O se Papa Uigaese

TUSIA E LE TUSITALA O LE ALA MAI! I KANATA

I LE taufaasiʻusiʻuga o le penisula o Gaspé, i le fagaloa o St. Lawrence, i le sami lanumoana ʻilaʻila o le Vasa Atalani, o loo tū matilatila ai se papa telē, e taʻu o le Papa o Percé. E tusa lona telē ma le 1,420 futu (430 mita), 300 futu (90 mita) le lautele, ma e silia ma le 290 futu (88 mita) le maualuga. Ua loa senituri o faaaogā e tautai ma tagata e uliina vaa, e fua i ai a latou malaga. Ua fatuina ni solo ma tusia ni ata e tusa o lea papa telē. Ua fai mai se tasi lomifefiloi e tusa o lea papa e faapea: “e uiga ese, toe manaia.”

Sa masani ona feʻaʻei tagata o le nuu i le papa, e ao mai fua o manufelelei o loo ofaga ai. Ae i le 1985, na avea ai e le malo o Quebec lea papa, faapea le motu o Bonaventure o loo lata ane, ma nofoaga faasao auā manufelelei. O le motu o Bonaventure, e lona lua i le lalolagi i le tele o manufelelei e taʻu o le northern gannet, o loo ofaga ma fanafanau ai.

Ua fai mai nisi, o lea papa sa soofaatasi ma le motu tele, ma e fā ni pu e pei o ni faamalama na iai. I le taimi nei, ua na o le tasi lea o loo iai, i le pito e lata i le vasa, ma e ova ma le 90 futu (30 mita) lona lautele. I le taimi e pē ai le tai, e aliaʻe se motu oneone e sosoo ai le papa ma le motu tele. E fā itula e pē ai le tai ma e mafai e se tagata malosi ona sopo atu i le oneone e tau i le papa, ona toe liliu lea ma asa le sami, pe ā ma le 15 minute, agaʻi i le pu o le papa.

Ae e ao lava ona alu ma le faaeteete. Ona na fai mai se tagata matamata na ia āsaina, na iai ni fasipapa na toʻulu ifo: “E va i minute le toʻulu ifo o fasi papa, pei ua e faalogo i ni tamaʻi pomu o pāpā. Ae a toʻulu fasipapa i luga o isi fasipapa, pei ua e faalogo ua gapā se fana.”

E pei ona taʻua e le tele o tagata maimoa, e uigaese le matagofie o le Papa o Percé. Ae ua lē na o le pau lenā o mea matagofie o loo iai i lo tatou lalolagi. E tele naʻuā mea mananaia o loo iai. A e maimoa i ai, atonu ua uunaʻia ai foʻi oe ia e ‘tulaʻi mai, ma mafaufau i vavega a le Atua.’—Iopu 37:14.

[Ē Ana le Ata i le itulau 15]

© Mike Grandmaison Photography