Fesoasoani i Talavou i o Latou Manaʻoga

UA MANAʻOMIA e talavou se isi e mafai ona latou talanoa atu i ai e tusa o o latou sini, faamoemoega, ma faafitauli, faapea ma ni uō lelei. Ma a o faasolo ina matutua, e manaʻomia ona mautū o latou uiga. A mafai ona fesoasoani mātua i a latou fanau e tusa ai o ia mea, o le a puipuia foʻi i latou mai faigāuō lē lelei, e pei o uō e talanoa ai i le komepiuta.

▪ E fia talanoa talavou i se isi. Atonu e foliga mai e lē fia tautatala e tusa o mea o i o latou loto. Ae o le mea moni, o loo fia talanoa lava iā te oe, lona matua, i mataupu faasamasamanoa, ma mea tāua. O lea la, po o e naunau e talanoa ma faalogologo i lou alo?—Iakopo 1:19.

Aua le avea le pisi o le olaga ma mea e melea ai le avanoa tāua o le talatalanoa ma lau fanau. Afai e faigatā lea tulaga, atonu la ua aogā ona e manatunatu i le fautuaga a le Tusi Paia e faapea: “Ia faamautinoa i mea e sili ona tāua.” (Filipi 1:10; NW) Pe faamata e iai se mea e sili ona tāua na i lo lau fanau?

Aua e te vave manatu faapea e sili i talavou fautuaga mai isi talavou na i lo o latou mātua. I se suʻesuʻega na fai i talavou e toʻa 17,000 mai le vasega 6 e oo i le 12, e taʻu mai po o ai e sili ona latou faalogo i ai, po o mātua, uō, tagata lauiloa, o faasalalauga, po o faiaʻoga, ma ia faailoa mai i le va o le 0 ma le 5. O le 0, o lona uiga e lē faalogo i ai, a o le 5, e faalogo tele i ai. E toeitiiti ʻafa le aofaʻi o tamaiti na faailogaina le 5.

O lea la, e tāua tele lau vaega e faia o se matua, i le faatautaia o sini ma mea e tāua i le olaga o lau fanau. Na fai mai se tasi matua: “Atonu e lē o lagona uma mea e te fai atu ai, ae a e lē talanoa i ai, o le a aunoa ma se mea e latou te lagona.”

▪ E manaʻomia e talavou ni uō. Na fai mai se teine e 15 tausaga: “E lē masani ona iloaina e mātua po o ai o talanona ma lana tama i le komepiuta, pe e lē o fia iloa foʻi.” Ae i lenei vaitaimi, e aogā ona e iloa po o ai uō a lau fanau. Po o e iloa, o ai o tafafao ma lau fanau, i faatasitasiga, po o le komepiuta? Ua faapea mai le Tusi Paia: “O le feoaʻi ma ē amio leaga e leaga ai amio lelei.” (1 Korinito 15:33) Ioe,  e tāua lava lou vaavaai lelei po o ai o faauō i ai lou alo.

E lē lava le puipui o fanau mai aafiaga leaga. E manaʻomia foʻi e fanau ni uō lelei. “O lē latou te feoaʻi ma tagata popoto, e poto lava ia.” (Faataoto 13:20) O lea, e manaʻomia ona aʻoaʻo lau fanau ia iai ni uō lelei, e pei o talavou o loo avea ma faataʻitaʻiga lelei i le auauna i Lē na Faia i latou.—Failauga 12:1.

Ua filifili lelei Ieova le Atua i lē e manaʻo o ia e faauō i ai, ma e ao foʻi ona tatou faataʻitaʻi iā te ia. (Salamo 15:1-5; Efeso 5:1) O lea, o se mea e sili ona tāua e te aʻoaʻo i lau fanau, e ala i au upu ma lau faataʻitaʻiga, o le vaai lea ia maua ni uō lelei.—2 Tesalonia 3:6, 7.

▪ E manaʻomia e talavou ona mautū iā te ia lava. O se vaega tāua a o faasolo ina matua le tamaitiiti, o ona uiga ua mautū, e ese ai o ia mai isi. Ua fai mai se faataoto o le Tusi Paia: “E mafai ona iloa o le tama i lana amio.” (Faataoto 20:11) O se isi au matafaioi o se matua, o le tāmau lea o aʻoaʻoga moni i loto o lau fanau.—Teuteronome 6:6, 7.

O se faataʻitaʻiga: Ua masani ona fai e mātua ofu o a latou fanauiti i aso uma, ona e mananaʻo ia popoto a latou fanau e fai o latou lavalava. Ae ā pe afai ua 30 tausaga o se tagata, a o loo fai lava ona lavalava e ona mātua? Oka se faalētonu! O lea la, ua faaaogā i le Tusi Paia le faataʻitaʻiga e tusa o ofu e faalaeiauina ai i tatou e faapea: “A ua outou oofu i le tagata fou,” ia uiga e pei o Keriso. (Kolose 3:10) E ala i au aʻoaʻoga ma “apoapoaʻiga” e faia i le alofa, o le a mafai ai ona oofu lau fanau i le tagata fou. (Efeso 6:4) A o faasolo la ina matutua ma fai o latou olaga, atonu o le a latou “oofu” foʻi i le “tagata fou,” ona ua latou iloa e manaia moni ma fiafia ai.—Teuteronome 30:19, 20.

Ia e fesili ifo e faapea: ‘Faamata o le ā tonu le manatu o laʻu fanau i tapulaa mai le Afioga a le Atua? E faapefea ona ou aʻoaʻo i latou ina ia latou “nonofo ma le faautauta”?’ (Tito 2:12) Afai e usitai lou alo, ua lē lava ai i lea. Ona o nisi tamaiti, e usitai tele i faatonuga, e lē toe tali mai pe tetee. Peitaʻi o se tamaitiiti e lolo mai i lau faatonuga i le asō, atonu i le lumanaʻi o le a lolo foʻi i le mea e manaʻo ai le lalolagi. O lea la, ia aʻoaʻo lau fanau ia faaaogā o latou “mafaufau lelei.” (Roma 12:1; NW) Aʻoaʻo ia latou iloa le māfuaaga ua faamoemoeina ma aogā ai aʻoaʻoga faavae a le Tusi Paia.—Isaia 48:17, 18.

Ioe, e tele se taumafaiga e fai ina ia maua mea o loo manaʻomia e talavou. Peitaʻi, o le a e maua se taui! Afai ae ola lau fanau e tusa o aʻoaʻoga faavae na e tāmauina i o latou loto, o le a e faapea ifo ma lou loto atoa, “o le fanau, o le tofi lea mai iā Ieova.”—Salamo 127:3.

[Ata i le itulau 30]

Aʻoaʻo lau fanau ia iai ni a latou uō lelei, o ni Kerisiano