Taʻiala e Sili Atu i Lagona Faalenatura

“Afai e tuu mai e pule lava le tagata ia i ana tapulaa tau amio ae leai ni taʻiala mautū e iloa ai le tonu ma le lelei o ana filifiliga, ona faia loa lea o tulafono auā taumafaiga ina ia iai ni amioga lelei.”—DR. DANIEL CALLAHAN.

O LE tulaga e faanoanoa ai ona ua moni le popolega o Callahan. Ua uunaʻia malo e fai tulafono ina ia taumafai e taofia ai le solitulafono, ona ua tupu tele le amio leaga i le tele o vaega o le lalolagi. I le uluaʻi Fonotaga a Tinā i Nigeria, na faaalia ai e le peresitene o Nigeria lona popole tele e tusa o le lumanaʻi o le atunuu. O lona popolega, e lē o faatatauina atu i faiga faapolotiki po o le tulaga mativa, ae ua faatatau “i se isi faafitauli e sili atu,” o le “lē lelei o . . . tulaga tau amio i aiga, i galuega, i nuu, ma le atunuu.”

O se suʻesuʻega na faia i tinā e 1,736 i Peretania na iloa ai, “ua tele ina lē taulau tulaga o aiga ona o le leaga o amioga ua iai, ma ua faateleina mātua ua tausia toʻatasi aiga. Ua faapena foʻi le tulaga i Saina. Ua lipotia mai e le Time le vave feusuaʻi o tagata a o laiti, ma ua lē tasi se paaga. Na faapea mai se tamaʻitaʻi Saina o lē ua sili atu i le 100 ana paaga ua latou feusuaʻi: “E pule lava aʻu i loʻu olaga.”

Ua aafia foʻi i latou e pulea pisinisi tetele i lea tulaga o le paʻū o amioga. Ua fai mai Javed Akbar i le pepa Kanata, o le Toronto Star, e faapea: “Ua lē o toe vaai tagata i taʻitaʻi e faapea o i latou e avea ma faataʻitaʻiga i amio. Ma e foliga mai ua lē o toe iai ni uiga mautū ma faamoemoeina” i le ʻau faipolotiki, pule o pisinisi, ma taʻitaʻi lotu.

Aiseā ua Faapea Ai?

Ua iai ni vala ua ala ai ona faapea. O se tasi vala, ua taatele le uiga o le tetee i amioga lelei e pei ona sa masani ai. O se faataʻitaʻiga, na faia se suʻesuʻega i le vaega i Saute o le Iunaite Setete ma na iloa ai, o loo manatu le tele o tagata e aʻoʻoga i iunivesite e faapea, “o loo i le tagata lava ia lana faatatau i le mea ua saʻo ma le mea ua sesē.”

Na taʻua se isi vala e Zbigniew Brzezinski, o sē faitofā i mataupu faapolotiki. Na ia tusi e faapea, o tagata i aso nei, “ua tele lava ina mananaʻo e faamalie o latou lava manaʻoga, ma ua avea le faafiafiaina o le tagata lava ia ma uunaʻiga autū o a latou amioga.” Atonu e suamalie le fia tutoʻatasi, le manaʻo tele, ma le faafiafiaina o le tagata lava ia, ae pe faamata e maua ai se fiafia moni, ma faamalieina ai, ma maua ai se faiā lelei ma isi?

Na fetalai Iesu e faapea: “A e taʻuamiotonuina le poto i ana galuega.” (Mataio 11:19) Po  ua sili atu ona fiafia tagata ma saogalemu ona ua paʻū maulalo tulaga o amioga? Seʻi tagaʻi foʻi i ni mea ua tutupu ona o lea tulaga: ua faateleina le masalosalo, le popole, le faalētonu o faiā ma isi, o fanau ua tutupu aʻe e aunoa ma se tinā po o se tamā, o le mau faamaʻi eseese mai feusuaʻiga, o le tōfale, pulea e fualaau faasāina, faapea ma le sauā. Ua iloa mai nei mea, e leai se faamalieina po o se taulau manuia o maua, ae ua na o faanoanoaga ma le lē taulau manuia.—Kalatia 6:7, 8.

