Shark Bay—O se Vaifagaloa Matagofie

TUSIA E LE TUSITALA O LE ALA MAI! I AUSETALIA

O SHARK BAY, o se vaifagaloa e lē loloto tele e i le faatausiʻusiʻuga i sisifo o Ausetalia, pe ā ma le 400 maila (650 kilomita) i mātū o le aai o Perth. I le 1629, na taʻu ai e se alii suʻesuʻe, o Francois Pelsaert, lea toafa o se “laufanua laolao, e aunoa ma se laau po o se mutia e ola ai.” Na taʻu mulimuli lea vaipanoa e tagata na asiasi atu i ai o Hopeless Reach, Useless Inlet, ma le Disappointment Loop (po o ni nofoaga lē ainā).

Ae i aso nei , ua silia ma le 120,000 tagata maimoa o loo lolofi atu i ai i tausaga taʻitasi. I le 1991, na lisi ai lea nofoaga i nofoaga faasao a le lalolagi, ona o le matagofie tele o mea o loo iai. *

Laufanua ua Tataa ai le Tele o Meaola

Ae ana seʻi tagaʻi Pelsaert i le sami, semanū e na te iloa ai le tele o mutia o loo lauolaola ai, ona o Shark Bay, ua sili i le lalolagi ona o le telē toe eseese o mutia o loo iai i le silia i le 1,500 maila faatafafā (4,000 kilomita faatafafā). E 80 maila (130 kilomita) le umī o se vaega o mutia e taʻu o Wooramel Seagrass Bank i le itū i sasaʻe o Shark Bay.

O nei mutia sami, e iai o latou fua, ma o loo ola ai le tele o meaola o le sami, e iai tamaʻi ulāvai, iʻa ninii, ma isi meaola eseese. Ua aogā foʻi e aai ai meaola e iai dugongs ma sea cows (povi sami), o meaola e pei ni mumua (dolphins). O nei meaola, e oo i le 880 pauna (400 kilokalama) le tetelē, e filemu ma fia iloa, ma i nisi taimi e ova i le 100 meaola o ia ituaiga e tataa faatasi i mutia i lalo o le vai. Atonu o Ausetalia i Mātū, mai Shark Bay i sisifo e oo atu i Moreton Bay i sasaʻe, ua numera silia i le tele o dugongs i le lalolagi. *

Ua fetaui lava le faaigoa o lea vaipanoa o Shark Bay (Vaifagaloa o Malie) ona e silia ma le 12 ituaiga o malie eseese, o loo tele ai. O loo iai le malie taika e feʻai (tiger shark), ma le  malie e sili ona telē i le lalolagi ae e lē feʻai, o le malie tafolā (whale shark). Ua ola faatasi ai malie ma mumua, ma ua lē moni ai le manatu e faapea a vaaia mumua, o lona uiga e leai ni malie o iai i se ogasami. O le mea moni, ua iloa e tagata suʻesuʻe, e tusa ma le 70 pasene o mumua o loo iai, o loo iloga ʻaiʻaiga ona sa osofaʻia e malie. O loo vaaia ai foʻi i le vaifagaloa le faitau afe o tafolā o le ituaiga o le humpback, ua mālōlō a o malaga atu i saute i tausaga taʻitasi, ma e faapena foʻi le aofaʻi o laumei o loo taunuu atu e tuufua ai i matafaga i tausaga taʻitasi.

E Lē o ni Maa

I le faatausiʻusiʻuga i saute o le vaifagaloa, o loo iai Hamelin Pool, ma e ese foʻi lona foliga mai, e pei e leai se mea o ola ai. E māfanafana lea vai, ma ua sili atu ona oona i lo le suāsami ona e vave tele ona liu aūsa. O loo siʻomia pito o le vai i mea e foliga mai o ni maa ʻefuʻefu, ae a tilotilo lelei i ai, e lē o ni maa ae o stromatolites, o ituaiga o limu e lanumoana meamata. O le lauolaola tele o nei limu, a fua i ai, e tusa ma le tolu piliona o loo iai i se ogāmea e 10 futu faatafafā!

Ua palu faatasi le vavale o le limu ma mea mai le suāsami ma maua ai se simā, e faaopoopo i le mea e nonofo ai, lea e malō ai e pei o se maa. E umi lava se taimi e faia ai faapea, ma afai ua tasi le futu (30 senitimita) le maualuga o se maa, o lona uiga e tusa ua toeitiiti atoa le 1,000 tausaga o le stromatolite!

