Le Manatu o le Tusi Paia

Pe e Leaga le Inu ʻAva?

UA FAAPEA mai le Faataoto 20:1 “O le uaina, o le faatauemu lea; o le ʻava, o le faapisapisao lea; o i latou uma o ē faasesēina ai, e lē popoto i latou.” Po o le uiga o lea mau, e leaga le inu ʻava? O le manatu lenā o nisi. Ua latou ʻoto mai i le Tusi Paia mau o loo taʻua ai sesē ua faia, ona o le faaaogā sesē o le ʻava.—Kenese 9:20-25.

E lē gata i lea, e iai iʻuga leaga o le soona inu, e maua ai i maʻi e iai le maʻi ate, o faalavelave mataʻutia, le mativa, leaga ona fai le aiga, ma afāina ai pepe e leʻi fananau mai. Atonu ona o mea mataʻutia e ono tulaʻi mai, na faapea mai ai le The World Book Encyclopedia, “ua aʻoaʻo e le tele o lotu e faapea, e leaga le inu ʻava.” Pe moni la e leaga le tagofia o le ʻava? Po o faasā mai i le Tusi Paia le tagofia o so o se ʻava, e tusa lava pe itiiti?

O le ā le Manatu o le Tusi Paia?

O loo lapataʻi mai le Tusi Paia e tusa o mea leaga e tutupu pe a ova le inu. Ua fautua mai le Efeso 5:18: “Aua foʻi neʻi onā outou i le uaina, o le mea e ulavale ai.” Ua lapataʻi mai foʻi le Faataoto 23:20, 21: “Aua neʻi fai oe ma so latou o ē inu tele i uaina; ma ē ua aai tetele i manu; auā o lē inu tele ma ʻai tele e faamativaina o ia.” Ua faapea mai le Isaia 5:11: “Oi talofa iā te i latou o ē ala usu e matuā saʻili ʻava, ma ua nonofo pea ua oo i le pō, seʻia faavalemalolosi ai i latou i le uaina.”

Ae ua taʻua foʻi i le Tusi Paia, afai e inu fuafua, e maua ai le fiafia, ma e iai lona aogā. O se faataʻitaʻiga, ua taʻua i le Salamo 104:15 e faapea, o se tasi o meaalofa mai le Atua o “le uaina e faafiafia ai loto o tagata.” E tusa ma le Failauga 9:7, o le taui o galuega lelei, o le ‘ʻai lea i lau mea e ʻai ma le olioli, ma ia inu foʻi i lau uaina ma le loto fiafia.’ Na iloaina e Paulo le aogā o le uaina i maʻi, ma na ia fai iā Timoteo: “Aua e te toe inu le vai auli, a ia e inu sina uaina itiiti, ona o lou manava ma lou maʻi e tupu soo.” (1 Timoteo 5:23) O loo taʻua foʻi i  le Tusi Paia le aogā o le ʻava e faagalogalo ai tigā.—Faataoto 31:6, 7.

O lea la, e lē o faasāina le tagofia o le ʻava i le Tusi Paia. Ae ua taʻusalaina le soona inu, ma le onā. O lea, na fautua Paulo i ovasia Kerisiano, ma auauna o faiva, faapea fafine matutua, ia aua neʻi faapologaina i “uaina e tele,” ma na ia fautua iā Timoteo, ia inu “sina uaina itiiti.” (1 Timoteo 3:2, 3, 8; Tito 2:2, 3) Ua faamanatu atu i Kerisiano uma e faapea, o “ē onā,” e lē “fai mo latou tofi le malo o le Atua.”—1 Korinito 6:9, 10.

E ao ona mātauina, o loo taʻua i le Tusi Paia le sootaga o le soona inu, ma le soona ʻai, ma ua taʻu mai, e ao ona ʻalofia uma ia mea. (Teuteronome 21:20) Pe afai na fuafua ina ia tatou lē tagofia le ʻava, o lona uiga la, e leaga foʻi le tagofia o meaʻai, a ea? Peitaʻi ane, o le soona inu ma le soona ʻai, o mea na o loo taʻua e le Tusi Paia e lē tatau, ae lē o le inu ma le taumafa fuafua.

