Le Manatu o le Tusi Paia

Pe Moni, Afai e Iai le Alofa, e Lē Leaga le Feusuaʻi a o Leʻi Faaipoipo?

I SE suʻesuʻega na fai, e tusa ma le 90 pasene o talavou na fesiligia, e manatu e lē leaga le feusuaʻi a o leʻi faaipoipo, pe afai e iai le alofa. O le manatu lea ua aliali mai i faasalalauga, ma e lē afāina iā i latou. Ua faaali mai pea i TV ma ata e faapea, o feusuaʻiga, e tusa o se faaaliga lea o le alofa.

O le mea moni, o i latou e mananaʻo e faafiafia le Atua, e lē faalagolago i manatu o le lalolagi, auā ua latou iloa ua taaʻina le lalolagi i manatu o lē o loo pulea, po o le Tiapolo. (1 Ioane 5:19) Ua latou faaeteete foʻi ia lē pulea i o latou faalogona, auā ua “sili le faaʻoleʻole o le loto i mea uma, ma ua matuā leaga lava.” (Ieremia 17:9) Ae o ē e popoto, e latou te faalagolago i le taʻitaʻiga a Lē na faia le tagata, faapea lana Afioga faagaeeina.—Faataoto 3:5, 6; 2 Timoteo 3:16.

O Feusuaʻiga o se Meaalofa Mai le Atua

Ua taʻua i le Iakopo 1:17: “O mea lelei uma e foaʻifuaina mai, atoa ma mea alofa uma e atoatoa ona lelei, mai lugā lava ia, e alu ifo mai le Tamā o malamalama.” O feusuaʻiga a ulugalii faaipoipo, o se tasi lea o meaalofa tāua. (Ruta 1:9; 1 Korinito 7:2, 7) Ua maua ai fanau, ma e aogā ia māfana ai le tane ma le avā, i le tino faapea ma faalogona, i se auala alofa ma fiafia ai. Ua fai mai le tupu o Solomona: “Ia e fiafia i lau avā na fai a o e tauleʻaleʻa. . . . ia malie oe i ona susu i aso uma.”—Faataoto 5:18, 19.

O le mea moni, o le finagalo o Ieova, ia aogā ana meaalofa iā i tatou ma tatou fiafia ai. O le māfuaaga lenā ua ia aumaia ai tulafono ma taʻiala e sili ona lelei, tatou te feola ai. (Salamo 19:7, 8) O Ieova, “o loo aʻoaʻo iā te oe i mea e aogā, o loo taʻitaʻiina oe i le ala e te ui ai.” (Isaia 48:17) O lo tatou Tamā faalelagi, o le alofa lava ia, o lea la, faamata e na te taofia se mea lelei mai iā i tatou?—Salamo 34:10; 37:4; 84:11; 1 Ioane 4:8.

O se Lē Alofa le Feusuaʻi a o Leʻi Faaipoipo

Pe a faaipoipo se alii ma se tamaʻitaʻi, e tusa ua avea i laʻua ma “tino e tasi.” Ua faapena foʻi ona “tino e tasi” ni tagata e leʻi faaipoipoina, pe a la feusuaʻi, ae o lea tulaga, e lē mamā i le silafaga a le Atua. * E lē gata i lea, o se mea e lē alofa. I le ā le itu?—Mareko 10:7-9; 1 Korinito 6:9, 10, 16.

 Ona e manaʻo ia na o le feusuaʻi, ae e lē manaʻo i avega tauave. E lē gata la ina leaga ai faalogona o lē faia, ae e ono maua ai i maʻi, faapea se maʻitaga e leʻi faatalitalia, ma lagona tigā. Ae ua sili ona leaga ona ua solia ai tapulaa mamā a le Atua. O lea, o le faitaaga, ua iloa ai le leai o se manatu po o se alofa, mo le lelei o le isi tagata.

