Māfuaaga e Faatuatuaina ai le Tusi Paia

2. Faamaoni

E mafai ona iai le faavae e talitonu ai pe a faamaoni. O se tamāloa e iai sona talaaga o le faamaoni e faigofie ona e talitonu iā te ia, ae afai na pepelo iā te oe i se taimi, e tusa lava pe faatasi, e te ono lē toe talitonuina o ia.

O TUSITALA o le Tusi Paia o ni tamāloloa e faamaoni, ma latou te leʻi natia se mea i o latou loto. Ona o lo latou faamaoni, sa mafai ona faaalia mai ai le moni o mea na latou tusia.

Faaalia mea sesē ma vaivaiga.

E leʻi natia e tusitala o le Tusi Paia a latou mea sesē ma vaivaiga. Na faamatala e Mose lana mea sesē na fai, ma e matuiā āuga na oo iā te ia. (Numera 20:7-13) Na faapea mai Asafo na iai taimi na ia matauʻa ai i olaga manuia o ē amioleaga. (Salamo 73:1-14) Na faamatala e Iona lona lē usiusitai ma le leaga o ona uiga na iai muamua, ina ua toe alofa le Atua i ē na faia le agasala ae ua salamō. (Iona 1:1-3; 3:10; 4:1-3) Na taʻutino mai e Mataio lona tuulafoaʻia o Iesu i le pō na puʻea ai o ia.—Mataio 26:56.

E leʻi natia e tusitala o Tusitusiga Eperu le muimui ma le fouvale soo o o latou lava tagata. (2 Nofoaiga a Tupu 36:15, 16) Na faaalialia i lumamea e tusitala so o se tagata, e oo lava i taʻitaʻi o lo latou nuu. (Esekielu 34:1-10) I le faaalia o se faamaoni faapena, na tusia ai i tusi a aposetolo faafitauli matuiā na fesagaʻi ma Kerisiano, lea e aofia ai ma i latou na taʻimua, faapea foʻi ma nisi faapotopotoga i le uluaʻi senituri T.A.—1 Korinito 1:10-13; 2 Timoteo 2:16-18; 4:10.

O le mea moni e lē masuia.

E leʻi taumafai tusitala o le Tusi Paia e ufiufi mea e manatu i ai faapea o mea moni e faalumaina ai. Na taʻutino mai e uluaʻi Kerisiano le lē amanaʻiaina o i latou e le lalolagi, ma sa vaai na tagata iā i latou o ni ē e valea ma faatauvaa. (1 Korinito 1:26-29) Na faapea mai nisi tusitala, o aposetolo o Iesu o “ni tagata faatauvaa ma e leʻi lava so [latou] aʻoaʻoina.”—Galuega 4:13.

E leʻi tusia e tusitala o Evagelia ni faamatalaga sesē ina ia sili atu ona fiafia tagata iā Iesu. Nai lo lea, na latou tusia mea moni e pei o le fanau mai o ia i se nofoaga faatauvaa, i se aiga tau atiaʻe, e leʻi auai o ia i aʻoga taualoa i ona vaitaimi, ma o le toʻatele o ē na faalogologo iā te ia na teena lana feʻau.—Mataio 27:25; Luka 2:4-7; Ioane 7:15.

O lea la, e tele faamaoniga e iloa ai e faamaoni tusitala o le Tusi Paia. Po o e talitonuina i latou ona o lo latou faamaoni?

[Faamatalaga faaopoopo i le itulau 24]

O tusitala o le Tusi Paia e pei o Iona, e leʻi natia a latou mea sesē na fai