O se Tusi Paia e Malamalamagofie

“AFAI e te talitonu, o le Tusi Paia o le afioga lea a le Atua i tagata, o lona uiga o loo fesootaʻi mai le Atua iā i tatou. . . . O le gagana o loo tusia ai le Tusi Paia, e tatau ona faigofie ona malamalama ai, pe afai o loo aafia ai vala uma o lou olaga i lau tapuaʻiga.” O upu na na tusia e le alii poto o Alan Duthie i lana tusi o le Bible Translations: And How to Choose Between Them.

E ioe tagata e naunau i le Afioga a le Atua i na upu. Latou te matuā talitonu “o Tusitusiga Paia uma e mai le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.” (2 Timoteo 3:16) O le Tusi Paia, e lē o se tusi lotu ua pasiā. “O loo ola le afioga a le Atua ma e matuā malosi foʻi,” ma o loo iai le vaifofō moni mo faafitauli o loo tutupu i aso faisoo. (Eperu 4:12) Peitaʻi, ina ia malamalama ma usiusitaʻi tagata i le Tusi Paia, e tatau ona faaliliuina i le gagana e masani ai tagata i aso taʻitasi. Na tusia le Feagaiga Fou i le gagana masani a tagata Eleni, ae e leʻi tusia i le gagana maotua, lea na faaaogā e tagata popoto. Ioe, na tusia le Tusi Paia ina ia mafai ona faitau ma malamalama ai tagata lautele.

 O le māfuaaga lea ua faaliliuina ai Tusi Paia fou i gagana eseese, ma e anoanoaʻi iʻuga lelei ua maua mai ai. Ua mauagofie e tagata lautele a latou Tusi Paia. Ae e pau si ona lave, o le tele o nei Tusi Paia fou e lē saʻo ma e lē tutusa foʻi upu e faaaogā. O se faaaʻoaʻoga, o nisi o nei Tusi Paia e lē o manino mai ai le aʻoaʻoga a le Tusi Paia e faatatau i tagata ua maliliu, o agaga o tagata, ma le suafa o le Atua moni.

Ua fiafia tagata e naunau i le Afioga a le Atua ona o lea ua maua nei i le gagana Samoa le lomiga, O le Tusi Paia o le Lalolagi Fou o Tusitusiga Eleni. Na faasilasila e Molimau a Ieova le mauaina o lenei Tusi Paia fou iā Novema 2, 2007, i la latou Tauaofiaga Itumalo “Ia Mulimuli iā Iesu Keriso!” lea na faia i Apia i Samoa. E lē o filogia lenei Tusi Paia i talitonuga o lotu, ae e saʻo le auala ua faaliliuina ai, lea ua faatoʻā mafai ai nei ona malamalama lelei tagata i le Tusi Paia, aemaise i latou e leʻi malamalama i le gagana Eleni. Atonu e te manatu, po o ai na faaliliuina lenei Tusi Paia mataʻina?

O Tagata Faaliliu o Ē Viia le Atua

E ui lava e fou i tagata Samoa le Tusi Paia o le Lalolagi Fou o Tusitusiga Eleni, ae i tuā i le 1950, na maua ai uluaʻi kopi o lenei Tusi Paia i le gagana Peretania. O ē na lomia, o le Watch Tower Bible and Tract Society, o se Sosaiete o le Tusi Paia ua leva ona latou lomia le Tusi Paia. E tele mea e matilatila ai lenei lomiga fou. O se faaaʻoaʻoga, o le igoa o lenei Tusi Paia fou e ese mai i isi Tusi Paia ia e masani ona taʻua le vaega muamua “o le feagaiga tuai,” a o le vaega mulimuli o le “feagaiga fou.” Ua faapea mai le Watchtower o Setema 15, 1950: “O tane na iai i le komiti o le ʻaufaaliliu, ua faaali mai lo latou manaʻoga . . . ina ia lē faailoa mai i latou, aemaise ia aua neʻi lomia o latou igoa a o latou ola, pe feoti foʻi. O le māfuaaga na faaliliuina ai le Tusi Paia, ina ia faaeaea ai le suafa o le Atua soifua.”

