Ua Fesili Mai Talavou . . .

O le ā e Fai pe a Misa Oʻu Mātua?

E LĒ mafai ona e ʻaloese mai le aafia i le misa a ou mātua. Auā e te alofa ma faalagolago iā i laʻua mo le tausiga o oe. O lea pe afai ua amata ona lē toe faifaimea faatasi ou mātua, o le a faapopoleina ai oe. Aiseā ua eseese ai manatu a ou mātua?

Eseese Manatu

Na fetalai Iesu, pe a uma ona faaipoipo se tane ma se fafine, ona avea ai lea o i laʻua ma “tino e tasi.” (Mataio 19:5) Ae e lē faapea ai o le a tutusa uma mea e manatu i ai lou tamā ma lou tinā. O le mea moni o le a iai taimi e lē malie ai le tasi i manatu o le isi, ma e tupu lea tulaga i ni tagata se toʻalua, e oo lava i se tane ma se avā o loo māfana le la mafutaga.

E lē faapea a eseese manatu o ou mātua, ona faapea lea ua lē alofa le tasi i le isi. E lē taumatea o loo alofa pea, e tusa lava pe faatigā le tasi i le isi i nisi o taimi. Ae aiseā la e misa ai ou mātua? Atonu e eseese o la manatu e faatatau i nisi o mataupu a le aiga, ae e lē leaga lenā tulaga, auā e lē faapea o le a malepe ai le la faaipoipoga.

Seʻi faataʻitaʻi: Po ua lua matamata faatasi ma sau uō māfana i se ata o le TV, ma e iloa ai e ese ou manatu mai manatu o lau uō e faatatau i le ata? O le mea moni lenā. E oo lava i tagata o loo vavalalata le faiā, e iai lava taimi e matuā eseese ai lava o la manatu.

E faapena foʻi ou mātua. E ono popole uma i laʻua i le tamaoaiga o le aiga, ae eseese manatu i le auala e faaalu ai le tupe; e la te mananaʻo uma e fuafua se tafaoga a le aiga, ae eseese o la manatu i se nofoaga e fai ai; e la te mananaʻo uma foʻi ia lelei au aʻoga, ae eseese auala e la te uunaʻia ai oe e faia faapea. O le manatu tāua, e lē manaʻomia le tutusa lelei o manatu a ou mātua ina ia autasi ai. E oo lava i ni tagata se toʻalua o loo avea ma tino e tasi, e mafai lava ona eseese o la manatu i ni mataupu.

Ae aiseā e tauaʻimisa ai ou mātua pe a eseese o la manatu i nisi o taimi? Aiseā e misa ai fua ona o se mea faatauvaa na tupu?

Le Tulaga Lē Lelei Atoatoa

O le tele o misa a mātua e māfua mai ona o le lē lelei atoatoa. Na taʻua e le Tusi Paia: “E sesē i tatou uma i mea e tele. Afai e lē sesē se tasi i lana tautala, o le tagata lea ua lelei atoatoa.” (Iakopo 3:2) E lē lelei atoatoa ou mātua  ma e faapena foʻi oe. O i tatou uma lava e tatou te faia i nisi o taimi se faamatalaga e lē lelei ma faatigā ai i se tasi e pei o le “tutuʻi i le pelu.”—Faataoto 12:18.

Atonu na tupu foʻi lenā mea iā te oe. Seʻi e mafaufau pe e te manatua se taimi na e lē fiafia ai i manatu o se isi na māfana le lua faiā? Atonu o lenā ua e manatua, a ea! Na faapea mai se talavou e igoa iā Maria, * “E feeseeseaʻi uma tagata. Ae o le mea moni, o i latou o ē sa sili ona ou alofa i ai, na sili foʻi ona faatigā mai iā te aʻu, ai ona ua tele mea ou te faatalitalia mai iā i latou!” E iloa lelei e tane ma avā Kerisiano, e tele mea o loo faatalitalia e le tasi mai le isi, ona ua uma ona faataatia e le Tusi Paia tapulaa mo i latou. (Efeso 5:24, 25) E ono iai taimi e sesē ai i latou ona o le tino lē lelei atoatoa. O loo taʻua e le Tusi Paia: “Ua agasala tagata uma lava, ma ua lē ausia le mamalu o le Atua.”—Roma 3:23; 5:12.