Ina ua tagaʻi le perofeta a le Atua o Ieremia i tulaga faapea i ona aso, na ia faapea mai: “Ieova e, ua ou iloa e lē o i le tagata lona ala, e lē o i le tagata e savali ona faatonuina le mea e ui ai o ia.” (Ieremia 10:23) O lona uiga, e leʻi faia i tatou e le Atua ia tutoʻatasi mai iā te ia, ia tatou pule i le mea e lelei ma le mea e leaga. Auā foʻi, o le mea e foliga mai e lelei iā i tatou, atonu o le mea tonu lava lea e leaga. Ua faapea mai le Tusi Paia i le Faataoto 14:12: “O i ai le ala ua tonu i le manatu o le tagata; a o lona taunuuga, o ala ia e oti ai.”

O se Fili Mai Totonu

O le ā se māfuaaga ua tatou manaʻomia ai taʻiala i amioga tatau? Ona e mafai e o tatou loto ona ʻolegia i tatou. O le upu a le Tusi Paia i le Ieremia 17:9 e faapea: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa?” Faamata e mafai ona e faatuatuaina se tagata e te iloa e faaʻoleʻole ma e matuā leaga lava? O le mea moni, e leai! Ae, o loo iā i tatou uma se loto e maua i ai na uiga. O lea, ua tuusaʻo mai ma le alofa e le Atua le lapataʻiga lenei: “O lē ua faatuatua i lona lava loto, o le vale ia; a o lē savali ma le poto, e laveaʻiina o ia.”—Faataoto 28:26.

Ua taʻu mai e le mau iā i tatou le mea e ao ona fai: Ia tatou ola e tusa ai ma le poto mai le Atua, ae lē o lo tatou lava poto, ona tatou sao ai lea mai le tele o mala. E mafai ona  maua lea poto e tagata o loo mananaʻo moni i ai. “Afai ua leai se poto i so outou, inā ōle atu ia i le Atua, o lē foaʻi tele mai i tagata uma ma le lē toe taʻutaʻua.”—Iakopo 1:5.

Faatuatua i le Atua “ma Lou Loto Atoa”

Ua faamatala mai e le Tusi Paia Lē na faia i tatou e faapea: “O le Papa, e sao lava lana galuega; auā e tonu ona ala uma lava; o le Atua faamaoni, e lē o iā te ia se amiolētonu, o le amiotonu ma le amio saʻo lava ia.” (Teuteronome 32:4) Ioe, ua faatusaina Ieova i se papa, auā e lē afāina po o ā tulaga e oo mai, e tatou te matuā faamoemoeina ana taʻiala maufaatuatuaina i amioga, faapea ma le faaleagaga. Ua fai mai le Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

O lea la, pe e iai se isi e mafai ona maua mai ai ni taʻiala e sili atu na i lo Lē na faia i tatou, o lē faitaulia ‘o tatou lauulu uma lava’? (Mataio 10:30) E lē gata i lea, ua avea o ia ma uō moni, ma o lona alofa ua ia fetalai saʻo mai ai i taimi uma, e ui ina tatou te lē fia talia nisi o mea o loo ia fetalai mai ai.—Salamo 141:5; Faataoto 27:6.

E lē o faamalosia foʻi i tatou e Ieova ia gauaʻi atu i ana taʻiala. Ae ua ia augani mai ona o lona alofa. “O aʻu o Ieova, . . o loo aʻoaʻo iā te oe i mea e aogā, o loo taʻitaʻiina oe i le ala e te ui ai. E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isaia 48:17, 18) Ioe, tatou te lagona le tosina atu i se Atua faapea, a ea? E lē gata i lea, ua ia faafaigofieina lo tatou mauaina o le poto mai iā te ia, e ala i lana Afioga, le Tusi Paia, auā o lea le tusi ua sili ona salalau atu i le lalolagi!—2 Timoteo 3:16.

