Auala 6

Ia Amanaʻia Faalogona o Lau Fanau

Aiseā e tāua ai? E mananaʻo ma e manaʻomia e le fanau tagata e aupito i tāua i o latou olaga, o mātua, ia iloa o latou faalogona. A fai ma masani a mātua le faatautee pe a faaalia mai faalogona o le fanau, atonu o le a lē toe faailoa atu o latou faalogona ma lē mautonu i lo latou mafai ona mafaufau mo i latou lava.

Le māfuaaga e faigatā ai: E ono faaali atu manatu ma faalogona o se tamaitiiti i se auala soonafai. O le mea moni, o nisi o mea e fai atu ai le fanau e lē logolelei i mātua. O se faataʻitaʻiga, o se tamaitiiti ua matuā lē fiafia, atonu e faapea mai, “E sili ai pe a ou oti.” * Atonu e toe tali atu le matua faapea, “Tuu au tala valea!” Atonu e popole mātua faapea o le amanaʻiaina o faalogona po o mafaufauga lē fiafia o le fanau, e ono faaopoopo atu ai i lona lē fiafia.

Le auala e faaleleia ai: Ia faatatau le fautuaga a le Tusi Paia, “Ia faalogologo lelei tagata uma, aua le vave ona tautala, ma aua foʻi le vave ona ita.” (Iakopo 1:19) Ia mātau, na amanaʻia e Ieova le Atua ia faalogona lē fiafia o le tele o ana auauna faamaoni, e ala i le tusiaina i le Tusi Paia. (Kenese 27:46; Salamo 73:12, 13) O se faaaʻoaʻoga, ina ua fesagaʻi Iopu ma tofotofoga matuiā, sa ia manaʻo e oti.—Iopu 14:13.

Ioe, na manaʻomia e Iopu ona faasaʻo ona mafaufauga ma faalogona. Nai lo le teena o faalogona o Iopu po o le taofia o ia mai le faaalia o ona manatu, sa amanaʻia e Ieova Iopu e ala i le onosai ma le tuu atu o le avanoa e sasaa atu ai le mea o i lona loto. Mulimuli ane, na faasaʻoina o ia e Ieova i se auala alofa. Na faapea mai se tamā Kerisiano, “Ona e tuu mai e Ieova le avanoa iā te aʻu e faaali atu ai oʻu faalogona iā te ia, ua ou faapea ai, e talafeagai foʻi le faaali mai o faalogona lelei ma lē lelei o laʻu fanau iā te aʻu.”

O se isi taimi e toe faaosoosoina oe e fai atu i lau tama, “E lē saʻo na manatu” po o le “Aiseā ua e mafaufau ai faapena,” ia manatua upu lauiloa a Iesu: “Pei ona outou loto i tagata ona ia latou faia iā te outou, ia faapea lava ona outou faia iā te i latou.” (Luka 6:31) O se faaaʻoaʻoga, seʻi faapea e lē lelei le auala o loo faia ai oe e tagata o le fale faigaluega, ona o oe lava. E faaali atu ou faalogona ootia i sau uō lelei, ma faapea atu ua e fiu i lau galuega. O le ā le mea e te manaʻo i lau uō e fai? Po o le faapea atu iā te oe e lē o iai ni ou faalogona faapena, ma vave faapea atu o oe le pogai o le faafitauli? Pe e te fia manaʻo e faapea atu lau uō: “Talofa e, ai se faigatā o le mea ua e oo i ai. E mautinoa e lē faigofie”?

E faigofie i le fanau ma tagata matutua ona talia fautuaga, pe a latou iloa o le tagata lea e tuuina atu le fautuaga e malamalama i faafitauli o loo latou fesagaʻia. O loo faapea mai le Tusi Paia: “O le loto o lē ua poto, e poto ai lona gutu; e faaopoopoina ai foʻi le poto i ona laugutu.”—Faataoto 16:23.

E faapefea ona e mautinoa o le a taliaina fautuaga e te tuuina atu?

[Faaopoopoga i lalo]

[Faamatalaga faaopoopo i le itulau 8]

“O lē na te tali atu i le upu, a o leʻi faalogo i ai, e fai lea mona valea.”—Faataoto 18:13