O lea la, e lē o se mea e faateʻia ai pe a tulaʻi mai ni feeseeseaʻiga a ou mātua. Auā na tusi le aposetolo o Paulo e faapea, o ulugalii faaipoipo e mafai ona oo “puapuaga i o latou tino” iā i latou po o “tigā ma mafatiaga” e tusa ai ma le faaliliuga a le The New English Bible. (1 Korinito 7:28) O nisi mea e māfua ai ona mafatia le aiga: pe afai e galue se tasi o ou mātua i se pule e faamaliegatā, o le uumi o taimi e malaga ai i le galuega, ia po o le lē lava foʻi o le faasoa.

O le iloaina e lē lelei atoatoa ou mātua ma e mafatia i nisi o taimi ona o mea e tutupu, o le a iai se vaaiga saʻo iā te oe pe a misa ou mātua. Na iloa e Maria lenā manatu ina ua ia faapea mai, “Ua sili atu ona misa oʻu mātua i le taimi nei nai lo le taimi muamua, ma ou manatu ai ua amata ona musu le tasi i le isi. Ae na ou toe mafaufau e faapea, ‘E lē faigofie, auā ua 25 tausaga talu ona faaipoipo ma o se galuega faigatā foʻi le tausia o le fanau e toʻalima.’” O se mea lelei foʻi lou faaalia o le “tigā alofa,” e ala i le iloaina e tele tiute e ao ona fai e ou mātua.—1 Peteru 3:8.

Le Auala e Fesagaʻia Ai

E ao ona e iloa e lē lelei atoatoa ou mātua, ma e la te fesagaʻi ma le tele o faafitauli i aso uma. Ae o loo tumau pea le fesili, O le ā e fai pe a misa ou mātua? O nisi nei o vala e ao ona e taumafai i ai:

▪ Aua le osovale. (Faataoto 26:17) E lē o sou tiute le avatu o fautuaga po o le taumafai e faaleleia le misa a ou mātua. Auā o le a iʻu leaga au taumafaiga. Na faapea mai Saline, ua 18 ona tausaga, “Na ou taumafai e foʻia le misa a oʻu mātua, ae e tele lava ina la fai mai e leai saʻu aiā e faia ai faapea.” O lea la, ia tuu i ou mātua e la te foʻia o laʻua lava faafitauli.

▪ Aua le soona popole. (Kolose 3:13) E pei ona taʻua muamua, pe a misa ou mātua i nisi o taimi, e lē faapea ai o le a teteʻa i laʻua. O lea la, aua le soona popole pe a iai taimi e feeseeseaʻi ai ou mātua. Na fai mai Meilani ua 20  ona tausaga, e faatatau i ona mātua: “E tusa lava pe misa, ou te iloa o loo alofa le tasi i le isi, faapea foʻi le aiga. O le a la foʻiaina le la misa.” E faapena foʻi le tulaga o ou mātua pe a misa.

▪ Ia tatalo. E lē manaʻomia ona e natia ou faalogona popole. O loo taʻua e le Tusi Paia: “Ia e tuuina atu iā Ieova o mea e te popole vale ai; o ia lava na te tausia oe.” (Salamo 55:22) E mafai e le tatalo ona fesoasoani i ou popolega. Na tusi atu le aposetolo o Paulo i Filipi: “Ia faailoa atu o outou manaʻoga i mea uma lava i le Atua, . . .ona leoleoina lea o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Iesu Keriso.”—Filipi 4:6, 7.

▪ Ia faafiafia oe lava. E lē atamai lou popole i se mea e lē mafai ona e pulea. E ono aafia ai lou soifua mālōlōina i le soona popole. O loo taʻua e le Tusi Paia: “O le atuatuvale i le loto o le tagata ua faavaivai ai o ia.” (Faataoto 12:25) Ia taumafai e faafiafia oe lava e ala i le faatasitasi ma au uō faamāfanafana loto, ma fai nisi galuega lelei.

