Ua Fesili Mai Talavou . . .

Tauatane—E faapefea Ona Ou Teena?

“A o 12 oʻu tausaga, na iai se teine i le aʻoga na ou fiafia i ai. Na ou popole ona sa ou faapea, ai aʻu e fia alu i isi teine.”—Ana. *

“A o oʻu talavou, sa ou tauivi ai ma le uiga o le fiafia i isi tama. Na ou iloaina, e lē tatau ona iā te aʻu ia lagona.” —Olefa.

“Pe faatasi pe faalua ona ma feākisi ma laʻu uō teine. Ae talu ai ou te fiafia foʻi i tama, sa ou taumafaufau, po o aʻu e fiafia i tama toe fiafia i teine.”—Sara.

O UIGA faalēano lea ua iai i aso nei, ua oo ai ina fefaiaʻi teine ma teine, ma e faapena foʻi tama. Fai mai Becky, o se teine e 15 tausaga: “Ua tele teine i laʻu aʻoga a lē ō i teine, e ō i tama ma teine, po o loo saʻili po o lē fea e fiafia i ai.” E faapena foʻi le tulaga i le aʻoga a Christa, o se teine e 18 tausaga. Fai mai o ia: “E toʻalua ni teine i laʻu vasega na fai mai e fia feusuaʻi ma aʻu. Na tusi mai se tasi o i laʻua ma fai mai, po o oʻu fia iloa pe faapeʻī le feusuaʻi ma se teine.”

Ua matuā lē mamā tagata i nei faiga, ma atonu ua e manatu ai, ‘Ailoga e iai se āfaina o ia faiga? Ae ā pe afai ou te fia alu i se tasi e ma te itupā faatasi? Po o lona uiga ea, o aʻu e faatauatane?’

O le ā le Silafaga a le Atua?

O loo tele tagata i aso nei, faapea ma nisi faifeʻau, e lē o manatu e leaga le faatauatane. Ae o loo manino lava le Tusi Paia. O loo taʻua ai le faia e Ieova le Atua o le tane ma le fafine, ma o lana fuafuaga, ua na o le va o le tane ma le avā e tatau ona faamalieina ai manaʻoga tau feusuaʻiga. (Kenese 1:27, 28; 2:24) Ua lē o se mea la e ofo ai le inosia e le Tusi Paia o faiga faatauatane.—Roma 1:26, 27.

Ae e toʻatele ua fai mai ua lē toe aogā le Tusi Paia. Ua fai mai Megan, e 14 ona tausaga,  “Ua lē o toe aogā i nei aso nisi o mea o loo taʻua i le Tusi Paia.” Aiseā ua vave ai le tali mai faapea o tagata? Talu ai, ona ua latou feteenaʻi ma mea o loo taʻua i le Tusi Paia. Ua latou teena le Afioga a le Atua ona ua ese mea o loo aʻoaʻoina ai, ma mea o loo latou mananaʻo ai. Ae ua lē tonu o latou manatu, ma ua fautuaina i tatou e le Tusi Paia ia aua neʻi o tatou manatu faapea! Auā o loo uunaʻia i tatou e Ieova le Atua i lana Afioga, ia manatua, o ana poloaʻiga e tatou te lelei ai. (Isaia 48:17, 18) Ua talafeagai lea manatu, auā o ai e sili lona silafia o i tatou na i lo Lē na Faia i tatou?

Atonu ua tele lagona eseese o loo iā te oe ona o oe o se talavou. Ae ā pe afai o loo e tosina i se isi talavou e lua te itupā faatasi? Po o lona uiga la, o oe e tauatane? E leai. Ae aua neʻi galo, o lenā ua e “matua,” ma o le taimi tonu lea o le tauosoosoga o lou talavou, i lagona tau feusuaʻiga. (1 Korinito 7:36) Atonu e iai se taimi e te fiafia ai i se isi e te lua itupā faatasi. Ae e lē faapea ai o oe e tauatane. O le a sau le taimi e mou atu ai ia lagona e tusa ai ma suʻesuʻega. Ae atonu e te taumānatu pea, ‘Na faapefea ona tutupu aʻe ia lagona iā te aʻu?’

Ua iai nisi ua faapea mai o lagona ia na fanau mai ma le tagata. Ae ua faapea mai nisi, o se amio na iloa mai isi. E lē talanoaina lea tulaga i lenei mataupu. Auā e lē faigofie ona maua se tali e tusa ai o lea vala. Pau o lea, o le faatauatane, e lē o se mea e faigofie ona iloa pe faapefea ona amata, e pei foʻi o isi amioga.

Ae po o le ā lava lona amataga, o le mea tāua e ao ona e iloa, e inosia e le Tusi Paia le faatauatane. O lea la, o se tagata o loo iai ia faalogona, ua iai se mea e ao ona ia taumafai i ai, o lona filifili lea ia aua neʻi amio e tusa ai ma ia faalogona. O se faataʻitaʻiga: Seʻi manatu i se tagata e masani ma le “lotoa.” (Faataoto 29:22) Atonu o lana masani le māitaita. Ae ina ua ia suʻesuʻe i le Tusi Paia, ona ia iloa ai lea, e tatau ona pulea lona loto. Po o lona uiga la, e lē toe ita lava o ia? E leai. Talu ai ua ia iloa le mea o loo taʻua i le Tusi Paia e tusa o le lē pulea o le ita, ua ia lē lolo ai i le ita. O le tulaga foʻi lenā o se tagata e tosina i se tasi o lana itupā, ae ua ia iloa le mea o loo fai mai ai le Tusi Paia e tusa o le faatauatane. Atonu e iai taimi e oo ai iā te ia ia lagona sesē. Ae afai e pipii i le fautuaga a le Tusi Paia, o le a mafai ona ia teena.

