Ua Fesili Mai Talavou . . .

Aiseā e Ola ai i Tapulaa a le Tusi Paia?

O LOO e iai i le faleʻaiga ma o loo tou aai ma ni teineiti se toʻalua o le aʻoga. O loo tulimataʻi e le tasi teine le tama fou.

Na faapea atu le teine muamua iā te oe, “E te iloa, e fiaalu le tama le la iā te oe. Ou te iloa lava i le auala o loo faataupupula mai ai o ia iā te oe. O loo matuā naunau mai lava iā te oe!”

Na faapea atu le isi teine iā te oe a o ia faalatalata atu, “E te iloa? E leai sana uō!”

Na faapea mai le teine muamua, “O lea ua iai laʻu uō, ae manaia foʻi pe a ma uō!”

Ona fai mai lea e le teine muamua o le tala e te lē o fia faalogo i ai.

“Aiseā e leai ai sau uō tama?”

Na e iloa lava o le a fesiligia oe i lenā fesili. O le mea moni, o loo fia fai sau uō tama. Ae ua e iloa e tatau ona e faatali seʻia oo ina matua ma ua e sauniuni lelei mo se faaipoipoga ona faatoʻā fai lea o sau uō. Ana lē seanoa . . .

“Lau tapuaʻiga, a ea?” na faapea mai ai le teine lona lua.

Ua e mafaufau faapea, ‘e faapefea ona ia iloa le mea o i loʻu mafaufau?’

Na ula mai le teine muamua, “E te fai mai a oe o le Tusi Paia, Tusi Paia i taimi uma. Aiseā e te lē eva tasi ai i se isi taimi?”

Pe na oo se tulaga faapena iā te oe, ua ulagia oe ona o lou taumafai e tausisi i tapulaa o le Tusi Paia? Na faapefea ona e tali atu?

▪ Na e pipii ma le mautinoa i ou talitonuga o amioga mamā.

▪ Na lē lelei ou faalogona, ae sa e taumafai pea e faamalamalama atu ou talitonuga.

▪ Ua faia lau faaiʻuga e saʻo au uō i le aʻoga, ma ua tele mea lelei ua e misia ona o le ola i tapulaa a le Tusi Paia!

Pe na e mafaufau faapea i se isi taimi, ‘Pe e aogā ea loʻu ola e tusa ma tapulaa a le Tusi Paia?’ E faapena mafaufauga o se talavou e igoa iā Tepora. * Na ia faapea mai, “E pule lava aʻu uō i a latou mea e fai. E foliga mai e leai se isi e latou te tali atu ai. E faasāsā naʻuā tapulaa a le Tusi Paia. Ou te fiafia i le olaga saʻoloto o aʻu uō i le aʻoga.”

Pe e Sesē Lou Masalosalo i Aogā o Tapulaa a le Atua?

Na oo foʻi i le tusitala o le Tusi Paia o Asafo se taimi na ia masalosalo ai faapea, pe e aogā le ola i le auala e finagalo i ai le Atua. Na ia  faapea mai: “Na ou matauʻa i ē vālea; na ou vaai i le manuia o ē ua amio leaga. E moni lava, ua ou faamamāfuaina loʻu loto, ma aʻu fafano oʻu lima ina ua ou lē sala, a e fai fua lava.”—Salamo 73:3, 13.

E mautinoa lava, e silafia e Ieova le Atua, e iai taimi e fesiligia ai e tagata le aogā o le ola e tusa ai ma ana tapulaa. E ui i lea, o loo tusia pea manatunatuga o Asafo i le Tusi Paia. Mulimuli ane, na faia le faaiʻuga a Asafo, o le olaga sili le ola i tulafono a le Atua. (Salamo 73:28) Na faapefea ona ia faia lenā faaiʻuga? Ioe, na poto Asafo. Na ia faia lana faaiʻuga, e lē ona ua oo iā te ia ni puapuaga, ae ona ua ia aʻoaʻoina se mea mai mea sesē a isi na fai. (Salamo 73:16-19) Pe mafai ona e faia lenā mea?

Iloilo Totoʻa Mea Moni

E leʻi pei le tupu o Tavita o Asafo, na oo faigatā iā Tavita ma ia iloa ai mafatiaga e oo iā i latou e lē amanaʻia tapulaa a le Atua. Na mulilua Tavita ma le avā a se tasi o ana auauna, ma ia taumafai e ufiufi ana mea sesē na fai. O le mea na oo i ai, na tigā ai isi, e aofia ai ma le Atua, ma oo iā te ia le popole tele. (2 Samuelu 11:1–12:23) Ina ua salamō Tavita, na faagaeeina o ia e Ieova e faaalia mai ona faalogona i se pese, ma na tusia na upu i le Tusi Paia mo lo tatou lelei. (Salamo 51:1-19; Roma 15:4) E atamai ma e faale-Tusi Paia le aʻoaʻoina o se mea mai mea sesē a isi.