I le 1961, na faalauiloa mai ai, ua iai lomiga atoa o le Tusi Paia o le Lalolagi Fou i le gagana Peretania. E ui lava e oo mai i le asō e leʻi faailoa maia igoa o ē na faaliliuina, ae ua tatou mautinoa māfuaaga na latou faaliliuina ai le Tusi Paia, aemaise o lo latou faamaoni i le Atua. O upu tomua nei o le Tusi  Paia o le Lalolagi Fou o le 1984: “O le faaliliuina o le Tusi Paia, e aofia ai le faaliliuina o manatu ma fetalaiga a Ieova le Atua i se isi gagana . . . O ē na faia lenei galuega faaliliu, o ni tagata e alolofa i le Atua o Lē o loo iai ona manatu i le Tusi Paia, ma ua latou manatu foʻi o lo latou tiute tauave lenei i luma o le Atua, o le saʻo lea ona faaliliuina o ona manatu ma ana folafolaga.”

E ui ina lelei o latou faanaunauga, ae pe na iai i le ʻaufaaliliu se agavaa e fai ai lenei galuega fitā? Ua finau mai nisi tagata popoto e faapea, e lē lelei le faaliliuga o se Tusi Paia pe afai e lē faailoa mai igoa o le ʻaufaaliliu, aemaise ni o latou faailoga maualuluga mai i aʻoga. Peitaʻi, e lē faapena tofā o isi tagata popoto. Ua faapea mai Alan S. Duthie: “Afai tatou te iloa po o ai ē na faaliliuina le Tusi Paia, pe e faamata e iloa ai po o se Tusi Paia lelei pe leai? Ailoga. Ae o le a manino lea tulaga pe afai e iloilo le auala o loo faaliliuina ai le Tusi Paia.” *

O le mea tonu lenā ua faia e le toʻatele o le ʻaufaitau. Ua silia i le 130,000,000 Tusi Paia atoa po o ni vaega o le Tusi Paia o le Lalolagi Fou, ua lomia i gagana e 64 i le lalolagi aoao. O ā ni aogā ua maua e i latou o loo faitau i ai?

Ua Faapaiaina ai le Suafa o le Atua

Na aʻoaʻoina e Iesu ona soo i le Mataio 6:9 ia tatalo: “Lo matou Tamā e o i le lagi, ia faapaiaina lou suafa.” O loo taʻua i le tele o Tusi Paia, “le Atua” po o le “Alii,” ae e lē o iai le suafa o le Atua. Ae e leʻi faapena Tusi Paia i aso anamua. Na iloa lelei le Atua ona o lona suafa o “Ieova,” lea e taʻua pe tusa ma le 7,000 taimi i uluaʻi Tusitusiga Eperu. (Esoto 3:15; Salamo 83:18) Peitaʻi, e leʻi toe taʻua e tagata Iutaia le suafa o le Atua i tausaga mulimuli ane, ona o o latou talitonuga faanuupō. Na oo lava ina aafia le faapotopotoga Kerisiano i nei talitonuga faanuupō, aemaise ina ua maliliu aposetolo o Iesu. (Faatusatusa le Galuega 20:29, 30; 1 Timoteo 4:1.) O ē na faia kopi o vaega o le Tusi Paia Eleni, na latou suia le suafa o le Atua o Ieova, i upu Eleni o le Kyʹri·os ma le The·osʹ, o lona uiga o “le Alii” ma “le Atua.”

O le mea e faafetai ai, ona e 237 taimi ua  toe tusia ai le suafa o le Atua i Tusitusiga Eleni (“Feagaiga Fou”), o le Tusi Paia o le Lalolagi Fou. E lē faapea o le manaʻo o le ʻaufaaliliu ua ala ai ona latou toe tusia le suafa o le Atua, ae ona o a latou suʻesuʻega māeʻaeʻa. O se faaaʻoaʻoga, o loo taʻua i le Luka 4:18 upu o loo i le Isaia 61:1. Na iai le suafa o Ieova i le mau lenā o le Isaia i uluaʻi tusitusiga Eperu. * O le mea lea, ua talafeagai ai ona faapea mai le Luka 4:18 i le Tusi Paia o le Lalolagi Fou: “Ua i oʻu luga le agaga o Ieova, auā ua ia faauuina aʻu e folafola le tala lelei i ē matitiva.”

