Ua Fesili Mai Talavou . . .

Ae ā pe a fai mai se isi e ma te “eva”?

“Ua fai evaevaga a talavou, seʻi vaai pe maua se feusuaʻiga ma se isi, pe tele nisi e mafai ona latou feusuaʻi.”—Penny. *

“E lē matamumuli tama e talanoa ai. Ua gugutu faapea e iai lana teine ae e feusuaʻi foʻi ma isi teine.”—Eteuati.

“O talavou na fai mai e matou te eva, ua aunoa ma se mamā. Afai e te fai i ai e leai, e toe fai mai foʻi!”—Ida.

E ESEESE lava taʻu e taʻu ai e atunuu le upu o le eva. Fai mai se teine mai Iapani o Akiko, “E iai foʻi le upu e taʻu o le sefre, o lona uiga o se ‘uō e na ona feusuaʻi.’ Pau le māfuaaga e eva ai, o le faia o feusuaʻiga.”

Po o le ā lava le taʻu, ae tutusa lava le uiga, pau le mea e manaʻo ai ia feusuaʻi, ona uma foʻi lea. * O nisi talavou, ua tala tausua ai, ma taʻu faapea e iai se uō e na ona feusuaʻi ae e leai se isi mea i tua atu o lenā. Fai mai se isi teine talavou, “O lea faiga, ua na ona faamalie ai o le manaʻo. A uma loa le mea e te manaʻo i ai, ona uma foʻi lea.”

Talu ai o oe o se Kerisiano, e ao ona e ‘sola ese i le faitaaga.’ * (1 Korinito 6:18) O lou iloa o lea mea, atonu o loo e taumafai ai ia ʻalofia tulaga e teʻi ai ua e solia tulafono a le Atua. Ae, o nisi taimi e tulituliloa lava oe e le faafitauli. Fai mai Cindy: “E tele tama i le aʻoga e fai mai e matou te eva.” E mafai foʻi ona tupu lea tulaga i le galuega. Ua fai mai Makerita, “Na fai mai laʻu pule e ma te eva. O lona fai mai soo na ala ai ona ou musu i laʻu galuega!”

Ae aua e te teʻi pe afai e te lagona le tosina atu i ai. Ua fai mai le Tusi Paia: “E sili le faaʻoleʻole o le loto i mea uma, ma ua matuā leaga lava.” (Ieremia 17:9) Ua moni lea mea, e tusa ai ma le faamatalaga a se teine e igoa ia Lourdes. Fai mai o ia: “Na ou fia alu i le tama  lea na fai mai e ma te eva.” E faapena foʻi le mea na tupu iā Sieni. Na fai mai o ia: “E ese loʻu fia alu i le tama. E leʻi faigofie ona ou fai i ai e leai.” O Eteuati lea na taʻua muamua, na fai mai foʻi e lē faigofie ona tumau i amioga mamā. “Ua tele teine e fai mai e matou te feusuaʻi, ma o se tauiviga lea e sili ona faigatā iā te aʻu o se Kerisiano. E leʻi faigofie ona fai i ai, e lē mafai!”

Afai ua iā te oe lagona e pei o Lourdes, Sieni, ma Eteuati, ae o loo e faamaoni iā Ieova le Atua, e faamālō atu i lou tutumau. Ia faamalosia oe i le iloa, na fesagaʻi foʻi Paulo ma se tauiviga faifai pea ma ona faalogona sesē.—Roma 7:21-24.

O ā ni upu moni autū mai le Tusi Paia e ao ona e manatua pe afai e fai atu se isi e lua te eva?

Le Mea e Sesē ai le Feusuaʻi Faapea

Ua inosia i le Tusi Paia le feusuaʻi ae leʻi faaipoipoina. E matuiā le faitaaga, ma o ē faia, “e lē fai mo latou tofi le malo o le Atua.” (1 Korinito 6:9, 10) Ina ia mafai ona e teena lea faiga, ia e vaai i ai e pei ona silasila i ai Ieova. E tatau ona e filifilia le fai o le amio lelei.

“E maumaututū loʻu talitonuga, o ala o Ieova, o ala sili ia e ola ai.”—Karen, mai Kanata.

“E tele mea o le a e melea pe a e lē amanaʻia tulafono tau amio a Ieova, ae faamalie le tuʻinanau mo sina minute.”—Vivian, mai Mekisikō.

Ia manatua, e pele oe i ou mātua, o oe foʻi o se uō pele i le tele o tagata, ma o se vaega o le faapotopotoga. O le a oo tigā i nei tagata uma pe a e lolo i ou tuʻinanauga!”—Peteru, mai Peretania

Na tusi Paulo: “Ia suʻesuʻe outou pe se ā se mea e fiafia i ai le Alii.” (Efeso 5:10) Afai e iā te oe le silafaga a Ieova e tusa o le faitaaga, o le a e “ʻinoʻino i mea leaga,” e ui ina tosina i ai le tino lē lelei atoatoa.—Salamo 97:10.

