O Lotu—O le ā so Latou Lumanaʻi?

O LE ā ua tupu i lotu e taʻu o lotu “Kerisiano?” I le nuu o loo e alaala ai, o tupu olaola, po o fāi ifo? Atonu ua e faalogo i nisi taimi i tala mai Aferika, ma Europa i Sasaʻe, ma le Iunaite Setete e faapea, ua toe faaolaola ma tupu tele, ma ua lolofi atu tagata i falesā. Ae ua maua foʻi tala mai isi vaega o le lalolagi, aemaise lava Europa i Sisifo, ua tapunia nisi falesā ona ua toʻalaiti nisi ʻaulotu, ma ua tele le faalēano o tagata i lotu.

Talu ai lea tulaga, ua sui ai faiga a le tele o lotu i le auala e fai ai a latou lotu. O nisi ua fai mai o latou e “lē faamasinosino,” pe e taʻu mai ai, e talia e le Atua amioga uma. Ua tele lava ina ofoina mai e lotu faiga faafiafia, ma isi mea faatosina, ae faalēano i aʻoaʻoga mai le Afioga a le Atua. O nisi tagata ua manatu i ia mea, e tusa o mea e faafetaui atu i le olaga lea ua iai nei, ae ua tele tagata o loo saʻiliʻili moni o loo manatu, po ua lē sē ese ai la mai le galuega lea na tuuina mai e Iesu. Seʻi o tatou tagaʻi la i faiga o loo faia e lotu i tausaga talu ai nei.