Pe e Iai Moni se Satani?
Le Manatu o le Tusi Paia
Pe e Iai Moni se Satani?
UA FAI mai nisi tagata popoto, e leai se Satani, ae ua na o se mea i manatu o tagata. O se talitonuga lea ua leva ona iai. O se alii fatusolo i le senituri lona 19, o Charles-Pierre Baudelaire, na tusi e faapea: “O le togafiti autū a le Tiapolo, ia faasesē i tatou e faapea e leai se Tiapolo.”
Ae, pe e iai moni se Satani? Afai o iai, o fea e sau ai? Po o ia ea le mana lē vaaia lea o loo māfua ai faalavelave o le lalolagi? E mafai faapefea ona tatou ʻaloese mai ana taaʻiga leaga?
Le Faamatalaga a le Tusi Paia
Ua fai mai le Tusi Paia, o loo iai moni lava Satani, i le nofoaga lē vaaia o agaga. (Iopu 1:6) Ua faamatala mai foʻi ona uiga ma ana gaoioiga lē alofa ma le sauā. (Iopu 1:13-19; 2:7, 8; 2 Timoteo 2:26) O loo taʻua foʻi i le Tusi Paia talanoaga a le Atua ma Satani, faapea ma talanoaga a Iesu ma Satani.—Iopu 1:7-12; Mataio 4:1-11.
Na faapefea ona iai lea agaga leaga? A o leʻi taitai ona faia le tagata, na faia e le Atua lona Alo “ulumatua,” lea na faaigoa iā Iesu. (Kolose 1:15) Na faia agelu, po o isi ‘atalii o le Atua,’ i se taimi mulimuli ane. (Iopu 38:4-7) Na faia i latou uma, e atoatoa ona lelei ma amiotonu. Ae na iʻu ina avea se tasi o na agelu, ma Satani.
O Satani, e lē o lona igoa lenā ina ua
faia o ia i le amataga. Ae o se igoa e taʻu mai ai lona uiga, o ia o Le Fili, o Lē Tautuuaʻi.” O lona filifili ia ola tetee i le Atua, na faaigoa ai o ia o Satani.Na tupu le uiga faasausili ma le fia faatavā o lenei agaga i le Atua. Na manaʻo o ia ia tapuaʻi atu tagata iā te ia. A o iai Iesu, le Alo ulumatua o le Atua i le lalolagi, na taumafai Satani ina ia “faapaʻū ma ifo” atu Iesu iā te ia.—Mataio 4:9.
O Satani, e “leʻi tumau lava ia i le upu moni.” (Ioane 8:44) E tusa ua fai mai o ia, o le Atua e pepelo, ae semanū o ia e pepelo. Na fai o ia iā Eva, o le a pei o ia o le Atua, ae o le mea moni, o ia lea na fia avea ma Atua, ma na oo ina taunuu lona tuʻinanauga talu ai ana faiga taufaasesē. Na manatu Eva, e sili Satani i le Atua, ma talu ai lona faalogo iā Satani, na avea ai Satani ma ona atua.—Kenese 3:1-7.
Talu ai lona faatupuina o le tetee, ua avea ai loa lenei agelu sa muaʻi faamoemoeina ma Satani, po o le fili o le Atua ma tagata. Na taʻu foʻi o ia o le “Tiapolo,” o lona uiga, o “Lē Taufaaleaga.” Mulimuli ane, na tataʻi ese e lenei agelu, ua taulamua i le agasala, isi agelu ina ia latou tetee atu foʻi i le Atua ma ʻau atu iā te ia. (Kenese 6:1, 2; 1 Peteru 3:19, 20) O agelu ia na atili ai ona leaga le lalolagi. Talu ai lo latou mulimuli i uiga leaga o Satani, ‘na tumu ai le lalolagi i le sauā.’—Kenese 6:11; Mataio 12:24.
E Faapeʻī le Malosi o Taaʻiga a Satani?
O se tagata gaoi, e na te taumafai e soloi ese uma ona tulagālima mai le fale na gaoi ai, ina ia lē maua o ia e leoleo. Ae a taunuu atu leoleo i le fale, ona latou iloa lea mai faamaoniga, sa iai se gaoi. Ua faapena foʻi ona taumafai Satani, le uluaʻi “fasioti tagata,” ia aua neʻi iloa, o ia na faia lea mea. (Ioane 8:44; Eperu 2:14) I le talanoaga a Satani ma Eva, na ia taumafai ai e lafi i tua o se gata. O le mea foʻi lenā o loo ia faia i le taimi nei. Ua ia “faatauasoina manatu o i latou o ē lē faatuatua,” ia aua neʻi iloa lona mana tele.—2 Korinito 4:4.
Ae na faailoa mai e Iesu, o Satani le pule o lenei lalolagi leaga. Na ia taʻu o ia o “le alii o lenei lalolagi.” (Ioane 12:31; 16:11) Na faapea mai Ioane: “O le lalolagi uma o loo nofo toʻilalo i loo leaga.” (1 Ioane 5:19) E poto tele Satani e faaaogā “le tuʻinanau o le tino, ma le tuʻinanau o mata, ma le faalialia o lenei olaga,” e ‘faasesē ai le lalolagi uma.’ (1 Ioane 2:16; Faaaliga 12:9) O ia lea o loo mulimuli ai le tele o tagata.
O ē mulimuli iā Satani, ua pei lava i latou o Eva, ona ua latou fai Satani ma o latou atua, ma avea ai o ia ma “atua o le lalolagi nei.” (2 Korinito 4:4) O āuga o lana pule, e aofia ai le faagutugutulua ma le pepelo, o taua, le faatigāina ma le faaumatia o tagata, le solitulafono, le manaʻo tele, ma le amio piʻopiʻo.
Le Auala e ʻAlofia ai Lana Taaʻiga
Ua lapataʻi mai le Tusi Paia: “Ia outou faautauta, ia outou mataala.” Aiseā? “Ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia.” (1 Peteru 5:8) Ua mautinoa mai i lenei mau, e na o ē e lē faautauta, e lē mataala, o le a mafai ona ‘ʻolegia e Satani.’—2 Korinito 2:11.
E tāua ona tatou malamalama, e iai moni lava Satani, ma ia tuu atu i le Atua e ‘faatumauina ma faamalosia’ i tatou. Ona mafai ai lea ona tatou “tetee atu iā [Satani],” a ia ʻau ma le Atua.—1 Peteru 5:9, 10.
PO O E TAUMĀNATU EA I NISI TAIMI?
▪ O fea e sau ai Satani?—Iopu 38:4-7; Ioane 8:44.
▪ O le ā le telē ua aafia ai le lalolagi ona o Satani?—Ioane 12:31; 1 Ioane 5:19; Faaaliga 12:9.
▪ E faapefea ona tatou puipui i tatou mai togafiti leaga a Satani?—1 Peteru 5:8-10.
[Ata i le itulau 27]
Po o Satani le mana lē vaaia lea o loo māfua ai faalavelave o le lalolagi?