Ina ia fesoasoani iā te oe e faataʻitaʻi i le faaaʻoaʻoga a Asafo ae ʻalofia mea sesē a Tavita, tagaʻi i faamatalaga nei a talavou mai atunuu eseese, o ē na teena tapulaa a le Atua mo sina taimi. Aemaise lava na latou faia ni feusuaʻiga a o leʻi faaipoipo. E pei o Tavita, ua latou salamō mai a latou mea sesē, ma ua toe iai sa latou faiā lelei ma le Atua. (Isaia 1:18; 55:7) Tagaʻi i mea na latou faamatala mai.

Ala Mai!: O ā mea na aafia ai ou mafaufauga ma au gaoioiga?

Tepora: “Sa ou vaaia i le aʻoga e fai uma uō teine ma uō tama a tamaiti, ma e fiafia uma lava. Pe a matou tafafao ma ou vaai atu o feakisi ma fusifusi, ona oso aʻe lea o loʻu lotoleaga ma ua pei aʻu o se tagata ua lē amanaʻia. E tele taimi ou te mafaufau ai i se tama na ou fiaalu lava i ai. Na atili ai ona ou manaʻo e faatasi ma ia, e tusa lava po o le ā laʻu mea e fai ina ia taunuu ai loʻu faanaunauga.”

Mika: “Ou te faitau ma matamata i polokalame e faaautū atu i feusuaʻiga. O le talanoa ma aʻu uō i feusuaʻiga ua atili ai loʻu fia iloa. Pe a na o maʻua ma se teine, ou te mafaufau e mafai ona ma fepaʻiaʻi e aunoa ma le faia o ni feusuaʻiga, ma e mafai ona tuu i so o se taimi lava.”

Aneterea: “Na fai ma aʻu masani le matamata i ata lē mamā i le Initaneti. Sa ou inu tele i le ʻava malosi. Sa ou auai foʻi i patī ma talavou, o ē itiiti lava so latou faaaloalogia o tapulaa tau amio a le Tusi Paia.”

Terisa: “I le 16 o oʻu tausaga, na o le pau le mea na ou manaʻo i ai o le fia faatasi pea ma laʻu uō tama. Sa ou iloa e sesē le feusuaʻi a o leʻi faaipoipo, ae sa ou lē ʻinoʻino i ai. Ou te leʻi fuafua e faia ni feusuaʻiga ae ou te leʻi faaipoipo, ae sa manumalo oʻu faalogona i mafaufauga lelei. Mo sina taimi, e leʻi aafia loʻu lotofuatiaifo i lenei mea leaga.”

Ala Mai!: Pe na faafiafiaina oe i lenā olaga?

Tepora: “I le taimi muamua, na ou lagona ai le saʻoloto ma ua talia aʻu e tamaiti. E leʻi umi ona iai na faalogona. Sa ou lagonaina le leaga o laʻu amio, lē mamā, ma le lē aogā. Sa ou matuā lagona le salamō ona ua aveesea loʻu tulaga taupou, o se mea e lē mafai ona toe maua mai. Talu mai lenā taimi, e fai ma ou fesili ifo iā te aʻu, ‘O ai lava aʻu o le a ou lē aafia ai i āuga o aʻu mea sesē?’ ma ‘Aiseā, aiseā lava na ou teena ai tapulaa alofa a Ieova?’”

Mika: “Ua pei e lē o toe iai le isi vaega o loʻu tino. Na ou taumafai e faagalo āuga o aʻu gaoioiga na aafia ai isi, ae e leʻi mafai. Sa tigā tele loʻu loto ina ua ou iloa, na ou faatigā i isi ona o le faamuamuaina o loʻu fiafia. Na faigatā ona ou moe. Na iʻu ina faaitiitia le fiafia na maua mai feusuaʻiga lē mamā, ma oo ina  faatumulia oʻu mafaufauga i le tigā ma le masiasi.”

Aneterea: “Na faasolosolo ina faigofie atili le gaoioi e tusa ma faanaunauga sesē. A o le taimi e tasi, na faatumulia aʻu i faalogona agasala ma le lē fiafia.”