Ia Avea le Afioga a le Atua ma Malamalama i le Ala

Ua faapea mai le faisalamo e tusa o nei Tusitusiga Paia: “O lau afioga o le sulu lea i oʻu vae, ma le malamalama i loʻu ala.” (Salamo 119:105) O le sulu i o tatou vae, e iloagofie ai se mea tatou te ono lāvea ai, ae o le malamalama i o tatou ala, e faamalamalamaina ai le auala o i ou luma. O lona uiga, ua fesoasoani mai le Afioga a le Atua, ia saʻo ona taʻitaʻia i tatou i lenei olaga a o faia filifiliga atamai ma lelei i mea uma, i le taimi nei, ma le lumanaʻi.

O se faataʻitaʻiga, tagaʻi foʻi i le Lauga a Iesu i luga o le mauga. E lē o se lauga umi, o loo i le Mataio mataupu e 5-7, ae na lauga o ia e faatatau i le fiafia, alofa, ita, agaalofa, amio, tatalo, le toloʻaʻi o ʻoa, ma le tele o isi mataupu e talafeagai i lenā taimi ma faapea foʻi i ona pō nei. Na ‘⁠matuā taufaiofo le motu o tagata i lana aʻoaʻogaʼ ona o lona tomai. (Mataio 7:28) Ia sema sina taimi e te faitau ai i lea lauga. E mautinoa lava o le a e ofo ai foʻi.

“Ia Outou Ōle Atu” Pea mo le Fesoasoani Mai le Atua

O le mea moni, e lē faigofie ona fai pea le mea e tonu i le silafaga a le Atua. Auā o loo faatusaina i le Tusi Paia la tatou tauiviga ma le agasala e pei o se taua. (Roma 7:21-24) Ae e mafai ona tatou manumalo, ona o le fesoasoani mai le Atua. Na fetalai Iesu: “Ia outou ōle atu, ona foaʻiina mai ai lea iā te outou; ia outou saʻili, ona outou maua ai lea . . . Auā ai se ōle atu, e maua e ia; o lē saʻili, e iloa e ia.” (Luka 11:9, 10) E lē taitai ona fulitua Ieova i se tasi o loo taumafai moni e savali i le ala va apiapi, lea e tau atu i le ola e faavavau.—Mataio 7:13, 14.

O se faataʻitaʻiga, na amata ona suʻesuʻeina e Falani ma Molimau a Ieova le Tusi Paia, a o fai lana amio o le ulaula tapaa. Ae ina ua faitau o ia i le 2 Korinito 7:1 ma iloa ai o lea mea “e leaga ai le tino” i le silafaga a le Atua, na ia filifili loa e tuu. Ae e leʻi faigofie iā te ia ona ola e tusa ma lea filifiliga. I se tasi aso, talu ai lona fia ula tele, na fetolofaʻi ai e tau suʻe ni mulitapaa e na te ulaina!

O lea mea, na iloa lelei ai e Falani, o ia ua nofo pologa i le tapaa. (Roma 6: 16) Ma na ia tatalo faatauanau mo se fesoasoani, ma toʻaga foʻi e auai i le faapotopotoga Kerisiano o Molimau a Ieova, ma mafai ai loa ona manumalo i le tapaa.—Eperu 10:24, 25.

Ia Faamalie Lou Manaʻoga Faaleagaga

Ua tele nisi faataʻitaʻiga, e pei o le faataʻitaʻiga a Falani, e faaalia ai le silisili o taʻiala tau amio ma le faaleagaga o loo iai i le Tusi Paia, faapea ma le uunaʻiga ia faatino ai. E lētioa a faapea mai Iesu: “E lē na o mea e ʻai e ola ai le tagata, a o afioga uma e tulei mai i le fofoga o le Atua.”—Mataio 4:4.

