O Fea o Agaʻi i ai Lenei Lalolagi?

UA LOA ona valoia e le Tusi Paia le faasolo ina leaga o amioga tatau, auā o loo taʻua ai e faapea: “O ona aso e gata ai e oo mai ai aso faigatā. Auā e avea tagata ma ē alolofa i latou iā i latou, o ē mananaʻo i tupe, . . . o ē lē faalogo i mātua, o ē lē faafetai, o ē amio leaga, o ē lē lotoaiga, . . . o ē faasauā, o ē ʻinoʻino i le amio lelei, o ē faalata, o ē soona fai, o ē ua faafefeteina, o ē ua tele le manaʻo i mea faafiafia a e leai se manaʻo i le Atua; o ē ua peiseaʻī ua toaga i lotu, a o le mana ua i lea mea ua latou teena.”—2 Timoteo 3:1-5.

Atonu e te ioeina le saʻo o lea valoaga e tusa o le tulaga ua iai nei le lalolagi. Ae ua toeitiiti atoa le 2,000 tausaga talu ona fai lea valoaga! O loo faapea le amataga o lea valoaga: “O ona aso e gata ai.” O le ā le uiga o lea faaupuga?

“O Ona Aso e Gata ai” o le Ā?

Ua masani tagata i lea faaupuga, o “aso e gata ai.” I le gagana Peretania, ua tele tusi e faapea o latou ulutala. O se faataʻitaʻiga, o se tusi fou e faatatau i amioga, e taʻu o le The Last Days of Innocence—America at War, 1917-1918, ua manino mai i le upu tomua e faapea, a taʻu le faaupuga “aso e gata ai,” o loo faatatau lea i se vaitaimi patino, o se taimi na matuā faalētonu ai lava amioga.

Ua faapea mai le upu tomua o le tusi: “Na tele atu suiga i le atunuu i le 1914, na i lo se isi lava taimi i le faagasologa mai.” Ua moni lea mea, auā o le 1914 na gāpā ai se taua i le lalolagi aoao, sa leʻi faapea ona iai muamua. Ua taʻua i le tusi e faapea: “O se taua na fetauaʻi ai nuu . . . ae lē na o se vaegaʻau.”  O lea la o le a tatou vāai, o le vaitaimi tonu na tupu ai lea taua, o loo taʻua e le Tusi Paia, o “ona aso e gata ai.”

O le aʻoaʻoga a le Tusi Paia, a o leʻi taunuu le faaumatiaga o le lalolagi, o le a iai se vaitaimi e taʻu o “aso e gata ai.” Ae sa iai muamua se isi lalolagi, lea ua mavae atu, e pei ona taʻua i le Tusi Paia e faapea: “O le mea foi lea sa faaumatia ai le lalolagi tuai ina ua lofia i le vai.” O lē fea lalolagi o loo taʻua na faaumatia muamua, ma o le ā le taimi na tupu ai? O le “lalolagi faalēmataʻu” lea na iai i le taimi o Noa. O le a faapena foʻi ona faaumatia le lalolagi o loo iai nei. Ae o ē auauna i le Atua, o le a faasaoina, e pei foʻi o Noa ma lona aiga.—2 Peteru 2:5; 3:6; Kenese 7:21-24; 1 Ioane 2:17.

Fetalaiga a Iesu e Tusa o le Iʻuga

Na fetalai foʻi Iesu e faatatau i “ona pō o Noa,” ina ua “oo le lolo, ma aveesea i latou uma.” Na faatusaina e Iesu le olaga lea sa iai a o leʻi tupu le Lolo ma ua lalata le faaumatiaga o le lalolagi, i le olaga o le a iai i i le taimi o le “gataaga o le lalolagi.” (Mataio 24:3, 37-39) Ua faaliliuina lea faaupuga e isi faaliliuga o le Tusi Paia o le “iʻuga o le lalolagi,” po o “le iʻuga o taimi.”—The Jerusalem Bible, The New English Bible, and the New International Version.

Na valoia e Iesu le olaga o le a iai a o leʻi faaumatiaina le lalolagi. Na fai mai o ia e tusa o taua: “E sii le taua e le tasi nuu i le tasi nuu, ma le tasi malo i le tasi malo.” Ua mātauina e tagata popoto i talafaasolopito, na tupu lea mea i le 1914. O lea la ua fai mai ai le upu tomua o le tusi lea na taʻua muamua, na avea le 1914 ma amataga o “se taua na fetauaʻi ai atunuu . . . ae lē na o se vaegaʻau.”

Na faapea mai atili Iesu i lana valoaga: “Ona oo mai ai lea o oge, ma mafuiʻe i lea mea ma lea mea. O na mea uma o le amataga ia o puapuaga.” Na ia taʻua foʻi isi mea o le a tutupu, e iai le “tupu tele o le amio leaga.” (Mataio 24:7-14) Ua tatou vaaia le faataunuuina o ia mea i aso nei. Ua matuā moni valoaga a le Tusi Paia e tusa o le tele o le leaga ua oo i ai!

Ae o le a faapeʻī o tatou olaga i lea taimi o amioga leaga? Ia mātau le mea na tusi ai le aposetolo o Paulo i Kerisiano i Roma e tusa o amioga leaga. Na ia faamatala mai “manaʻo [o tagata] e masiasi ai,” ma faapea mai: “Auā o latou fafine foʻi, ua latou fesuiaʻi le tū e tatau ma le tū e lē tatau; e faapea foʻi tane, ua tuua e i latou le tū e tatau i le fafine, ina ua mū i lo latou femanaʻoaʻi; o tane ua fefaiaʻi i latou i mea e masiasi ai.”—Roma 1:26, 27.

