Pe Fetaui Ona Ma Faaipoipo?
Ua Fesili Mai Talavou . . .
Pe Fetaui Ona Ma Faaipoipo?
Seʻi tagaʻi po o le ā sau tali i fesili nei:
I le taimi nei, o ā ni uiga e te manatu e tāua ona iai i sē tasi e ono avea ma au paaga faaipoipo? I le lisi o loo i lalo, faailoga ✔ uiga e fā e sili ona tāua iā te oe.
․․․․․․․․ e aulelei
․․․․․․․․ e naunau i mea faaleagaga
․․․․․․․․ e faaleuō
․․․․․․․․ e maufaatuatuaina
․․․․․․․․ e taʻutaʻua
․․․․․․․․ e amio lelei
․․․․․․․․ e mālie
․․․․․․․․ e taulaʻi atu i sini
A o e talavou, pe na iai se isi na e fia alu i ai? I le lisi o loo i luga, faailoga X le uiga sa e manatu na sili ona e fiafia i ai i lea tagata.
E LEAI se vala o loo taʻua i luga e leaga. E tofu lava le vala ma le mea e manaia ai. Peitaʻi ane, o le a e ioe mai, afai o lea e te talavou ma ua e fiafia i se tasi o le isi itupā, ua na o vala e iloagofie o lea tagata o le a e mātauina, e pei o vala na o loo i le lisi i le agavale.
Peitaʻi ane, a o faasolo ina e matua, ua amata ona e manatunatu i mea e sili atu ona loloto o le olaga, e pei o vala ia o loo i le lisi i le taumatau. Atonu o lea ua e iloaina nei e lē faamoemoeina le teine lea o loo e manatu e sili ona aulelei, po o le tama lea e sili ona taʻutaʻua, e faalēlelei lana amio. Afai ua e “matua” ma ua mavae le taimi lea sa sili ona malolosi ai ou lagona faaleituaiga, atonu la ua e fia iloa mea e sili ona tāua i se tagata, ma ua e fesili ifo: Pe fetaui ona ma faaipoipo ma lenei tagata?—1 Korinito 7:36.
Ailoga e Afāina Po o Ai e Ma te Faaipoipo?
A o faagasolo taimi, atonu e lē tasi se isi o le isi itupā e te fiafia i ai. Ae e lē faapea ai ua fetaui lou faaipoipo i so o se isi. Auā, o loo e manaʻomia se tasi o le a lua ola faatasi i le olaga atoa, o sē e aogā iā te oe e pei o oe iā te ia, ma faalaeiauina ia faia le mea sili. (Mataio 19:4-6) Faamata la o ai le tagata lenā? A o leʻi taliina le fesili, ia muamua ona e ‘vaavaai i le faaataʼ ma tagaʻi totoʻa ifo iā te oe lava.—Iakopo 1:23-25.
Ina ia e malamalama atili iā te oe lava, tali fesili nei:
O ā mea ou te lelei ai?
․․․․․
O ā oʻu vaivaiga po o mea ou te ono lologofie i ai?
․․․․․
O ā oʻu manaʻoga faaleagaga ma faalogona o iai?
․․․․․
E lē faigofie lou taumafai ia malamalama iā te oe lava, ae e aogā nei fesili e te manatunatu i ai ma e iloa ai oe lava. * O le tele o lou malamalama iā te oe lava, o le a faigofie ai ona e iloa po o ai e fetaui lelei iā te oe. Ae ā la pe afai, o lea ua e maua se tagata e te manatu e fetaui lelei ma oe?
Faamata o le a Taulau le Lua Mafutaga?
Ia tagaʻi lelei i lau uō ona maua lea o se tali saʻo o le fesili lea. Ae ia e faaeteete ona atonu e na o mea lava e te fiafia i ai o le a e mātauina. O lea la, e lelei pe a lava se taimi e faamasani ai. Ia taumafai e malamalama lelei i uiga moni o lau uō.
O le toʻatele o ē ua fai uō, e lē o tagaʻi totoʻa i uiga moni o a latou uō. Ae ua taʻu mai mea e latou te fiafia faatasi i ai ma fai mai: ‘E tutusa musika e ma te fiafia i ai,ʼ ma ‘E tutusa mea e ma te fiafia i ai,ʼ ma ‘E tutusa lelei o ma manatu i mea uma!’ Ae e pei ona taʻua muamua, afai o lea ua e matua, o le a e tagaʻi lelei la i mea e sili atu ona tāua. Ia e iloa “le tagata lilo o le loto” o lau uō.—1 Peteru 3:4; Efeso 3:16.
Kalatia 5:19, 20; Kolose 3:8) Pe e na te faaalia le agamalu, ma gauaʻi auā le filemu, aemaise lava pe afai e lē o se mea e tāua?—Iakopo 3:17.
O se faataʻitaʻiga, na i lo le tagaʻi i mea ua tasi i ai o oulua manatu, tagaʻi po o le ā e tupu pe a oo ina lua eseese, e faapeʻī uiga o lau uō, pe finau mai lava o ia e saʻo, ma faaali le “lotoa” ma faaaogā “upu leaga”? (O se isi vala e ao ona manatunatu i ai, Po o ia o se tagata e fai togafiti, e fia pule, ma fuā? Po o ia fia iloa po o fea o e iai i taimi uma? Ua fai mai se tamaʻitaʻi talavou e igoa iā Nicole: “Afai e fuā, e lē lelei la. Ou te iloa e iai faigāuō e misa ona e ita tele le isi tagata pe a lē taʻuina atu e le isi le mea o iai, ma e lē lelei lea tulaga.”