Ua numera tasi Hamelin Pool i le lalolagi i le tele ma eseese o ituaiga o stromatolites o loo iai. E lē gata i lea, ua lē o toe tele ni nofoaga faapea o loo maua ai stromatolites.

Mea e Sili Ona Mataʻina o Shark Bay

Ae o meaola e sili ona mataʻina i Shark Bay, o mumua o le ituaiga bottlenose o loo i le matafaga e taʻu o Monkey Mia Beach, i le faatausiʻusiʻuga o Penisula o Denham. E lē tele ni nofoaga e pei o Monkey Mia i le lalolagi o loo mafai ona paʻi ai tagata i mumua, ma e lē o mautinoa tonu po o anafea na amata ai lea tulaga.

Ua fai mai nisi, ua vāai o tulituli atu e mumua iʻa i le vaega papaʻu o le sami, i tausaga mai le 1950, ma o loo vaaia pea o faia i aso nei. Atonu o le taimi tonu lea na amata fafaga ma faalata ai e tagata mumua. I le 1964, na togi e se fafine faifaiva i Monkey Mia se iʻa i se mumua o loo ʻauʻau i talaane o lona vaa. Na faaigoaina  lea mumua iā Charlie, ma i le pō na sosoo ai, na toe foʻi ane ma ʻai le iʻa mai le lima o le fafine. E leʻi umi ae ō atu ma isi mumua.

Talu mai lenā taimi, ua tolu tupulaga o mumua i inā ua avea ma mea e maimoa i ai tagata. Ua fiafia foʻi tagata suʻesuʻe mai atunuu eseese e ō atu e suʻesuʻe i mumua, ma ua avea ia mumua ma iʻa ua sili ona faia ai ni saʻiliʻiliga.

I aso nei, ua masani ona ō atu ai mumua i le tele o taeao ma a latou tamaʻi mumua i Monkey Mia. E ui ina tele tagata maimoa fiafia o loo faatalitalia le oo atu o mumua, ae e toʻaitiiti ua faataga e fafagaina iʻa. Aiseā? Ona e lē o mananaʻo tagata o loo vaavaaia mumua e ola faalagolago nei iʻa i meaʻai mai tagata. Ae o loo mafai lava ona iloa lelei uma atu e tagata le fafagaina o mumua. Na fai mai se tasi fafine: “Maʻimau e, pe ana faapea le tulaga o tagata ma isi foʻi meaola!”

Ua faailoa mai i le Tusi Paia, o lea moomooga, ua atagia ai le fuafuaga a le Atua i le amataga ia mafai ona nonofo fifilemu manu ma tagata. (Kenese 1:28) Afai e te alofa i meaola, o le a faafiafiaina oe i le iloaina, e ui ina faalavelave le agasala mo sina taimi, ae o le a faataunuuina le fuafuaga a le Atua pe a pule lona Malo i le lalolagi, o se malo faalelagi e pulea e Iesu Keriso.—Mataio 6:9, 10; Faaaliga 11:15.

O le a avea le lalolagi atoa ma nofoaga matagofie e saogalemu, ma tumu i meaola eseese o loo ola lelei. Ua toeitiiti ona tele lea o nisi mea mataʻina o le a iai i Shark Bay, mo ē maimoa ai.—Salamo 145:16; Isaia 11:6-9.

[Faaopoopoga i lalo]

[Faafanua i le itulau 15]

(Tagaʻi i le lomiga mo le ata atoa)

AUSETALIA

SHARK BAY

[Ata i le itulau 16, 17]

Vaaiga mai luga o le matafaga i Monkey Mia

[Ata i le itulau 16, 17]

O se dugong, po se povi sami, e aga filemu

[Ē Ana le Ata]

© GBRMPA

[Ata i le itulau 16, 17]

E faitau piliona meaola ninii ua faia stromatolites

[Ata i le itulau 17]

Ua masani ona iai mumua i le matafaga i Monkey Mia

[Ē Ana le Ata i le itulau 15]

© GBRMPA; faafanua mai le satelite: Jeff Schmaltz, MODIS Rapid Response Team, NASA/GSFC

[Ē Ana le Ata i le itulau 17]

O ata uma, seʻi vaganā muamua na maua i le faatagaga a le Tourism Western Australia