoemoe. E oo foʻi i le laueleele, ua faaleagaina. Ae ua faavaeina e Ieova se malo faalelagi ua mafai ona faaleleia olaga o le faitau miliona o tagata, ma ua  latou maua ai se faamoemoe mautinoa. (1 Timoteo 4:10) O lē fea la e te filifilia?

O nei le taimi e filifili ai, auā e lē o fuafua le Atua e faaauau pea Satani ma lana lalolagi. E leʻi suia le fuafuaga a le Atua mai le amataga, ia avea le lalolagi ma parataiso. Ina ia taunuu lea fuafuaga, e atili sologa lelei i latou e lagolagoina lona Malo, ae e faateleina “puapuaga” o ē e pulea e Satani, seʻia oo ina faaumatia e le Atua. (Mataio 24:3, 7, 8) O lea, afai ua e alaga ma lou loto i le Atua, “Aiseā ea?” ia e utagia o ia e ala i le ave i fale o le feʻau mai le Tusi Paia, o loo iai le faamāfanafanaga ma le faamoemoe. I le taimi nei, e mafai ona suia ou loimata e māfua ona o le faanoanoa, ia avea ma loimata o le fiafia.—Mataio 5:4; Faaaliga 21:3, 4.

[Faaopoopoga i lalo]

[Ata i le itulau 7]

O e fiafia i le taunuuga o pulega a tagata?

[Ē Ana le Ata]

Pepe: © J. B. Russell/Panos Pictures; fafine o loo tagi: © Paul Lowe/Panos Pictures

[Ata i le itulau 8, 9]

O le a toe faavaeina e Iesu le Parataiso ma toe faatutūina ē ua oti