▪ Mau e aogā ona faitau: Kenese 39:7-9. Mātau le maumaututū o Iosefa e tetee i faaosoosoga, ma le māfuaaga na mafai ai ona ia teena.

Ia E Mitamita i Mea ua E Talitonu Ai

Ua iai talavou e lē matamumuli e faailoa atu o latou talitonuga. Ua iā te oe o se Kerisiano le avanoa faapitoa e te faaeaina ai le suafa o le Atua e ala i lau amio lelei. Aua neʻi e mā ona o lou maumaututū ia lē feusuaʻi a o leʻi faaipoipo.

“Ia vave ona manino i isi lou maumaututū mo amioga lelei.”—Allen, mai Siamani.

“E leai se mea o le a e mā ai fua pe a ese ou talitonuga.”—Eseta, mai Nigeria.

“E lē taitai amanaʻia lau upu e isi pe afai e te fai i ai, ‘E faasā aʻu e oʻu mātua.’ E ao ona e fai i ai e leai sou manaʻo e eva ma i latou.”—Ianeta, mai Aferika i Saute.

“Na malamalama lelei tama na matou aʻoʻoga i oʻu talitonuga, ma na latou iloa, e maʻimau lo latou taimi e fai mai ai fua.”—Vicky, mai le Iunaite Setete.

O lou maumaututū i ou talitonuga e iloa ai ua faasolo ina avea oe ma Kerisiano taʻumatuaina.—1 Korinito 14:20.

 ▪ Mau e aogā ona faitau: Faataoto 27:11. O le a e iloa ai le auala e mafai ai e lau amio ona lagolago le mataupu autū, o le faapaiaina lea o le suafa o Ieova!

Ia Maumaututū!

E tāua tele le fai i ai, e leai. Ae e iai nisi o le a latou manatu e lē moni lau upu.

“Ua manatu nisi i lau leai, e tusa o se luʻi e taumafai ia mālō ai.”—Lauren, mai Kanata.

“Ia iloa mai i ou laei, lau tautala, tagata e te talanoa i ai, ma ou uiga i isi, le moni o lau leai.”—Joy, mai Nigeria.

“Ia manino, ma ia mautinoa, lau leai.”—Tanielu, mai Ausetalia.

“Ia tutumau! Ina ua fai mai se tama iā te aʻu e ma te eva, na ou fai i ai, ‘Ave ese lou lima ma loʻu tauʻau!’ ma na faapaū i ai laʻu pupula ma ou savali ese loa.”—Ellen, mai Peretania.

“Fai saʻo lava i ai e te lē manaʻo ai, ma e lē taitai ona suia lou mafaufau. E lē aogā ona vaai mai pei e lē moni lau tala!”—Jean, mai Sikotilani.

“Na iai se tama na fai mai pea ma fai mai tala ula. Na ou manatu, e lelei loa ona faasaʻo. Faatoʻā tuu ai i inā lana amio.”—Juanita, mai Mekisikō.

“E ao ona faamanino i ai e lē taitai e faia le mea lea o loo manaʻo ai. Aua e te talia ni meaalofa e avatu e tama iā te oe auā e toe fai mai mulimuli e toe totogi atu.”—Lara, mai Peretania.

O le a fesoasoani Ieova iā te oe pe a faaalia lou maumaututū. O mea na oo iā te ia na faapea mai ai Tavita e uiga iā Ieova: “E te amio alofa oe i lē ua alofa.”—Salamo 18:25.

▪ Mau e aogā ona faitau: 2 Nofoaiga a Tupu 16:9. Ia mātau le naunau mai o Ieova e fesoasoani i ē o loo loto atoa iā te ia.

Ia Faautauta

Ua faapea mai le Tusi Paia: “O lē ua faautauta, na te iloa atu le leaga, ma lafi ai.” (Faataoto 22:3) Ia o lenā! E tusa ai ma le mau, ia faaaogā le utamamao.

“Ia taumamao ma tagata e talanoa i mea faapea.”—Naomi, mai Iapani.

“ʻAlofia aumea ma tulaga e lamatia ai. O se faataʻitaʻiga, ua avea le inumia o le ʻava ma mea ua lolo ai nisi i faaosoosoga.”—Isha, mai Pasili.

“Aua le aveina i so o se isi le numera o lau telefoni po o lou tuatusi.”—Diana, mai Peretania.

 “E leai se mea o le a teʻi ai fua ua e fusi ma sogi atu i isi tamaiti o lau vasega.”—Eseta, mai Nigeria.

“Fai faalelei ou lavalava, ia lē faatosina i isi.”—Heidi, mai Siamani.

“O le māfana o le tou faiā ma ou mātua, ma talanoa e tusa o lea tulaga, e matuā puipuia ai lava oe.”—Akiko, mai Iapani.

Mafaufau i lau tautala, ma lau amio, ma au uō, ma mea o loo e tafao i ai. Ona e fesili ifo lea iā te oe lava, ‘Po o oʻu foliga atu i isi o aʻu e faigofie, e ui e lē o lea loʻu manatu iā te aʻu lava?’