▪ Talanoa i ou mātua. E mafai lava ona e faailoa i ou mātua o loo aafia oe i le la misa, tusa lava pe lē mafai ona e foʻiaina. Ia filifili se taimi lelei e talanoa atu ai i se tasi o i laʻua. (Faataoto 25:11) Ia tautala atu ma le “agamalu ma le matuā faaaloalo lava.” (1 Peteru 3:15) Aua le faitioina ou mātua. Ia faamatala atu ou faalogona ona o le la misa.

Pe mafai ona e faataʻitaʻia auala o loo taʻua i luga? Atonu o le a gaoioi ou mātua tusa ai ma au taumafaiga. E tusa lava pe lē tali mai i laʻua, ae o le a faamalieina pea oe i le iloa e iai se mea e mafai ona e faia mo oe lava pe a misa ou mātua, e ui e lē mafai ona e foʻiaina.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ Aiseā e faigatā ai i mātua ona faifaimea faatasi i nisi o taimi?

▪ E faapefea ona e fesoasoani i sou tei laʻitiiti o loo matuā aafia i le misa a ona mātua?

[Pusa i le itulau 30]

SE FAAMANATU I MĀTUA

E lē maʻalofia le tutupu o faafitauli pe a faaipoipo. Ae e filifili lava oe po o le ā le auala e te foʻia ai faafitauli. Ua matuā aafia fanau pe a misa o latou mātua. E manaʻomia ona e uaʻi atu i lea tulaga auā o au mea e fai o le a faataʻitaʻi i ai lau fanau pe a oo i le taimi e latou te faaipoipo ai. (Faataoto 22:6) Aiseā e lē faaaogā ai le taimi lea e eseese ai manatu, e faaalia ai i lau fanau le auala e foʻia ai feeseeseaʻiga? Faataʻitaʻi auala nei:

Ia faalogologo lelei. O loo faatonuina i tatou e le Tusi Paia ina ia “faalogologo lelei tagata uma, ae aua le vave ona tautala, ma aua foʻi le vave ona ita.” (Iakopo 1:19) O le ‘taui atu o le leaga i le leaga,’ e atili ai ona tupu le misa. (Roma 12:17) E mafai lava ona e faalogologo atu i lau paaga, e tusa lava pe lē fia faalogo mai o ia.

Taumafai e faamatala ae aua le faitio. I se uiga filemu, ia faamatala atu ou lagona i lau paaga i le auala o loo e aafia ai i ona uiga na faaalia. (“Na tigā loʻu loto ina ua e. . . ”) ʻAlofia le taumafai e tuuaʻia pe faitioina lau paaga. (“E te lē alofa lava iā te aʻu.” “E lē taitai e fia faalogo mai.”)

Tuu i se isi taimi. O nisi taimi, e lelei pe a tuu le mataupu e talanoaina i se isi taimi pe a uma le ita. O loo taʻua e le Tusi Paia: “O le amataga o le finauga, o le tuuina atu lea o le vai; o le mea lea ina tuu ai ia le misa, manū ua lē tupu tele.”—Faataoto 17:14.

Faatoese i lau paaga ma lau fanau, pe a talafeagai. Na faapea mai Paina, e 14 ona tausaga: “Pe a misa oʻu mātua, e la te toe faatoese mai iā i maʻua ma loʻu tuagane matua ona e la te iloa o loo ma aafia ai.” O se tasi o vala aogā e te aʻoaʻo i lau fanau, o le auala e faapea atu ai ma le lotomaulalo, “Faamalie atu, ua ou sesē foʻi.”

Mo nisi faamatalaga, tagaʻi i le Ala Mai! o Aperila-Iuni, 2001, itulau e 8-14, ma le Awake! o Ianuari 22, 1994, itulau e 3-12.

[Ata i le itulau 29]

Aua le faitioina ou mātua. Ia faamatala atu ou faalogona