O Loo Manatu Mai le Atua!

O LE auala na taulima ai e le Atua le fouvalega i Etena, ua faaalia ai lona alofa tele mo i tatou uma ma lona naunau mo lo tatou lumanaʻi. Seʻi iloilo faamaoniga o loo taʻua i lalo, e iloa ai le alofa tele mai o le Atua, ma faitau mau o loo taʻua.

● Ua ia foaʻi mai se lalolagi ua tumu i mea matagofie, o meaola uiga ese, ma le laueleele ua fua tele mai.—Galuega 14:17; Roma 1:20.

● E matagofie tino ua ia faia ai i tatou, ua tatou fiafia ai i aso uma i mea mananaia, e pei o taumafa lelei, le matagofie o le goto o le lā, le ʻata a se tamaitiiti, ma le paʻi mai o se tasi e pele iā i tatou.—Salamo 139:14.

● Ua ia aumai taʻiala poto ia mafai ai ona tatou onosaia faafitauli ma omiga.—Salamo 19:7, 8; 119:105; Isaia 48:17, 18.

● Ua ia aumai se faamoemoe matagofie, e aofia ai le faamoemoe o le ola e faavavau i le parataiso i le lalolagi, ma vāai ai i le toe tutū mai o ē pele iā i tatou.—Luka 23:43; Ioane 5:28, 29.

● Ua ia auina mai lona Alo e toʻatasi e maliu mo i tatou ina ia tatou maua le faamoemoe o le ola e faavavau.—Ioane 3:16.

● Ua ia faavaeina le Malo Faa-Mesia i le lagi, ma aumaia faamaoniga e tele, ua toeitiiti ona pulea lea e lea Malo le lalolagi.—Isaia 9:6, 7; Mataio 24:3, 4, 7; Faaaliga 11:15; 12:10.

● Ua ia valaaulia i tatou ia faalatalata atu i le tatalo, ia tatala atu o tatou loto iā te ia, ma e faafofoga mai lava o ia.—Salamo 62:8; 1 Ioane 5:14, 15.

● Ua ia taʻutino mai pea lona alofa ma lona manatu tele mai.—1 Ioane 4:9, 10, 19.