Le Mea na Fai e Iesu

Ua taʻua e Peteru e faapea, na tuu mai e Keriso ‘le faaaʻoaʻo mo tatou, ina ia mulimuli atu i ona tulagāaao. O lē na lē agasala lava.’ (1 Peteru 2:21, 22) O le ā la le manatu o Iesu e tusa o le ʻava? O le vavega muamua lava na faia e Iesu, o le suia lea o le vai e avea ma uaina. E faapeʻī le uaina lea na fai e Iesu? Na faamālō le ‘pule o le tausamaaga’ i le faatoʻāfaiavā, ona o le manaia tele o le uaina. Na fai mai o ia: “E muamua ona au mai e tagata uma o le uaina lelei; pe a tele foʻi le inu i ai o tagata, ona au mai ai lea o le uaina leaga; a ua tuu e oe le uaina lelei, ua oo mai i lenei itu aso.”—Ioane 2:9, 10.

I le taimi o le Paseka, na inu ai uaina, ma na faaaogā e Iesu le uaina ina ua ia faavaeina le Talisuaga Afiafi a le Alii. Na ia avatu le ipu uaina i ona soo ma faapea atu: “Inā inu ia outou uma i ai.” Na silafia e ia ua lata lona maliu, ma na ia faaopoopo atu: “Ou te lē toe inu lava i lenei fua o le vine, seʻia oo i lea aso ou te inu ai le uaina fou faatasi ma outou i le malo o loʻu Tamā.” (Mataio 26:27, 29) Ioe, na iloa e tagata, na inu e Iesu le uaina.—Luka 7:34.

Ae Faapefea i Tatou?

E ui e lē o faasāina e le Tusi Paia le tagofia o le ʻava, ae e lē faapea ai e ao lava ona tatou inu ai. E tele māfuaaga e ao ai ona tatou taumamao ai. O se faataʻitaʻiga, afai sa faigatā i se tagata ona ia pulea le ʻava, e faaeteete la ia aua lava neʻi paʻi i sina ʻava itiiti. Ae o se fafine e maʻitaga, atonu e lē inu ona e faaeteete i lana pepe. Ae o se tagata o loo ave taavale, atonu e lē inu o ia ona e aafia ai lona mafaufau ma gaoioiga, ona afāina ai lea o soifua o isi, faapea ma lona ola.

O se tasi e lē tagofia le ʻava ona o lona lotofuatiaifo, o le a lē manaʻo la se Kerisiano e faatausuai iā te ia. (Roma 14:21) O se mea poto ona lē tagofia le ʻava a o auai i talaʻiga. E ao ona mātauina, i le Tulafono a le Atua iā Isaraelu, sa faasā faitaulaga iā lē ‘inu uaina po o le ʻava,’ a o faia o latou tiute. (Levitiko 10:9) E lē gata i lea, i atunuu e faasāina, pe faatulafonoina, le faaaogāina o le ʻava, e ao i Kerisiano ona usitai i le tulafono.—Roma 13:1.

Ua tuu mai e pule le tagata pe inu pe leai, ma po o le ā foʻi le tele, ae ua fautua mai le Tusi Paia, ia fai fuafua. Ua faapea mai: “Pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.”—1 Korinito 10:31.

PO O E TAUMĀNATU EA I NISI TAIMI?

▪ O le ā le lapataʻiga o loo i le Tusi Paia e tusa o le ʻava?—1 Korinito 6:9, 10.

▪ Pe na inu Iesu i le ʻava?—Luka 7:34.

▪ O ā taʻiala ua aumai mo Kerisiano e tusa o le ʻai ma le inu?—1 Korinito 10:31.