O Tusi Paia faapena, e fesoasoani i le ʻaufaitau ina ia latou iloa ai le eseesega o Ieova le Atua, ma lona Alo e toʻatasi o Iesu Keriso. O se faaaʻoaʻoga, ua faapea mai le tele o Tusi Paia i le Mataio 22:44: “Ua fetalai ane le Alii i loʻu Alii.” Ae o ai o loo fetalai iā ai? O loo sii mai e lenei mau upu o le Salamo 110:1, lea o loo taʻua ai le suafa o le Atua i uluaʻi tusitusiga Eperu. O le māfuaaga lea ua faapea mai ai le Tusi Paia o le Lalolagi Fou: “Ua fetalai atu Ieova i loʻu Alii: ‘Ia e nofo i loʻu itu taumatau seʻia oʻu tuuina ou fili i lalo o ou vae.’” O lea la, o so o se tagata lava, e mafai ai ona ia iloa le eseesega o Ieova le Atua ma lona Alo, e pei ona faaalia i le Tusi Paia. (Mareko 13:32; Ioane 8:17, 18; 14:28) Ioe, e faalagolago i ai lo tatou faaolataga, auā ua faapea mai le Galuega 2:21: “E faaolaina foʻi i latou uma o ē valaau i le suafa o Ieova.”

E Saʻo ma Manino

E iai foʻi isi mea e matilatila ai le Tusi Paia o le Lalolagi Fou. Na filifilia tusitusiga Eleni e sili ona lelei a Westcott ma Hort, e fai ma faavae o lenei Tusi Paia. Na matuā faia ma le faaeteete le faaliliuga mai i uluaʻi tusitusiga Eleni ina ia saʻo ma tonu, ma ia faigofie ona malamalama i le gagana e pei ona masani ai tagata i aso nei. O le faia faapea, ua tausisi ai i manatu ma le agaga moni o uluaʻi Tusi Paia, ma ua mafai ai foʻi ona lautele le malamalamaga.

O se faaaʻoaʻoga, na faalaeiau e le aposetolo o Paulo Kerisiano i le Roma 13:1, ina ia “gauaʻi . . . i faipule silisili,” po o malo o le lalolagi. Ae ua fai mai nisi Tusi Paia, ua “faatūina e le Atua” nei malo. (O le Tusi Paia Samoa, lomiga o le 1884 & 1969) Ua faaaogā e nisi malo lenā mau ina ia lagolago ai a latou pulega tautalatasi. Peitaʻi, ua faaliliuina ma le saʻo e le Tusi Paia o le Lalolagi Fou lenei mau e faapea, “ua faataga e le Atua [nei faipule  silisili] e pule i o latou tulaga eseese.” * Ona o lea, ua tatou malamalama ai e faapea, e ui lava e leʻi filifilia patino e le Atua pule o le lalolagi, ae e na te tuu pea i latou e pule i o latou tulaga eseese. Peitaʻi, o nei pule uma e maulalo ifo i le pule a le Atua.

Ua faaliliuina foʻi e le Tusi Paia o le Lalolagi Fou le uiga moni o veape Eleni. O le tele o gagana i aso nei, e tuufaatasi veape ina ia iloa ai le taimi na tupu ai se mea, pe na tupu i le taimi ua teʻa, po o le taimi nei, po o le lumanaʻi. E faapena foʻi le gagana Eleni, e faaalia e veape le gaoioiga o loo faia: po o se gaoioiga puupuu, po ua māeʻa ona fai, po o faaauau foʻi ona fai. Ia mafaufau i fetalaiga a Iesu i le Mataio 6:33. O le veape Eleni lea ua maua mai ai le upu “saʻili,” e faaalia ai se gaoioiga faifai pea. O lea la, e tatou te malamalama atoatoa i fetalaiga a Iesu, ona o lenei faaliliuga: “Ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” Ua faaliliuina foʻi faapena le Mataio 7:7: “Ia talosaga atu pea, ona foaʻiina mai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai lea iā te outou.”—Tagaʻi foʻi i le Roma 1:32; 6:2; Kalatia 5:15.

E tele taumafaiga na fai ina ia tutusa faaupuga e faaaogā mo upu autū o le Tusi Paia o le Lalolagi Fou. O se faaaʻoaʻoga, ua faaliliuina le upu Eleni o le stau·ros’ i le “laau e faapuapuagatia ai.” O le faia faapea, ua iloa ai e tagata faitau na maliu Iesu i luga o se laau po o se pou, ae e leʻi maliu i luga o le koluse e pei o le talitonuga masani.—Mataio 16:24; 27:40.

