Le Manatu o le Tusi Paia

O le ā le Uiga o le Avea ma Kerisiano?

“I LO matou atunuu, a taʻu oe o se Kerisiano, o lona uiga a itiiti mai, e faatasi ona e alu i le lotu i le vaiaso,” o le faamatalaga lea a se alii mai Aferika e suafa iā Kinsley. Ae na faapea mai Raad, o se tama mai Sasaʻe Tutotonu: “O manatu o tagata i lo matou nuu, o Kerisiano o ni tagata e mulimuli i tū a atunuu i Sisifo, i le faiga o o latou laʻei, i a latou aso faamanatu, ma le auala e amioaʻi e tusa ai ma tamaʻitaʻi.”

Po o lona uiga ea, ua taʻu se tasi o se Kerisiano pe afai e lotu, ma tausi i ni tū ma masani faapitoa? Pe lē o le uiga ea o le upu “Kerisiano,” e faatatau lea i se olaga e faaalia ai uiga ma amio, e pei ona sa talaʻi ma soifua ai Iesu? Na faapeʻī le Faa-Kerisiano ina ua amata mai?

Faa-Kerisiano Anamua—Le Ala e Ola Ai

Na fetalai Iesu i ona soo: “O aʻu uō outou, pe afai tou te faia mea uma lava ou te fai atu ai iā te outou.” (Ioane 15:14) Talu ai na aafia vala uma o olaga o soo o Iesu i ana aʻoaʻoga, na latou taʻua muamua ai le latou tapuaʻiga, o “le Ala.” (Galuega 9:2) E leʻi leva, ae “igoa foʻi le ʻau soo o Kerisiano.” (Galuega 11:26) Na faailoa mai i lea igoa fou, latou te talitonu, o Iesu o le Alo o le Atua, o lē na faailoa maia i tagata le finagalo o lona Tamā i le lagi. O lea la, na latou ola ai i se olaga e ese mai olaga o tagata o lenā taimi.

Na uunaʻia e aʻoaʻoga a Keriso ona soo ia mulimuli i le Tusi Paia, ma ʻalofia ai le “faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagaʻi,  o le femisaʻi, o le losilosi vale, o le lotoa, o le finau vale, . . . o le onāga, o le poula, ma mea faapenā.” (Kalatia 5:19-21; Efeso 4:17-24) Na faamanatu e Paulo i Kerisiano i Korinito, o mea na sa faia e nisi o i latou. Ona ia faapea atu lea: “A ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso.”—1 Korinito 6:9-11.

Ua taʻua e E. W. Barnes i lana tusi i le tuputupu aʻe o le Faa-Kerisiano (The Rise of Christianity) e faapea: “I uluaʻi tusitusiga e tusa o le Faa-Kerisiano, ua iloa mai ai, o le Faa-Kerisiano lava ia e lelei ma tausisi i tulafono. O le faanaunauga na iai i Kerisiano, ia avea o ni tagatānuu e tonu ma faamaoni. Na latou teena faiga leaga faapaupau. I aso fai soo, na latou taumafai ia nonofo filemu ma o latou tuaoi, ma avea o ni uō e faatuatuaina. Na aʻoaʻoina i latou ia lē gaoiā, ia toʻaʻaga ma ola mamā. E ui ina tele le piʻopiʻo ma le amioleaga na iai, ae afai na ola e tusa o a latou aʻoaʻoga, sa faamaoni ai ma faimea saʻo. E amio mamā i le va o itupā, auā na latou faatāua le faaipoipoga, faapea le olaga i aiga.” O tulaga na sa iai le olaga o se Kerisiano anamua.

O se isi vala na iloa ai Kerisiano anamua, o le maelega i le galuega talaʻi. Na faatonuina e Iesu ona soo: “Ia outou ō atu e fai nuu uma lava ma soo.” (Mataio 28:19, 20) Ua fai mai Jean Bernardi, o se polofesa i le Iunivesite o Sorbonne i Pale, i Falani, e faapea: “Sa tatau ona ō atu [Kerisiano] i vaipanoa uma ma talanoa i tagata uma, i ala tetele ma aai, i nofoaga faitele ma aiga. E tusa pe talia i latou pe leai. Ia ō atu foʻi i ē matitiva ma ē maumea, o ē e lē o faamuamua mea faitino. . . . Sa tatau ona latou ō atu i auala, ma vaa, ma tuluʻiga uma o le lalolagi.”

Le Faa-Kerisiano Moni i Aso Nei

E ao ona mātaulia Kerisiano i aso nei ona e ese mai o latou olaga, e pei ona iai i le uluaʻi senituri. O lea, ua taumafai ai Molimau a Ieova ia piiama i aʻoaʻoga na faavae e uluaʻi Kerisiano, ma ua mātauina ai e isi a latou taumafaiga ia ola e tusa ai ma aʻoaʻoga a le Tusi Paia.

O se faataʻitaʻiga, ua taʻua e le lomifefiloi New Catholic Encyclopedia e faapea, ua lauiloa Molimau a Ieova, o “se vaega e sili ona amio lelei i le lalolagi aoao.” Ua fai mai le pepa o le Deseret News a le aai o Salt Lake, i Utah, e tusa o Molimau a Ieova e faapea, ua latou “aʻoaʻo aiga ia māfana ma ia avea o ni tagatānuu e aogā ma faamaoni.” Ua fai mai atili lea pepa: “E matuā mulimuli ona tagata i amioga lelei. Ua latou talitonu, o le ulaula, le soona inu, le faaaogā o fualaau faasāina, le pelē tupe, ma amioga lē mamā ma faiga faatauatane, e afāina ai le faiā a le tagata ma le Atua. Ua latou aʻoaʻoina le faamaoni, ma ia galue lelei.”

E matuā tāua foʻi i Molimau le latou matafaioi o le talaʻi ma le maelega. Ua faapea mai se lomifefiloi Katoliko e tusa o lea tulaga: “O le matafaioi autū a Molimau uma . . . o le molimau lea iā Ieova e ala i le faalauiloa o lona Malo lea ua lata mai. . . . Ina ia avea ma Molimau moni, e ao ona talaʻi atu ma le uigā.”

Ua manino la, o le Faa-Kerisiano moni, e lē o le auai i se lotu o loo faapea mai e Kerisiano, auā na valoia e Iesu le tupu tele o Kerisiano faatagāfai. (Mataio 7:22, 23) Ua valaaulia oe e Molimau a Ieova, ia e saʻili i aʻoaʻoga a Iesu ma ia faatinoina i lou olaga. O le uiga tonu lenā o le avea ma Kerisiano. Na fetalai Iesu: “Afai ua outou iloa ia mea, amuia outou pe a outou faia.”—Ioane 13:17.

PO O E TAUMĀNATU EA I NISI TAIMI?

▪ O ai na taʻu e Iesu, o ana uō?—Ioane 15:14.

▪ O ā amioga e ao ona ʻalofia e se Kerisiano moni?—Kalatia 5:19-21.

▪ O le ā le galuega e ao ona fai e Kerisiano moni?—Mataio 28:19, 20.

[Ata i le itulau 11]

O Kerisiano moni, e talaʻi maelega, e pei foʻi o Kerisiano moni i senituri ua mavae