▪ Mau e aogā ona faitau: Kenese 34:1, 2. O le a e iloa ai iʻuga leaga na oo iā Tina ona e sesē tagata na faauō i ai.

Ia manatua, o le eva e pei ona taʻua, e lē o se mataupu e lē amanaʻia e Ieova, ma o le vaaiga foʻi lenā e ao ona iā te oe. Ua faapea mai le Tusi Paia: “O sē faitaaga, po o sē fai amio leaga, . . . e lē maua e i latou se tofi i le malo o Keriso ma le Atua.” (Efeso 5:5) O lou tutumau mo le mea tonu, e maua ai pea lou loto fuatiaifo mamā ma lou fiafia. Ua fai mai se teine e igoa iā Carly e faapea, “E leai se mea o le a faaaogā ai fua oe e faamalie ai tuʻinanauga o se isi. Ia puipui le lua faiā lelei ma Ieova, o se mea sa tele sau taumafaiga ina ia maua!”

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le komepiuta i le www.watchtower.org/ype

[Faaopoopoga i lalo]

MEA E MAFAUFAU I AI

▪ Aiseā ua sesē ai le faia o feusuaʻiga lē mamā, e ui ina faaosoosoina oe e fai?

▪ O le ā lau mea e fai pe a fai atu se isi e lua te feusuaʻi?

[Pusa i le itulau 24]

▪Ua faapea mai le Tusi Paia, o lē faia le faitaaga, “e agasala ia i lona lava tino.” (1 Korinito 6:18) Ua faapefea ona moni lea tulaga? Tusi mai i lalo ni auala ua e manatu e moni ai lea tulaga.

․․․․․

O se fesoasoani: Ina ia e iloa tali le fesili o i luga, tagaʻi i lomiga a Molimau a Ieova, Le Olomatamata, Iuni 15, 2006, itulau 28, palakalafa 14, ma Le Olomatamata, Iuni 15, 2002, itulau 21, palakalafa 17.

[Pusa i le itulau 26]

Faamanatu Atu i Mātua

“Na fai mai se tamaitiiti i laʻu vasega e ma te eva. Sa ou taumafaufau po o le ā le uiga o lana faamatalaga. O le taimi lea e na o le 11 oʻu tausaga.”—Lea.

E oo lava i tamaiti laiti, ua fai i ai faamatalaga i feusuaʻiga. Ae ua leva ona valoia mai e le Tusi Paia le tulaga “faigatā” o le a oo i ai “aso e gata ai,” lea e avea ai tagata ma ē “e lē taofi manaʻo o le tino,” e “manaʻo i mea faafiafia a e leai se manaʻo i le Atua.” (2 Timoteo 3:1, 3, 4) O se tasi o mea e iloa ai le moni o lenei valoaga, o evaevaga a talavou e pei ona talanoaina i le mataupu mo i latou.

Ua matuā ese lava le lalolagi lea ua iai nei ma le tulaga na e soifua aʻe ai. Ae o loo tutusa pea nisi faafitauli. O lea la, na i lo le popolevale i aafiaga leaga ua oo i lau fanau, ia e maumaututū pea e fesoasoani iā i latou e pei ona timaʻia ai e le aposetolo o Paulo Kerisiano i le tusa ma le 2,000 tausaga ua tuanaʻi e faapea: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.” (Efeso 6:11) O le mea moni, o loo matuā taumafai malosi le tele o talavou Kerisiano ia fai le mea lelei, e ui i le tele o aafiaga leaga. O le a faapefea la ona e fesoasoani i lau fanau ina ia latou faia foʻi faapea?

O se tasi auala, o le faaaogā lea o lenei mataupu e amata ai se talanoaga ma lou alo. I le vaega o “mau e aogā ona faitau,” o loo iai manatu e mafaufau loloto i ai. O nisi mau o loo taʻua ai mea na tutupu e faatatau i ē na faia le mea lelei ma faamanuiaga na maua ai, ma ē na faatuatuanaʻi i tulafono a le Atua ma iʻuga leaga na oo i ai. O isi mau, ua maua ai ni taʻiala e aogā i fanau ia malamalama ai i le avanoa matagofie lea ua iā i latou, faapea foʻi ma oe le matua, ina ia ola e tusa ai ma tulafono a le Atua. E lelei pe a fai se avanoa e tou te talatalanoa ai loa i lea mataupu.

O le ola e tusa ai o faatulagaga a le Atua, e lē mafai ona lē iʻu lelei. (Isaia 48:17, 18) Ae afai e faatuatuanaʻi, e na o tigā e oo mai ai. O le faamoemoe o ē o loo lomia le Ala Mai!, ia faamanuia e Ieova au taumafaiga e tāmauina pea tulafono ma taʻiala a le Atua i loto o lau fanau.—Teuteronome 6:6, 7.

[Ata i le itulau 25]

E ao ona faamanino i ai e lē taitai e faia le mea lea o loo manaʻo ai