Ua Fesili Mai Talavou . . .

E Faapefea Ona Ou ʻAlofia le Faia o Oʻu Tala?

“Sa ou auai i se patī, ma o le aso na sosoo ai na feaveaʻi ai tala na ma momoe ma se tama sa iai i inā. E lē moni na tala!” —Lina. *

“O nisi taimi ou te faalogo ai i tala feaveaʻi e faapea o loo fai saʻu uō, ae ou te lē iloa lea tagata! O le toʻatele o tagata e faitatala, e lē vaai muamua pe moni a latou faamatalaga.”—Mika.

E FAATUMULIA e le faitala lou olaga i masalosaloga nai lo mea moni. Seʻi fesili atu iā Amber, o se teine e 19 ona tausaga. Na ia faapea mai, “E ese le fai soo o oʻu tala. Sa feaveaʻi tala ua ou maʻi tō, sa ou faia foʻi le faapaʻū tama, sa ou faatau atu ma toe faatau mai fualaau faasāina, ma ou faaaogāina foʻi fualaau faasāina. Aiseā e fai ai e tagata ia ituaiga tala iā te aʻu? O le mea moni, ou te lē iloa!”

Faitatala i Ala o Fesootaʻiga Faaonapōnei

A o talavou oʻu mātua, na feaveaʻi tala e ala i talanoaga. A o aso nei, ua fai tala i fesootaʻiga faaonapōnei. E ala i imeli ma feʻau e auala i telefoni feaveaʻi, e mafai e se teine po o se tama o loo iai ni faanaunauga leaga, ona faaleagaina le igoa lelei o se tasi e aunoa ma le faia o se tala. E lē tele ni gaoioiga e lafo ai tala taufaaleaga ma maua loa e i latou e fiafia i le faitala.

Ua faapea mai nisi ua taatele atu le faaaogāina o le initaneti e feaveaʻi ai tala nai lo telefoni. O nisi o taimi ua fai faapitoa se itulau i le initaneti (Web site) e faalumaina ai se tasi. Ua taatele le faaaogāina o faamatalaga totino i le initaneti, lea e tumu i suʻega tala e lē mafai ona talanoaina e tagata ona o le matuiā. I se suʻesuʻega na faia, e 58 pasene o talavou na fesiligia na faapea mai, ua latou aafia i faiga taufaaleaga i le initaneti.

Pe e leaga i taimi uma le talanoa e faatatau i isi?

Pe e iai se Taimi e Lelei ai le Talanoa i Isi?

E saʻo pe sesē lea faamatalaga?

E leaga le faitala i taimi uma. □ Saʻo □ Sesē

 O le ā le tali saʻo? O le mea moni, e fuafua i lou faauigaina o le upu “faitala.” Afai o le uiga o le upu o le talatalanoa faasamasamanoa, e iai taimi e talafeagai ai. Auā loo timaʻi mai le Tusi Paia, “ia naunau atu i olaga o isi.” (Filipi 2:4, New Century Version) E lē faapea o le a tatou fia iloa uma mea o loo tutupu i olaga o isi. (1 Peteru 4:15) Ae o talatalanoaga faasamasamanoa e masani ona e iloa ai faamatalaga aogā, e pei o ai o le a faaipoipo, o ai ua fanau, ma o ai o loo manaʻomia se fesoasoani. O le mea moni, e lē mafai ona faapea o loo tatou naunau moni i isi pe a tatou lē talanoa e faatatau iā i latou.

Peitaʻi, e faigofie ona oo talatalanoaga faasamasamanoa i tala taufaaleaga. O se faaaʻoaʻoga, o se faamatalaga mamā sa fai faapea, “Ai se manaia pe a na nonofo Papu ma Sui,” ae toe fai e nisi faapea “Ua uō Papu ma Sui” e ui e lē o uō Papu ma Sui. Atonu e te faapea mai, ‘E lē matuiā lenā faafitauli,’ ae faapefea pe ana faapea o oe o Papu po o Sui!

