Auala 7

Fai se Faaaʻoaʻoga Lelei

Aiseā e tāua ai? E aʻoaʻoina se lesona mai gaoioiga, ae e na o faamatalaga e maua mai i upu. O se faataʻitaʻiga, atonu e fai atu mātua i le fanau e tautatala ma le faaaloalo i mea moni. Peitaʻi, afai e eʻē le matua i le isi po o le fanau foʻi, ma fai ni faamolemolega pepelo e ʻalofia ai ni mea e ono tupu, ua la aʻoaʻo le fanau o le auala lea e talafeagai mo tagata matutua. Na faapea mai le tusitala o Dr. Sal Severe, “o le faaaʻoaʻo i mātua o se auala sili lea e aʻoaʻo ai le fanau.”

Le māfuaaga e faigatā ai: E lē lelei atoatoa mātua. Na faapea mai le aposetolo o Paulo: “Ua agasala tagata uma lava, ma ua lē ausia le mamalu o le Atua.” (Roma 3:23) Na tusi le soo o Iakopo e faatatau i le puleaina o a tatou tala: “E lē mafai e se tagata ona pulea lona laulaufaiva.” (Iakopo 3:8) E lē gata i lea, e masani ona tofotofoina e le fanau le mea e gata ai le onosai o mātua. Na faapea mai Larry o se tamā e lē gaoiā, ma e toʻalua lana fanau, “Ou te ofo ona o le faigofie ona faaita o aʻu e laʻu fanau.

Le auala e faaleleia ai: E ui ina lē lelei atoatoa, ae taumafai pea e fai se faaaʻoaʻoga lelei. Afai e iai taimi e sesē ai, ia faaaogā ou uiga lelei ia maua ai se lesona tāua mo le fanau. Na faapea mai Kilisi o se tamā e toʻalua lana fanau, “Pe a ou ita i laʻu fanau ma ou faia se faaiʻuga lē lelei e aafia ai i latou, ou te taʻutino atu loʻu sesē ma faatoese atu. Na iloa ai e laʻu fanau e sesē foʻi mātua, ma e ao ona matou galulue uma e faaleleia o matou uiga.” Na faapea mai Koloseta lea na taʻua muamua: “Talu ai ou te faatoese i laʻu fanau teine pe a ou ita, ua la aʻoaʻoina foʻi se lesona e faatoese pe a la faia se mea sesē.”

O loo faapea mai Ieova le Atua: “Aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.” (Efeso 6:4) Pe a fai mai se tagata e iai le pule e fai se mea, ae ese mea e na te faia, atonu e tele atu le lē fiafia o le fanau i lea tulaga nai lo tagata matutua. O lea la, seʻi fesili ifo iā te oe lava i faaiʻuga o aso taʻitasi: Pe a ou lē fai atu se upu i le aso atoa, o ā ni lesona na aʻoaʻoina e laʻu fanau mai aʻu gaoioiga? Po o lesona lava nei o oʻu taumafai e aʻoaʻo atu i aʻu faamatalaga?

[Faamatalaga faaopoopo i le itulau 9]

“O oe lē e aʻoaʻo atu i le tasi tagata, e te lē aʻoaʻo ea oe iā te oe?”—Roma 2:21

[Ata i le itulau 9]

Pe a faatoese atu se matua, e iloa foʻi e le tamaitiiti ona faia faapea