Ia Tuu i le Atua e na te Taʻitaʻia Oe “i le Ola Moni”

O LE maufaatuatuaina, o se uiga e tāua tele i so o se taʻiala. Ua mautinoa e i latou e malamalama lelei iā Ieova, Lē na tusia le Tusi Paia, o ia e sili ona maufaatuatuaina. Auā, “e lē mafai ona tala pepelo” o ia. (Tito 1:2; 2 Timoteo 3:16) O Iosua o se tagata e mataʻu i le Atua, ma na ia taʻitaʻia Isaraelu i le Nuu o le Folafolaga, o lea, na ia iloa lelei le maufaatuatuaina o Ieova. I lana lauga iā Isaraelu, na ia faapea atu: “Ua outou iloa ma o outou loto atoa, ma o outou agaga atoa, e leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou; ua taunuu uma iā te outou, ua lē iʻuvale se upu e tasi.”—Iosua 23:14.

Ua tele isi valoaga o le Tusi Paia ua taunuu, talu mai le taimi o Iosua. O lea, ona o le moni o nei valoaga, ua aumaia ai iā i tatou se faavae mautū ina ia faatuatua ai i isi valoaga ia e leʻi faataunuuina. O le tele o valoaga e leʻi faataunuuina, o loo faatatau i fuafuaga a le Atua mo le lalolagi, faapea ma tagata usiusitai.

Po o le a e Mauaina Aogā o Taʻiala a le Atua?

O Ieova o le faaataga atoatoa o le alofa, ma e finagalo o ia, ia tatou fiafia i le taimi nei  seʻia oo i le faavavau. (Ioane 17:3; 1 Ioane 4:8) Ioe, ua finagalo le Atua ia tatou maua “le ola moni.” (1 Timoteo 6:12, 19) O lea la, e silia ma le ono miliona Molimau a Ieova ua fiafia e faailoa atu le “tala lelei o le malo” i o latou tuaoi, ona o lo latou usitaia o le faatonuga a le Atua. (Mataio 24:14) E 235 atunuu o loo faia ai lea galuega i le taimi nei, o lona uiga ua toeitiiti lava soo le lalolagi atoa!

O le Malo o le Atua, o se pulega o loo i le lagi, ua ala mai iā Iesu Keriso. (Tanielu 7:13, 14; Faaaliga 11:15) O le a ia faaumatia tagata amio leaga uma, po o ē lē fia gauaʻi i tulaga amiotonu a Ieova. (Salamo 37:10; 92:7) Ona ‘tumu loa lea o le lalolagi i le malamalama o Ieova, e pei ona ufitia o le iliti tai i le suāsami.ʼ—Isaia 11:9.

Seʻi tagaʻi la i le filemu ma le autasi o le a iai pe a tapuaʻi tagata uma o le a soifua ai i le paneta i le Atua, “i le agaga ma le faamaoni,” ma gauaʻi atu i lana taʻitaʻiga alofa ma faatulagaga ua atoatoa ona lelei! (Ioane 4:24) O le a maua ai loa e tagata “le ola moni” lea na folafolaina mai e le Atua!

Ae, e pei ona valoia, e toʻaitiiti i latou e taliaina le taʻiala mai le Atua, ma latou maua ai le ola. (Mataio 7:13, 14) Ae ā oe, e te fia auai ma i latou ia? Afai o lea, ua valaaulia oe e Molimau a Ieova ia e saʻiliʻili i le Tusi Paia, ma taʻitaʻia oe e taʻiala mai le Atua. O le a e ‘tofoʼ ai i le lelei o Ieova. (Salamo 34:8) E pei ona faasinosino tonu manufelelei i se poto faalenatura na tuuina iā i latou, o le a tonu foʻi ona taʻitaʻiina e Ieova ona tagata faamaoni i le ola i le Parataiso.—Luka 23:43.

[Ata i le itulau 8, 9]

“Amuia ē agamalu; auā e fai mo latou tofi le nuu.”—MATAIO 5:5

“A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—SALAMO 37:11

“Ua faatasi ma tagata le fale fetafaʻi o le Atua, . . . E sōloiesea foʻi e le Atua loimata uma i o latou mata; e leai foʻi se toe oti.”—FAAALIGA 21:3, 4

“Auā o ē amio saʻo, latou te mau i le nuu; ma ē ua sao a latou amio, e faatotoeina ai i latou; a e vavaeeseina o ē amio leaga ai le laueleele, e liʻaiina ai foʻi o ē amio pepelo.”—FAATAOTO 2:21, 22