Auala 4

Ia Iloa e Tamaiti Tulafono ma ia Faamalosia

Aiseā e tāua ai? Na faapea mai se tagata suʻesuʻe i le Iunivesite o Georgia e suafa iā Ronald Simons: “O le mea moni, e sili atu tulaga o tamaiti e iloa tulafono ma iʻuga e oo i ai pe a solia na tulafono. Pe a lē manino i le fanau tulafono ma aafiaga ona o le solia o na tulafono, o le a latou manatu faapito, lē fiafia, ma lē fiafia uma ai i tagata o loo latou feagai.” O loo faapea mai le Tusi Paia: “O lē ua alofa i lana fanau, e na te aʻoaʻia i latou.”—Faataoto 13:24, New Century Version.

Le māfuaaga e faigatā ai: E tele taimi, taumafaiga, ma le onosai e manaʻomia e faamalosia ai tapulaa talafeagai mo le fanau. E iai i le fanau le uiga o le finau pe faatautee e tusa o na tapulaa. Na feagai Mika ma Sonia ma le luʻi o le tausia aʻe o le la fanau e toʻalua. Na la faapea mai, “E laiti tamaiti ae iai lava o latou mafaufauga ma faanaunauga, le natura na fananau mai ma tagata, o le fai o le agasala.” E alolofa moni nei mātua i le la fanau teine. Ae na la taʻutino mai, “O nisi taimi, e faalogogatā ma manatu faapito ai le fanau.”

Le auala e faaleleia ai: Ia faataʻitaʻi i le auala na feutagaʻi ai Ieova ma le nuu o Isaraelu. Se tasi o auala na faaali atu ai lona alofa mo ona tagata, o le faamanino atu lea o tulafono e ao ona latou mulimuli i ai. (Esoto 20:2-17) Sa ia faailoa atu le iʻuga pe a lē usitaia na tulafono.—Esoto 22:1-9.

O lea la, aiseā e lē faia ai se lisi o tulafono i le aiga, lea e te lagona e tatau ona usitaia e le fanau. Ua manatu nisi mātua e lava ni tulafono e lima pe ono e tusia i lalo. O se lisi puupuu o tulafono ua muaʻi iloiloina mo le aiga, e faigofie ona faamalosia ma manatuaina. I autafa o na tulafono, ia tusi ai le iʻuga pe a solia. Ia faamautinoa e paleni faasalaga ma o loo e sauni e faamalosia. Ia fai ma toe iloilo na tulafono, ina ia iloa lelei ai mea e faatalitalia i le aiga atoa, e faaaofia ai tinā ma tamā.

Pe a solia na tulafono, ia vave faamalosia faasalaga, i se auala filemu ma maumauaʻi. Ia manatua: Afai o e ita, faatali seʻi teʻa lou ita ona faatoʻā avatu lea o se aʻoaʻiga. (Faataoto 29:22) Peitaʻi, aua le tuu i se isi taimi pe faia ni feutagaʻiga ma lau tamaitiiti. A e faia faapea, o le a mafaufau lau tama e lē tāua na tulafono. E faapea foʻi le manatu o loo i le Tusi Paia: “Auā ua lē vave faaootia le sala i le amio leaga, o le mea lea ua matuā naunau ai loto o tagata e fai mea leaga.”—Failauga 8:11.

O le ā se isi auala e mafai ona faaalia ai lau pule, ina ia maua ai e lau fanau aogā?

[Faamatalaga faaopoopo i le itulau 6]

“A ia avea la outou upu, o le Ioe, ia ioe ma le Leai, e leai.”—Mataio 5:37