Pe a Lē Toe Iai Se Maʻi!

UA TOʻATELE e faamoemoe o le a mapu mai tigā ma maʻi i se olaga i le lagi, pe a mavae le oti. Ae, ua lē ōgatusa lea manatu ma le faamoemoe o loo i le Tusi Paia mo tagata, o le ola lea i se lalolagi parataiso. (Salamo 37:11; 115:16) O le a iai le soifua mālōlōina atoatoa, le fiafia, ma le ola e faavavau.

Aiseā ua tatou mamaʻi ai ma feoti? E faapefea ona tatou maua se lalolagi o le a aunoa ma se maʻi? O loo maua le tali i le Tusi Paia.

▪ Le pogai moni o maʻi Na faia o tatou uluaʻi mātua o Atamu ma Eva, e soifua mālōlōina atoatoa. (Kenese 1:31; Teuteronome 32:4) Na fuafua ia la ola e faavavau i le lalolagi. Na oo maʻi iā i laʻua, ina ua la fouvale ma le loto i le Atua. (Kenese 3:17-19) Ina ua la teena le pule a le Atua, na motusia ai le faiā ma Lē na faia i laʻua, le Puna o lo la ola lelei atoatoa. Na oo le faalētonu i o la tino, ma maua ai loa i maʻi ma le oti, e pei ona fetalai ai le Atua.—Kenese 2:16, 17; 5:5.

Talu le fouvale a Atamu ma Eva, ua na o le lē lelei atoatoa ua  la tuufaasolo i a la fanau. (Roma 5:12) E pei ona taʻua i le mataupu muamua, ua iloa e saienitisi, ua iai le maʻi ma le oti ona o ni faalētonu ua tuufaasolo mai i le tagata. Ina ua mavae le tele o saʻiliʻiliga, ua fai mai nisi saienitisi: “O se mea e lē maʻalofia i tino o tagata, ona o le taimi lava e soifua mai ai, ua amata ai foʻi ona iai i lona tino ni tulaga e faamuta ai lona soifua.”

▪ E lē mafaia e tagata Ua tele mea ua mafaia e le faasaienisi e tetee ai i maʻi. Ae e lē o mafai ona aveesea le pogai o maʻi. Ua lē faateʻia ai ē o suʻesuʻeina le Tusi Paia, ona ua latou iloa upu faagaeeina a le Atua e faapea: “Aua tou te faatuatua i alii, po o le fanau a tagata, e lē o i ai se olataga.”—Salamo 146:3.

Peitaʻi ane, ua faapea mai le Tusi Paia: “O mea e lē mafaia e tagata, e mafaia e le Atua.” (Luka 18:27) E mafai e Ieova le Atua ona aveesea le pogai o maʻi. O le a ia faamālōlō o tatou maʻi uma. (Salamo 103:3) Ua folafola mai lana Afioga faagaeeina: “Faauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava. E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—Faaaliga 21:3, 4.

▪ Le mea e ao ona e fai Na faamatala manino mai e Iesu Keriso le mea e ao ona tatou faia, ina ia maua ai se lumanaʻi e aunoa ma maʻi. Na ia fetalai mai: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”—Ioane 17:3.

E maua i le Tusi Paia le poto e uiga i le Atua, faapea aʻoaʻoga a lona Alo o Iesu. O lea poto, e aofia ai fautuaga aogā e lelei ai lou olaga i le taimi nei. Ae sili i lenā, ua folafola mai e le Atua se lalolagi e aunoa ma ni tigā mo ona tagata tapuaʻi faamaoni. Ioe, ua ofo mai e le Atua se lumanaʻi o le a “lē fai mai foʻi se tasi ua mau ai, Ou te maʻi.”—Isaia 33:24.

[Pusa/Ata i le itulau 11]

Vaaiga Paleni i le Soifua Mālōlōina

Ua faalaeiauina e le Tusi Paia le faatāua o le ola. Ua faaalia e Molimau a Ieova lea uiga i taumafaiga e vaai lelei lo latou soifua mālōlōina. Latou te ʻalofia mea e leaga ai le tino e iai fualaau faasāina ma le tapaa. Ua faatalitalia e le Atua ona tagata tapuaʻi ia fuafua tatau le inu ma le taumafa. (Faataoto 23:20; Tito 2:2, 3) O le faia faapea, faatasi ma le lava o le mālōlō ma faamalositino, o le a puipuia ai, ma tuai ai ona maua i maʻi. O ē o mamaʻi, e ao ona vaai se fomaʻi lelei.

O loo faatāuaina foʻi e le Tusi Paia le fuafua lelei ma le “faautauta.” (Tito 2:12; Filipi 4:5) Ua toʻatele ua mātele i le saʻilia o togafitiga, ae galo ai lo latou tulaga faaleagaga. O nisi ua fai togafitiga e masalomia le aogā, e ono tupu mai ai ni faalētonu. Ae o nisi ua maʻimau a latou tupe ma o latou taimi i togafitiga e lē aogā, ma ono afāina ai.

O le mea moni, e lē maua se soifua atoatoa i lenei taimi. O lea, a o e faatalitalia se lumanaʻi e aunoa ma ni maʻi, o le a aogā le poto ma le faautauta mai le Tusi Paia, ia maua ai le paleni, a o e taumafai mo se soifua mālōlōina lelei.