Auala 2

Ati Aʻe se Aiga Alolofa

Aiseā e tāua ai? E manaʻomia e le fanau le alofa ma e latou te lē taulau pe a leai se alofa. I le 1950, na faapea mai se tagata suʻesuʻe e suafa iā M. F. Ashley Montagu: “O le mea e sili ona manaʻomia e tagata a o tuputupu aʻe, o le tausiga alofa; ma o le puna o le soifua mālōlōina o le lagonaina lea o le alofa, aemaise lava i uluaʻi tausaga e ono o lona olaga.” E ioe tagata suʻesuʻe o aso nei i le faaiʻuga na faia e Montagu, “e iai ni aafiaga matuiā i le fanau pe a lē lava le alofa e faaalia i ai.”

Le māfuaaga e faigatā ai: O le ola i lenei lalolagi lē alolofa ma manatu faapito, e faalētonu ai faiā a aiga. (2 Timoteo 3:1-5) Atonu e avea faafitauli tau tamaoaiga ma avega tauave i le tausia aʻe o le fanau, ma mea e faateteleina ai faafitauli i le faaipoipoga. O se faataʻitaʻiga, o le eseese o manatu i se ulugalii faaipoipo i le auala e aʻoaʻia ma tauia ai le fanau, e ono faaopoopo ai ni feeseeseaʻiga i se ulugalii ma atili faigatā ai ona talanoa.

Le auala e faaleleia ai: Ia fuafua taimi e faatasitasi ai le aiga. E manaʻomia foʻi e ulugalii faaipoipo ona fuafua se taimi e la te faatasi ai na o laʻua. (Amosa 3:3) Aua neʻi faoa e le TV le taimi pe afai ua momoe le fanau. Ia faatumauina le alofa i totonu o la oulua faaipoipoga e ala i le fefaaaliaʻi o faalogona alofa. (Faataoto 25:11; Pese a Solomona 4:7-10) Nai lo le suʻesuʻe masei, ia saʻili ni auala i aso taʻitasi e faamalō atu i lau paaga.—Salamo 103:9, 10; Faataoto 31:28.

Ia taʻu atu i lau fanau lou alofa mo i latou. Na faataatia e Ieova le Atua le faaaʻoaʻoga mo mātua e ala i le faailoa atu o ona faalogona mo lona Alo, o Iesu. (Mataio 3:17; 17:5) Na faapea mai Feleki o se tamā e nofo i Oseteria: “Ua ou iloa e pei le fanau o ni fugālaau. E pei ona liliu atu nei laau i le lā e maua ai le malamalama ma le māfanafana, e liliu atu le fanau i o latou mātua mo le alofa ma se faamautinoaga o i latou o se vaega tāua o le aiga.”

Po o oe o se matua faaipoipo pe nofo fua, afai e te fesoasoani i lou aiga e ati aʻe le alofa mo isi ma le Atua, o le a faaleleia le olaga o lou aiga.

Ae o le ā o loo fai mai ai le Tusi Paia e faatatau i le auala e faaalia ai le pule a mātua?

[Faamatalaga faaopoopo i le itulau 4]

‘O le alofa o le fusi lea e atoatoa ona autasi ai.’—Kolose 3:14