Maua e le Lalolagi Aoao le Afioga a le Atua

Ae ua lē gata ai se taumafaiga i le Tusitusiga Eleni i le gagana Samoa. O loo iai foʻi se isi fuafuaga ina ia faaliliuina le Tusi Paia atoa. Pe e mafai ona mautinoa e le ʻaufaitau, ua saʻo ma tutusa le faaliliuina o le Tusi Paia Samoa e pei lava o le Tusi Paia Peretania?

Ioe, e mafai. O le māfuaaga, ona o loo vaavaai lelei e le Vaega Pule a Molimau a Ieova le galuega faaliliu. Na fai la latou filifiliga poto, e sili pe a pulupululima faatasi le ʻaufaaliliu e latou te faaliliuina le Tusi Paia i isi gagana. O le mea lea, na tofia ai ni ʻaufaaliliu o le Tusi Paia i nisi o atunuu i le lalolagi aoao. Na faatūina se matagaluega faapitoa i le ofisa ulu a Molimau a Ieova i le lalolagi aoao i Niu Ioka i Amerika, ina ia fesoasoani i le ʻaufaaliliu, ma tali a latou fesili, aemaise ia faamautinoa o loo tutusa le faaliliuina o le Tusi Paia o le Lalolagi Fou, i gagana eseese. Na faavaeina foʻi se polokalame i le komepiuta e fesoasoani i le ʻaufaaliliu o le Tusi Paia, lea e aogā tele i la latou galuega. Ioe, e mautinoa lava o se galuega telē e lē mafai ona faia e aunoa ma tagata e faatinoina. Ae o lenei polokalame komepiuta, ua fai ma faamāmā avega ina ia ausia ai le sini a le ʻaufaaliliu o le Tusi Paia, ia saʻo ma tutusa le faaliliuga o le Tusi Paia, e pei lava o le Tusi Paia o le Lalolagi Fou i le gagana Peretania. O se tasi o aogā o lenei polokalame, o loo maua ai upu faa-Peretania, atoa foʻi ma upu Eperu ma upu Eleni na faaliliu mai ai na upu faa-Peretania. E aogā tele lenei mea i le ʻaufaaliliu ina ia filifili lelei ai upu Samoa, e fetaui tonu ma upu faa-Peretania.

E iloa le taulau manuia o lenei galuega, pe a vaavaai i iʻuga lelei o loo iai. Matou te faalaeiauina outou ina ia faitauina le Tusi Paia o le Lalolagi Fou o Tusitusiga Eleni. E mafai ona maua sau Tusi Paia mai i Molimau a Ieova. E tele foʻi vala eseese o lenei Tusi Paia e tou te fiafia i ai, o se faaaʻoaʻoga: e manino ma faigofie ona faitau; o loo iai faamatalaga pito i luga e fesoasoani iā te outou ina ia vave maua mau; o loo iai foʻi faafanua; ma faaopoopoga e faaosonaunau. Ae o le mea e sili ona tāua, e mafai ona outou faitauina lenei Tusi Paia ma le mautinoa, na faaliliuina ma le saʻo fetalaiga a le Atua i se gagana e malamalamagofie.

[Faaopoopoga i lalo]

[Ata i le itulau 16, 17]

O vala eseese o le Tusi Paia o le Lalolagi Fou:

Na matuā fai ma le faaeteete le faaliliuga mai i uluaʻi tusitusiga Eleni, ina ia saʻo ma tonu, ma ia malamalamagofie le gagana e pei ona masani ai tagata i aso nei

[Ē Ana le Ata]

By courtesy of the Director and University Librarian, The John Rylands University of Manchester

[Ata i le itulau 15]

O loo iai faamatalaga pito i luga ina ia vave maua ai mau

O loo iai foʻi faafanua e iloa atili ai e le ʻaufaitau laueleele o le Tusi Paia

[Ata i le itulau 17]

[Ata i le itulau 18]

O le manino o le “Tusi Paia o le Lalolagi Fou” e aogā tele i le galuega talaʻi

[Ata i le itulau 16]

1 Timoteo 3:16, e pei ona tusia i le Codex Sinaiticus, i le senituri lona 4 T.A.

E manino ma faigofie ona faitau