O le ā se vaaiga a isi tagata i lau uō? Atonu e lelei ona e talanoa i tagata ua leva ona latou iloa lau uō, e pei o ē taʻumatuaina i lana faapotopotoga. O le a latou faailoa atu, pe faamata o ia o se tagata e “taʻuleleia.”—Galuega 16:1, 2. *
Po ua Tatau Ona Faauma?
Ae ā pe a faapea o lea ua e iloa, e lē fetaui ona lua faaipoipo ma le tagata lea e lua te uō? Afai o lea le tulaga, o se mea poto la le faauma o le faigāuō. Ua faapea mai le Tusi Paia: “O lē ua faautauta, na te iloa atu le leaga, ma lafi ai.”—Faataoto 22:3. *
Atonu e sau se taimi e toe fai ai se isi au uō. E mautinoa lava o le a sili atu ona paleni lau vaaiga, ona ua e poto mai mea na tutupu muamua. Atonu la o le a mafai ona e tali loa ioe i le fesili lea, “Pe fetaui ona ma faaipoipo ma lenei tagata?”
Ua iai nisi mataupu i le faa-Peretania o le faasologa “Ua Fesili Mai Talavou . . .” e maua i le Initaneti i le www.watchtower.org/ype
[Faaopoopoga i lalo]
^ pala. 25 Tagaʻi i le itulau 30 o le Awake! o Ianuari 2007, mo nisi fesili faaopoopo e fesiligia ai e oe, oe lava.
^ pala. 31 Tagaʻi foʻi i fesili o loo i pusa i itulau e 11-12.
^ pala. 33 Tagaʻi i itulau e 12-14 o le Awake! o Mati 22, 2001, mo nisi faamatalaga faaopoopo i le faaumaina o se faigāuō.
MEA E MAFAUFAU I AI
▪ O ā ni ou uiga e aogā pe a fai sou aiga?
▪ O ā ni uiga e te manaʻo ai i se isi e te fia faaipoipo i ai?
▪ E mafai faapefea ona e malamalama i uiga, amio, ma le talaaga o se tagata o lua uō?
[Pusa i le itulau 11]
Po o le a avea o ia ma se tane lelei?
VALA E MASANI AI
❑ O faapefea ona ia taulimaina se pule o loo iā te ia?—Mataio 20:25, 26.
❑ O ā ni ona sini o iai?—1 Timoteo 4:15.
❑ Po o ia taumafai ia ausia na sini?—1 Korinito 9:26, 27.
❑ O ai ana uō?—Faataoto 13:20.
❑ O le ā lana vaaiga i tupe?—Eperu 13:5, 6.
❑ O ā ituaiga faafiafiaga e fiafia i ai?—Salamo 97:10.
❑ O le ā o taʻu mai e ona laʻei?—2 Korinito 6:3.
❑ O faapefea ona faaalia lona alofa mo Ieova?—1 Ioane 5:3.
UIGA E ILOA AI E LELEI
❑ Pe e toʻaga?—Faataoto 6:9-11.
❑ Pe e na te fuafua lelei i tulaga tau tupe?—Luka 14:28.
❑ Po o ia o se tagata e taʻuleleia e isi?—Galuega 16:1, 2.
❑ Pe e āva i ona mātua?—Esoto 20:12.
❑ Pe e magafagafa mo isi?—Filipi 2:4.
MEA E ILOA AI LE FAALĒTONU
❑ Pe e māitaita?—Faataoto 22:24.
❑ Po o ia faaosoosoina oe e fai amioga leaga tau feusuaʻiga?—Kalatia 5:19.
❑ Pe e sauā ma fai upu faatigā?—Efeso 4:31.
❑ Pe e seʻiloga e inu le ʻava malosi ona faatoʻā fiafia lea?—Faataoto 20:1.
❑ Pe e fuā ma manatu faapito?—1 Korinito 13:4, 5.
[Pusa i le itulau 12]
Po o le a avea o ia ma se avā lelei?
VALA E MASANI AI
❑ O faapefea ona iloa lona gauaʻi, i le aiga ma le faapotopotoga?—Efeso 5:21, 22.
❑ O le ā o taʻu mai e ona laei?—1 Peteru 3:3, 4.
❑ O ai ana uō?—Faataoto 13:20.
❑ O le ā lana vaaiga i tupe?—1 Ioane 2:15-17.
❑ O ā ni ona sini o iai?—1 Timoteo 4:15.
❑ Po o ia taumafai e ausia na sini?—1 Korinito 9:26, 27.
❑ O ā ituaiga faafiafiaga e fiafia i ai?—Salamo 97:10.
❑ O faapefea ona faaalia lona alofa mo Ieova?—1 Ioane 5:3.
UIGA E ILOA AI E LELEI
❑ Pe e tōʻaga?—Faataoto 31:17, 19, 21, 22, 27.
❑ Pe e na te fuafua lelei i tulaga tau tupe?—Faataoto 31:16, 18.
❑ Po o ia o se tagata e taʻuleleia e isi?—Ruta 4:11.
❑ Pe e āva i ona mātua?—Esoto 20:12.
❑ Pe e magafagafa mo isi?—Faataoto 31:20.
MEA E ILOA AI LE FAALĒTONU
❑ Pe e faamisa?—Faataoto 21:19.
❑ Po o ia faaosoosoina oe e fai amioga leaga tau feusuaʻiga?—Kalatia 5:19.
❑ Pe e sauā ma fai upu faatigā?—Efeso 4:31.
❑ Pe e seʻiloga e inu le ʻava malosi ona faatoʻā fiafia lea?—Faataoto 20:1.
❑ Pe e fuā ma manatu faapito?—1 Korinito 13:4, 5.