Sa aafia Iulia e 18 ona tausaga i ia ituaiga o tala, ma sa tigā ai o ia. Na ia faapea mai, “Sa ou ita, ma sa ou masalosalo i tagata uma.” E tai faapena le mea na oo iā Sieni, e 19 ona tausaga. Na ia faapea mai, “Sa ou lē toe fia talanoa i le tama lea sa fai ai tala faapea e ma te uō, ma sa ou lē fiafia i lea mea ona e ma te masani lelei, ma ou te lagona e tatau ona mafai pea ona ma talanoa e aunoa ma le fai ai fua o tala.”

E mautinoa lava e matuiā aafiaga o tala taufaaleaga. Peitaʻi, o i latou ua tigā ona o tala faapea, na taʻutino mai na latou faia foʻi. O le mea moni pe a fai ni tala lē lelei e faatatau i se tasi, e ono faaosoosoina i tatou e auai i ia faiga. Aiseā? Na faapea mai Filipo e 18 ona tausaga, “O se mea e faapasi ai le taimi, auā e sili i tagata le uaʻi i faafitauli o isi nai lo o i latou lava.” O le ā lau mea e fai, pe a avea talanoaga faasamasamanoa ma mea e faia ai tala taufaaleaga?

Vaavaai Lelei le Auala e Talatalanoa Ai!

Seʻi mafaufau i le tomai e moomia pe a e aveina se taavale i se auala pisi. Ae faafuaseʻi lava ona aliaʻe se faafitauli e ono manaʻomia ai ona faalemu pe taofi lau taavale. Afai o loo e mataala ma nofouta i le tausia o le saogalemu, o le a e iloa mamao atu le mea o loo tupu ma gaoioi loa.

E tai faapena foʻi talanoaga. E te iloa gofie lava pe a oo atu talanoaga i tala taufaaleaga. Pe a tupu lenā mea, pe mafai ona e ʻalo ai e pei ona e ʻalofia se faafitauli i le auala? A e lē faia faapea, ia nofouta i āuga lē lelei o le faitala. Na faamatala mai e Mika faapea, “Sa ou faia se tala lē alofa e faatatau i se teineitiiti e faapea, e valea lona ulu i tama, ma sa mulimuli ane ona iloaina. E lē galo iā te aʻu lona leo ina ua ma talanoa, i lona tigā i aʻu faamatalaga soonafai. Sa ma talatalanoa e faaleleia le ma va, ae e leʻi lelei oʻu faalogona ona ou te iloa ua tigā faalogona o se tasi iā te aʻu!”

O le mea moni, e ono manaʻomia le lototele e te ʻalofia ai ni talanoaga e ono oo atu i tala taufaaleaga. E ui i lea, na faapea mai Kaloline, e 17 ona tausaga: “E tatau ona e faaeteete i au tala e fai. Afai e lē maufaatuatuaina le mea na maua mai ai au tala, e te ono faasalalau ni pepelo.”

Ina ia lē aafia i tala taufaaleaga, ia mulimuli i mau nei o le Tusi Paia:

“O le tele o upu e lē oge solitulafono ai; a o lē ua taofi ona laugutu, o le tagata poto lea.” (Faataoto 10:19) O le tele o lou tautala, e faigofie ai ona faia se tala e mulimuli ane e salamō ai. E sili atu le iloa o oe e tagata o sē e filemu nai lo o se tagata tautala soo!

“E manatunatu le loto o lē amiotonu, ina ia fai se tali; a o gutu o ē amio leaga, e luai mai ai mea leaga.” (Faataoto 15:28) Ia mafaufau muamua a o leʻi tautala!

“Ia taʻitasi outou ma tautala i le mea moni ma lona tuaoi.” (Efeso 4:25) A o leʻi tautala, ia faamautinoa e moni au faamatalaga.

“E pei ona outou mananaʻo e faia mai e tagata iā te outou, ia faapea lava ona outou faia iā i latou.” (Luka 6:31) E tusa lava pe  moni tala o le a e fai atu ai, ia fesili ifo iā te oe lava, ‘O ā ni oʻu faalogona pe afai e fai e nisi nei tala iā te aʻu?’

“Seʻi tatou tausisi i mea e faatupu ai le filemu, ma mea e atiaʻe ai e le tasi le isi.” (Roma 14:19) E oo lava i faamatalaga e moni e mafai ona faatigā ai isi pe a lē faalaeiauina ai.