Atonu e malosi lava lou faalogona i se tasi o lau lava itupā. Ae ia e mautinoa, po o le ā lava le malolosi o ia faalogona, e mafai ona e manumalo ai. (1 Korinito 9:27; Efeso 4:22-24) O oe lava e pulea lea mea. (Mataio 7:13, 14; Roma 12:1, 2) E ui ina fai mai nisi e lē mafai ae e mafai ona e pulea ou faalogona, ma teena le faatinoina.

Teena Amioga Sesē

E faapefea ona mataala ia lē auai i faiga faatauatane?

▪ Muamua Ia lafo ou popolega uma iā Ieova e ala i le tatalo, ma ia e mautinoa, e ‘manatu mai o ia iā te oe.’ (1 Peteru 5:7; Salamo 55:22) O le a faamalosia oe e Ieova i le foaʻi mai o le filemu lea ‘e silisili i mea uma.’ E mafai ona ‘leoleoina ai lou loto ma lou mafaufau’ ma maua ai le “matuā tele o le mana” e tetee ai le faatinoina o lagona sesē. (Filipi 4:7; 2 Korinito 4:7) Ua fai mai Sara, o sē na tauivi ma ia lagona: “O taimi uma e oo mai ai ia manatu, ou te tatalo ai, ma e faamalosi mai Ieova iā te aʻu. Ana lē seanoa lana fesoasoani, semanū e lē mafai ona ou manumalo. Ua avea le tatalo ma vaafaaola iā te aʻu!”—Salamo 94:18, 19; Efeso 3:20.

▪ Lona Lua Ia e mafaufau i ni manatu lelei faaleagaga. (Filipi 4:8) Faitau le Tusi Paia i aso uma. Aua e te manatu māmā i le malosi o le mana o le Tusi Paia e puipuia ai lou mafaufau ma lou loto, ma lelei ai. (Eperu 4:12) Ua fai mai se alii talavou, o Jason: “Ua aogā tele le Tusi Paia iā te aʻu, faatasi ai ma mau e pei o le 1 Korinito 6:9, 10 ma le Efeso 5:3—auā o taimi uma e oo mai ai ia te aʻu ni faalogona sesē, ou te faitau i ai.”

 ▪ Lona Tolu Ia taumamao mai le faitau ma matamata i tusi ma ata leaga, ma isi mea e uunaʻia ai nei faiga, ona e tutupu aʻe ai mafaufauga sesē. * (Salamo 119:37; Kolose 3:5, 6) Ua iai ata o loo uunaʻia mai ai le manatu faapea, o le faatauatane e ui ina ese, ae e lē afāina. O lea la, ua fai mai Ana: “Na aafia laʻu vaaiga ona o mafaufauga sesē o le lalolagi, ma tupu tele ai loʻu fenuminumiaʻi. Ae o lea ua ou taumamao i so o se mea e uunaʻi maia ia faiga.”—Faataoto 13:20.

▪ Lona Fā Ia faamatala atu ou lagona i se isi e te maufaatuatuaina. (Faataoto 23:26; 31:26; 2 Timoteo 1:1, 2; 3:10) O se alii e igoa iā Olefa, na oo atu i se toeaina mo se fesoasoani, ma na fai mai o ia: “E ese le aogā o lana fautuaga. Maʻimau pe ana vave ona ou alu e talanoa iā te ia.”

Aua le Faavaivai!

E mautinoa o le a iai nisi e faapea atu, e aua le popole fua, ae ia e talia le lagona ua oo iā te oe. Ae ua fai mai le Tusi Paia, e mafai ona e manumalo ai! O loo taʻua i le Tusi Paia ni Kerisiano anamua sa faatauatane, ae na lē toe faia. (1 Korinito 6:9-11) E mafai foʻi ona e malo ai, e tusa pe na o se tauiviga o loo faia i lou loto.

Afai o loo faatalatala pea ia lagona iā te oe, aua neʻi e faavaivai pe e te mafaufau ua e lē mafaia. (Eperu 12:12, 13) O i tatou uma lava o loo tauivi ma ni faalogona sesē. (Roma 3:23; 7:21-23) Afai e te teena le faatinoina o lagona sesē, e sau le taimi o le a mou atu ai. (Kolose 3:5-8) Ae o le mea sili lava, ia e faalagolago iā Ieova. E alofa o ia iā te oe ma e silafia e ia le mea e te maua ai le fiafia. (Isaia 41:10) Ioe, “Ia e faatuatua iā Ieova, ma e faia amio lelei; . . . , ona foaʻiina lea e ia iā te oe o mea e manaʻo i ai lou loto.”—Salamo 37:3, 4.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le komepiuta i le www.watchtower.org/ype

[Faaopoopoga i lalo]

MEA E MAFAUFAU I AI

▪ Aiseā e inosia ai e le Atua le faatauatane?

▪ O le ā e fai pe afai o loo e tauivi ma lou tosina i se isi e lua te itupā faatasi?

▪ O ai e mafai ona e talanoa i ai pe afai o loo e tauivi ma lagona faatauatane?

[Ata i le itulau 14]

Talanoa i se Kerisiano taʻumatuaina mo se fesoasoani