Auala 5

Ia Fai se Faasologa Lelei ma Tumau i Ai

Aiseā e tāua ai? Ua avea faasologa ma vaega tāua o le olaga o tagata matutua. O galuega, tapuaʻiga, ma faafiafiaga e masani ona iai ni ona faasologa. E leai se lelei o le fanau, pe a lē aʻoaʻoina i latou e faatulaga o latou taimi ma pipii atu i se faasologa. Na faapea mai Dr. Laurence Steinberg, “Ua faaalia mai i suʻesuʻega, o le iai o tulafono ma ni faatulagaga, o le a lagona ai e se tamaitiiti le saogalemu ma aʻoaʻoina o ia e maua le pulea totino ma lē faalagolago ai i isi.”

Le māfuaaga e faigatā ai: E pisi le olaga. E toʻatele mātua e faigaluega mo se taimi umi, atonu e tau leai se taimi e mafuta ai ma le fanau. O le faia ma le faatumauina o se faasologa, e manaʻomia ai le pulea totino ma le tinoū e manumalo i le musuā o se tamaitiiti e mulimuli i lenā faasologa.

Le auala e faaleleia ai: E mafai ona faatatauina lenei taʻiala mai le Tusi Paia i aiga, “Ae ia faia mea uma i se tulaga talafeagai ma le maopoopo.” (1 Korinito 14:40) O se faataʻitaʻiga, a o laiti le fanau, e toʻatele mātua e faia se faatulagaga mo le taimi e momoe ai. Peitaʻi, e tatau ona sologa lelei le taimi e momoe ai. Na faapea mai Tatiana o se tinā e nofo i Eleni ma e toʻalua lana fanau teine laiti: “Pe a lata i le taimi e momoe ai laʻu fanau, ou te milimili i laʻua ma taʻu i ai aʻu mea na fai a o la ō i le aʻoga. Ona ou fesili lea i ai, pe la te fia taʻu mai se mea na tupu i lenā aso. O le taimi lea ua toʻa ai i laʻua, ma i le tele o taimi la te taʻu mai iā te aʻu mea na tutupu.”

E faitau e le toʻalua o Tatiana o Koloseta ni tala i le la fanau teine a o leʻi momoe. Na ia faapea mai, “E faaali mai o la manatu e faatatau i le tala, ma o nisi taimi e taʻu mai ai ma o la mafaufau i ai. E lē taulau aʻu taumafaiga pe a na o na ou fai i laʻu fanau teine e taʻu mai mea o loo la popole ai.” A o faasolo ina matutua tamaiti, ia fetuutuunaʻi le taimi e momoe ai. A faaauau pea lenei masaniga, atonu o le a faaaogā e lau fanau lea taimi e talanoa atu ai.

E lē gata i lea, ia taumafai ia iai se ʻaiga o le aso e aai faatasi ai le aiga. Atonu e manaʻomia ai ona fetuutuunaʻi taimi e aai faatasi ai. Na faapea mai Salesa o se tamā e toʻalua lana fanau teine, “O nisi taimi ou te tuai mai ai i le galuega. Atonu e avatu e loʻu toʻalua sina meaʻai māmā iā i laʻua e faatalitali mai ai aʻu, ae faamautinoa e loʻu toʻalua o loo iai uma tagata o le aiga i le taimi o le meaʻai. Matou te talatalanoa i mea na tutupu i le aso, iloilo se mau o le Tusi Paia, talatalanoa i faafitauli, ma fiafia faatasi. E lē mafai ona ou faamatalaina le tāua tele o lenei masaniga, lea e fesoasoani i le mauaina o le fiafia i le aiga.”

Ina ia manumalo i lenei vala, aua neʻi faatagaina le saʻilia o meafaitino e taofia ai faasologa lelei a le aiga. Ia faatatau le fautuaga a le Tusi Paia, “ia outou faamautinoa o mea e sili ona tāua.”—Filipi 1:10.

O ā nisi mea e mafai e mātua ona faia e faaleleia ai fesootaʻiga ma le fanau?

[Faamatalaga faaopoopo i le itulau 7]

“Ae ia faia mea uma i se tulaga talafeagai ma le maopoopo.”—1 Korinito 14:40