Pe a goto i o tatou loto upu moni tāua mai le Atua, o le a iai aogā i o tatou mafaufau, lagona, i le faaleagaga, ma le faaletino. Ua faapea mai le Salamo 19:7, 8: “E sao le tulafono a Ieova, e faafoʻisia [pe faafouina] mai ai le agaga. . . . E tonu feʻau a Ieova, e faafiafia ai le loto; e mamā poloaʻiga a Ieova, e malamalama ai mata [ona o le faamoemoe ma le manino o le fuafuaga a le Atua].”

Ua tele isi mea ua faia e Ieova, e ala i lana Afioga, ina ia faatonutonu ai o tatou ala ma ia ola ai i se olaga e sili ona lelei i le taimi nei. Ua ia faamanino mai foʻi le lumanaʻi iā i tatou. (Isaia 42:9) O se lumanaʻi e matuā pupula lava mo ē uma e talia taʻiala a le Atua, e pei ona o le a tatou vaai i ai i le mataupu o sosoo mai.

[Pusa/Ata i le itulau 4, 5]

O Lou “Tapasā” Tau Amio

Ua iai i tagata se meaalofa tāua tele, o le loto fuatiaifo. O lea la, ua tutusa tagata uma mai atunuu ma ituaiga eseese, ma i soo se vaitaimi i tulaga tau amioga tatau. (Roma 2:14, 15) Peitaʻi ane, e iai taimi e sasi ai le loto fuatiaifo, ona ua aafia i talitonuga sesē faalotu, o manatu faaletagata, o faiga faaituʻau, ma tuʻinanauga sesē. (Ieremia 17:9; Kolose 2:8) O lea la, e pei lava ona manaʻomia e se ave vaalele ona faatonutonu ana meafaigaluega, e manaʻomia foʻi ona tatou siaki ma faasaʻosaʻo lo tatou tapasā tau amio ma le faaleagaga, ia tusa ma ala amiotonu a “lo tatou fai tulafono,” o Ieova le Atua. (Isaia 33:22) E tumau e faavavau faatulagaga lelei atoatoa a le Atua, e lē pei o tapulaa tau amio a tagata, e fesuisuiaʻi mai lea tupulaga i lea tupulaga. Ua ia fetalai mai: “Auā o aʻu o Ieova, ou te lē liliu.—Malaki 3:6.

[Pusa i le itulau 7]

Taʻiala mo le Taulau Manuia ma le Fiafia

MAUAINA O LE FIAFIA

“Amuia ē loto maulalo [“naunau i mea faaleagaga,” NW].”—MATAIO 5:3.

“E sili le manuia o lē na te foaʻi atu, i le manuia o lē na te talia mai.” —GALUEGA 20:35.

“E sili ona manuia o ē faalogo i le afioga a le Atua, ma tausi i ai.”—LUKA 11:28.

FAATUPUINA O LE FAATUATUAINA

“Ia tautalatala faamaoni taʻitasi ma lē la te tuaoi.”—EFESO 4:25.

“O lē gaoi aua neʻi toe gaoi.” —EFESO 4:28.

“Ia faamamaluina le faaipoipoga e tagata uma, o le moega foʻi o le ulugalii ia leai sona leaga.”—EPERU 13:4.

TAUIVI INA IA ATIINA AʻE NI FAIĀ LELEI

“O mea uma . . . tou te loto i ai ia faia e tagata iā te outou, ia faapea lava ona outou faia iā te i latou.”—MATAIO 7:12.

“Ia . . . alofa [le tane] i lana lava avā faapei o ia lava iā te ia; o le fafine foʻi ia āva o ia i lana tane.”—EFESO 5:33.

“Ia fefaamagaloaʻi [pea] outou.”—KOLOSE 3:13.

ʻALOFIAINA MA LE FOʻIAINA O FAAFITAULI

“Aua le taui atu le leaga i le leaga i se tasi.”—ROMA 12:17.

“E onosai le alofa, e agamalu [agalelei], . . . e lē faitau leaga ua tuuina mai e nisi.”—1 KORINITO 13:4, 5.

“Aua neʻi goto le la o ita pea outou.”—EFESO 4:26.