Na taʻua e tagata e suʻesuʻe i talafaasolopito e faapea, e ui ina faateteleina le leaga o amio a tagata i lenā taimi, ae “na avea le amio lelei a vaega toʻaitiiti o Kerisiano ma tulaga e tuia ai i latou.” E ao i lea mea ona tatou manatunatu ifo ai iā i tatou e faapea: “Ae faapefea aʻu ma tagata ou te faauō i ai? Po o ese mai i matou, po o matou faia amioga lelei, ma e lē pei o ē faia amioga lē mamā?”—1 Peteru 4:3, 4.

Le Tauiviga o Loo Tatou Faia

Ua aʻoaʻo mai le Tusi Paia, e ui ina tumu le lalolagi i amioga lē mamā, ae ia tatou “lē mataʻuleagaina, ma ē ua sao le amio, o le fanau a le Atua, e lē ponā i totonu o le tupulaga amio faapiʻopiʻo ma le finau vale.” E ao ona tatou matuā ‘taofia le upu  o le ola.’ (Filipi 2:15, 16) Ua aumaia i le upu lea a le Tusi Paia le auala e tumau ai Kerisiano ia mamā mai amioga lē mamā, e ala lea i le mulimulituʻi i aʻoaʻoga a le Tusi Paia, i le iloaina, o tapulaa tau amio o loo iai, o le ala sili lea e ola ai.

Ua matuā taumafai lava Satani, “le atua o le lalolagi nei,” ia ō mai tagata i lana itū. (2 Korinito 4:4) Ua taʻu mai e le Tusi Paia lona “liua o ia e ia [e avea] ma agelu o le malamalama.” O le mea foʻi lenā o loo faia e ana auauna, po o i latou e pei o ia. (2 Korinito 11:14, 15) Ua latou folafola mai le saʻolotoga ma le fiafia, ae ua fai mai le Tusi Paia, “o latou lava ua fai ma pologa o le amio leaga.”—2 Peteru 2:19.

Talitonu mai. O ē lē amanaʻia tapulaa tau amio a le Atua, e iʻu leaga. Na tusi le faisalamo: “E vava mamao le faaolataga ma i latou o ē amio leaga; auā e lē saʻili i latou i [tulafono a le Atua].” (Salamo 119:155; Faataoto 5:22, 23) Pe tatou te talitonu i lenā mea? Afai o lea, ia puipui o tatou mafaufau ma loto mai faamatalaga e uunaʻia ai amioga lē mamā.

Peitaʻi ane, ua manatu sesē le toʻatele e faapea, ‘Ou te lē o solia se tulafono i le mea o loo oʻu faia.’ Ae e lē moni lea mea. Auā ua aumaia e lo tatou Tamā i le lagi taʻiala, ina ia puipuia, ae lē faasāsāina ai i tatou. Ua ia “aʻoaʻo iā te oe i mea e aogā.” O lona finagalo, ia e fiafia, ae lē o le pagatia. Ioe, ua fai mai le Tusi Paia, o le auauna i le Atua, “o loo i ai le mea ua folafolaina mai i la le olaga nei atoa ma le atalī.” O le ola lea e faavavau i le lalolagi fou ua ia folafolaina mai, o le “ola moni” lava lea!—Isaia 48:17, 18; 1 Timoteo 4:8; 6:19.

O lea, ia vaai i le eseesega o le aogā o le tausi i aʻoaʻoga a le Tusi Paia, ma tigā e oo i ē e lē faia faapea. O le fiafia mai o le Atua ona o lo tatou faalogo iā te ia, o le ala sili lea e ola ai! Ua ia folafola mai: “A o lē faalogo mai iā te aʻu, e nofo o ia ma le fifilemu; e filemu o ia, e lē fefe i se mea leaga.”—Faataoto 1:33.

Se Lalolagi e Ola Amio Saʻo

Ua faapea mai le Tusi Paia, pe a mavae atu lenei lalolagi, “ona leai lea o le tagata amio leaga.” Ma ua fai mai foʻi: “O ē amio saʻo, latou te mau i le nuu; ma ē ua sao a latou amio, e faatotoeina ai i latou.” (Salamo 37:10, 11; Faataoto 2:20-22) O le a faamamā ese uma amioga leaga, e aofia ai tagata e teena le ola e tusa o aʻoaʻoga mamā a Lē na Faia i tatou. O le a faasolosolo ona faia se parataiso i le lalolagi aoao e i latou e alolofa i le Atua, ia pei o le parataiso lea na tuu i ai e le Atua le uluaʻi tagata.—Kenese 2:7-9.

Seʻi mafaufau ane la i le manaia o le ola ai i se lalolagi mamā, o se parataiso. O le a iai ma le faitau piliona o ē toe tutū mai le oti. Ia olioli i folafolaga a le Atua e faapea: “E fai lava le nuu mo tagata amiotonu, e nonofo ai pea i latou.” “E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—Salamo 37:29; Faaaliga 21:3, 4.

[Faamatalaga faaopoopo i le itulau 17]

Ina ua mavae le lalolagi tuai, na faasaoina tagata sa matataʻu i le Atua

[Ata i le itulau 18]

Pe a mavae atu lenei lalolagi, ona iai lea o se lalolagi parataiso