Terisa: “E leʻi leva ae ou feagai loa ma iʻuga lē lelei o laʻu mea sesē na fai. Ua faaleagaina loʻu talavou i amioga lē mamā. Sa ou faapea o le a ma fiafia ma laʻu uō tama. Ae leai. Na iʻu ina faatigā le tasi i le isi, ma atili ai ona faanoanoa. Ou te tagi i le tele o pō ma ou faapea, maʻimau pe ana ou tausisi i tapulaa a Ieova.”

Ala Mai!: O le ā se fautuaga e mafai ona e avatu i talavou e masalosalo e faapea, ua faasāsā naʻuā tapulaa tau amio a le Tusi Paia?

Tepora: “E lē lelei lou olaga pe a e tuulafoaʻia tapulaa a le Tusi Paia. Seʻi mafaufau i faalogona o Ieova pe a e mulimuli i ana fautuaga. Ia mafaufau lelei mo se taimi umi e faatatau i āuga o le lē amanaʻiaina o ana fautuaga. Ia manatua, e lē na o oe e aafia i mea e te manaʻo i ai. E aafia isi i au gaoioiga. A e teena le fautuaga a le Atua, o le a e faatigā iā te oe lava.”

Mika: “E moni, atonu e foliga e lelei olaga o au uō. Ae ia iloilo lelei le tulaga moni a o leʻi gaoioi. O nisi o mea e tāua tele na tuuina e Ieova iā te oe o lou mamalu ma lou tulaga mamā. O le lafoaʻia o na meaalofa tāua ona e lē mafai ona e pulea oe lava, o lou tuuina lea o oe i se tulaga faatauvaa lava. Talanoa i ou mātua po o nisi tagata matutua e faatatau i ou faafitauli. A e faia se mea sesē, ia vave talanoaina ma faasaʻo lenā mea. Pe a e faia mea e tusa ma ala o Ieova, o le a e mauaina le toʻafilemu.”

Aneterea: “Pe a lē lava lou poto masani, e matuā lelei lava olaga o au uō iā te oe. O le a e aafia i o latou uiga. Ia filifili ma le atamai au aumea. Ia faamoemoe atu iā Ieova, ona e sao mai ai lea i le tele o tigā.”

Terisa: “Aua e te faapea, ‘E lē mafai ona tupu iā te aʻu.’ Na lapataʻi mai loʻu tinā iā te aʻu, o le a matuā ou oo i le loto tigā pe a faaauau pea aʻu mea o loo fai. Na ou matuā ita lava! Na ou faapea e sili atu loʻu iloa. E leai. Ia e ola e tusa ma tapulaa a Ieova, ma auaumea faatasi ma i latou e fiafia i ai. O le a sili atu lou fiafia pe a e faia faapea.”

Tapulaa a le Tusi Paia, po o se Faasāsāga po o se Puipuiga?

Pe a ulagia oe e tamaiti ona o lou tausisi i tapulaa a le Tusi Paia, ona fesili ifo lea iā te oe lava: ‘Aiseā latou te teena ai le manatu o le ola e tusa ma amioga tatau o loo i le Tusi Paia? Po ua latou faitau i le Tusi Paia, ma iloa ai le tele o aogā e maua mai i le usitaia o tulafono a le Atua? Po ua latou iloa āuga matuiā o le lē amanaʻia o na tapulaa? A lē o lea, Po ua latou tau ina mulimuli i mea o loo faia e isi?’

Atonu e te iloa ni tagata o loo tau ina “mulimuli atu i le toʻatele.” (Esoto 23:2) Pe e te lē manaʻo e faia ni faaiʻuga saʻo? E faapefea ona e faia? E ala i le utagia o le fautuaga a le Tusi Paia ‘ina ia faamaonia e oe lava po o le ā le finagalo o le Atua, lea e lelei, e mālie, ma le lelei atoatoa.’ (Roma 12:2) O Ieova o “le Atua fiafia,” ma e na te finagalo ia e fiafia foʻi. (1 Timoteo 1:11; Failauga 11:9) O tapulaa o loo tusia i le Tusi Paia e mo lou lelei. E moni, atonu e te vaai i na tapulaa o ni faasāsāga i lou saʻolotoga. A o le mea moni, o amioga tatau o loo i le Tusi Paia ua pei o se fusipaʻu lea e puipuia ai le pasese mai se tulaga lamatia.

E mafai ona e talitonuina le Tusi Paia. Pe a e filifili e ola e tusa ma ana tapulaa, e lē gata o le a fiafia ai Ieova, ae tele aogā o le a e maua.—Isaia 48:17.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ O ā mea atonu e faigatā ai iā te oe ona e ola e tusa ma tapulaa a le Tusi Paia?

▪ Aiseā e tatau ai ona e faamaonia iā te oe lava, o le ola i tapulaa a le Atua, o le olaga aupito sili lea ona lelei?