Ae i le Kerisiano, e tusa ua ia solia ai aiā a lona tuagane po o lona tuafafine faaleagaga. (1 Tesalonia 4:3-6) O se faataʻitaʻiga, afai e feusuaʻi ae leʻi faaipoipo se tagata ua taʻu o le auauna a le Atua, o le a lē mamā ai le faapotopotoga Kerisiano. (Eperu 12:15, 16) E lē gata i lea, ua ia aveesea le tulaga mamā o lē na la faitaaga, ma afai e leʻi faia se toʻalua o lea tagata, e tusa ua lē iai o ia i se tulaga mamā i le taimi e faaipoipo ai. Ua faaleagaina ai foʻi le igoa o lona aiga, faapea le aiga o le isi tagata lea ua la faitaaga. Ae ua sili ona la faaalia le lē migao i le Atua, ma ua la faatigā iā te ia ina ua soli ana tulafono ma taʻiala amiotonu. (Salamo 78:40, 41) O le a ‘taui ma sui’ Ieova iā i latou e lē salamō, i a latou amioga leaga uma. (1 Tesalonia 4:6) E lētioa a lapataʻi mai le Tusi Paia: “Inā sosola ese ia outou i le faitaaga.”—1 Korinito 6:18.

Po o fai sau uō ma ua fuafua e faaipoipo? E lelei pe a faaaogā lea avanoa ia ati aʻe ai le feavataʻi ma le fefaatuatuaaʻi. Mafaufau i le mea lenei, pe faigofie i se tamaʻitaʻi ona faatuatuaina se alii e lē mafai ona pulea ia lava? Pe e faigofie i se alii ona alofa faapelepele i se tamaʻitaʻi e tuu faamuamua ona faalogona faapea faalogona o sana uō, ae ua lē migao ai i tapulaa a le Atua?

Ia manatua, o ē teena tapulaa alofa a le Atua, e latou te selesele le mea e lūlū. (Kalatia 6:7) Ua faapea mai le Tusi Paia: “A o lē faitaaga, e agasala ia i lona lava tino.” (1 Korinito 6:18; Faataoto 7:5-27) Ae afai e salamō moni i laʻua na faia le faitaaga, ma taumafai malosi e faalelei le la faiā ma le Atua, faapea le la va, e sau le taimi e mou atu ai lagona o le nofosala. Ae o le a pei e iai se maʻila, talu ai le mea na tupu. O se faataʻitaʻiga, na mafatia lava se tasi ulugalii talavou pe a mafaufau i le taimi na la faia ai le faitaaga. O nisi taimi e oo ai i le tane le manatu: ‘Pe faamata ua māfua ma eseesega ona na lē mamā ona amata le ma faiā?’

E Lē Manatu Faapito le Alofa

O le alofa faaleuō e alofa moni, “e lē amio matagā,” pe e “saʻilia e ia ana lava mea.” (1 Korinito 13:4, 5) Ae e galue mo le lelei ma le fiafia tumau o le isi tagata. O lea alofa, e uunaʻia ai se alii ma se tamaʻitaʻi ia feavataʻi ma faatulaga a la feusuaʻiga e tusa ai ma tapulaa a le Atua, e faatoʻā faatino pe afai ua uma ona faaipoipo.—Eperu 13:4.

O le fefaatuatuaaʻi ma le faamoemoeina lea e faavae ai se aiga fiafia, o le a sili ona tāua i le taimi e fai ai fanau, auā o le finagalo o le Atua ia ola aʻe tamaiti i se siʻomaga e iai le alofa ma le saogalemu. (Efeso 6:1-4) Ua na o ē ua faaipoipoina e iai moni le faatuatuaina e le tasi o le isi. Ua la tautō i o la loto ma luma o tagata, ia fetausiaʻi i taimi e sologa lelei ai, pe leai foʻi, i le olaga atoa.—Roma 7:2, 3.

Ua avea feusuaʻiga alofa a se ulugalii ma mea e atili māfana ai le la faiā. I se faaipoipoga fiafia, o le a lagona ai e le ulugalii le fiafia i feusuaʻiga māfana, e aunoa ma ni lagona tigā faapea e leaga, pe faapea ua la soli le tulafono a le Atua.

[Faaopoopoga i lalo]

PO O E TAUMĀNATU EA I NISI TAIMI?

▪ O le ā le silafaga a le Atua i le feusuaʻi ae leʻi faaipoipo?—1 Korinito 6:9, 10.

▪ Aiseā e leaga ai le faitaaga?—1 Korinito 6:18.

▪ Afai ua uō se teine ma se tama, o ā auala e fefaaaliaʻi ai lo la alofa moni?—1 Korinito 13:4, 5.