“Ia faia ma o outou sini le ola i se olaga toʻafimālie, ia aua le isuisu fua i mea a isi, ma ia galulue i o outou lava lima.” (1 Tesalonia 4:11) Aua le naunau tele i mea o fai e isi. E tele atu isi mea aogā e faaalu ai lou taimi.

Pe a E Aafia Ai

E faigofie ona e faapea e pulea le laulaufaiva ma ʻalofia le faitala e faatatau i isi. Ae afai o oe lea e fai i ai tala, atonu e matuiā atu lenei mea iā te oe. Na faapea mai Ioana e 16 ona tausaga o lē na aafia ona o ni tala taufaaleaga, “Sa ou faapea e lē toe maua ni aʻu uō. O nisi pō ou te tagi ai. Sa matuā taʻuleagaina loʻu igoa!”

O le ā e fai pe a e aafia i tala e lē moni?

▪ Vaai i le pogai ua fai ai nei tala. Ia taumafai e malamalama i le māfuaaga e faitala ai tagata. E fiafia nisi e fai tala, auā e lauiloa ai ma foliga mai e latou te iloa mea uma. Na faapea mai Kaline e 14 ona tausaga, “E latou te fia taʻutaʻua ona o le talanoa e faatatau i isi.” O le lē mautonu atonu e taufaaleaga ai e nisi talavou ia isi, ina ia lelei ai o latou faalogona. Na toe faapea atili mai Lene lea e 17 ona tausaga. “E lē o fiafia tagata. E latou te mananaʻo e faatele ni mea e tutupu i o latou olaga e ala i le faatupu o tala.”

▪ Ia Pulea Ou Faalogona. O se tasi ua faamanuʻalia i tala taufaaleaga ae lē taulau i le puleaina o ona faalogona mā, e na te ono tali atu ai i se auala e mulimuli ane salamō ai. O loo faapea mai le Faataoto 14:17: “O lē itagofie ua amio faavalea o ia.” E ui e lē faigofie, a o le taimi tonu lea e matuā faaalia ai le pulea. A e faia faapea, o le a e ʻalofia le fai o mea o loo faia e lē o loo feaveaʻia tala e faatatau iā te oe.

▪ Ia iloa le māfuaaga ua fai ai. Seʻi fesili ifo iā te oe lava: ‘Po o oʻu mautinoa o aʻu lea o loo faatatau i ai nei tala? Po o se tala feaveaʻi pe māfua ona o le lē femalamalamaaʻi? Po o oʻu faatāuaina tele oʻu faalogona?’ Ioe, e leai se faamolemolega mo tala taufaaleaga. Peitaʻi, o le soona tali atu e sili atu ona faaleagaina ai oe nai lo āuga o le tala na fai. Aiseā e te le faaaogā ai le fautuaga a Lene. “E masani ona tigā loʻu loto pe a fai e se isi se tala leaga iā te aʻu, ae ou te taumafai e pulea loʻu ita. Atonu o le vaiaso e sosoo ai o le a ia talanoa e faatatau i se isi po o nisi foʻi mea.” *

Le Tali Sili

O loo faailoa mai e le Tusi Paia, “Auā e sesē i tatou uma i mea e tele. Afai e lē sesē se tasi i lana tautala, o le tagata lea ua lelei atoatoa, auā ua mafai ona ia pulea lona tino atoa.” (Iakopo 3:2) O lea la, e lē atamai le amanaʻiaina o faamatalaga uma e faia e faatatau iā i tatou. O loo faapea mai le Failauga 7:22: “Ua iloa lou loto, o oe lava ua atu lasi ona e fetuu i nisi tagata.”

A o e fesagaʻi ma tala taufaaleaga, o le auala sili e te tali atu ai, o lau amio lelei. Na faapea mai Iesu: “E faamaonia le poto o se tasi i ana galuega amiotonu.” (Mataio 11:19) O lea la, ia taumafai moni e faaleuō ma alofa atu. Atonu e faateʻia oe i le vave ona taofia o le faitala pe a faaalia na uiga, ma o le a fesoasoani iā te oe e onosaia āuga o le faitala.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ E faapefea ona e ʻalofia le faia o tala e faatatau i isi?

▪ E faapefea ona e tali atu pe a feaveaʻi e nisi ni tala e faatatau iā te oe?