Auala 3

Ia Iloa o Oe o le Pule

Aiseā e tāua ai? Ua faaalia mai i suʻesuʻega a le mekasini o le Parents, o “tamaiti e tausi aʻe e ni mātua e alolofa toe saʻo le pule, ma latou te lagolagosua i le fanau a o le taimi e tasi e maumauaʻi e tausia tapulaa ua faataatitia, e avea o ni tamaiti e taulau i le aʻoga, faapea le va ma isi, e mautinoa iā i latou lava, ma e sili atu lo latou fiafia nai lo tamaiti e iai ni mātua e tuufau i latou pe sauā foʻi.”

Le māfuaaga e faigatā ai: Mai lava i le taimi a o pepe seʻia oo i lona talavou, e faatautee lava le fanau i lau aiā e pulea ai i latou. Na faapea mai le tusitala o le tusi Parent Power! o John Rosemond: “E vave ona mātauina e le fanau pe a faatalatū mātua e faamalosia le latou pule, ma faatalitalia e lolo atu.” Na ia faapea mai: “Pe a tulaʻi mai taimi e ao ai ona pule mātua ae lē faia, o le a vave lava ona pule fanau.”

Le auala e faaleleia ai: Aua e te popole ina neʻi faaesea lau fanau pe ootia o latou faalogona pe a faamalosia lau pule. E leʻi fuafuaina e Ieova le Atua o lē na Amataina le olaga faaleaiga, ina ia tutusa le leo o le fanau ma mātua i le puleaina o le aiga. Nai lo lea, na ia tofia mātua ia pule, ma ia faatonuina tamaiti: “Ia usiusitai i o outou mātua.”—Efeso 3:14, 15; 6:1-4.

E mafai ona e pule e aunoa ma lou pulepuletutū. E faapefea? E ala i le mulimuli i faaaʻoaʻoga a Ieova. E iā te ia le malosi e faamalosia ai tagata e faia lona finagalo, ae o loo ia augani mai i o tatou uiga lelei. O loo faapea mai le Tusi Paia: “E! ana uaʻi mai ou taliga i aʻu poloaʻiga, po ua tusa ma se vaitafe lou manuia.” (Isaia 48:18) E manaʻo Ieova e tatou te usiusitai iā te ia, ona o lo tatou alolofa iā te ia ae lē ona o le fefe. (1 Ioane 5:3) E paleni mea e na te faatalitalia mai iā i tatou, ma na te silafia o le a mauaina aogā pe a tatou ola e tusa ma amioga tatau.—Salamo 19:7-11.

E faapefea ona e mautinoa o loo paleni le auala e faaalia ai lau pule o se matua? Muamua, e ao ona e iloa o le mea lea e manaʻomia e le Atua mai iā te oe. Lona lua, e tatau ona e mautinoa o le ola e tusa ma tapulaa tau amio a le Atua, o le auala sili lea mo oe ma lau fanau.—Roma 12:2.

O le ā tonu le auala e faatino ai lau pule?

[Faamatalaga faaopoopo i le itulau 5]

“Ia e aʻoaʻi i lou atalii, . . . e tupu ai le fiafia i lou loto.”—Faataoto 29:17.