Ua Fesili Mai Talavou

Aiseā e Lē talitonu ai Oʻu Mātua iā te Aʻu?

“Maʻimau pe ana tuu mai sina faatagaga e oʻu mātua ou te tafao ai. Ou te lē o fia alu i ‘o ma ‘o. Pau o lea, ou te fia alu e asi le tagata e pele iā te aʻu e pei o le tuafafine o loʻu tamā, ma e leai se mea o le a popole ai fua loʻu tinā faapea o le a ou alu ma ou alu atu ai lava.”—Sara, 18 tausaga. *

“E masani lava ona ou fesili i oʻu mātua pe aiseā e lē talitonu ai pe a ou fia alu ou te tafao i aʻu uō. O le la tala e masani ona fai mai: ‘E ma te talitonu iā te oe. Ae e ma te lē talitonu i au uō.’ O loʻu lē fiafia ia i le la tala lena!”—Tina, 18 tausaga.

E FAATUSAINA le talitonuina o oe e isi, e pei o le mauaina o tupe. E faigatā ona maua, ae e vave ona mou atu, ma po o le ā lava le tele e te maua, ae e lē taitai ona lava. Ua fai mai se teine e 16 tausaga e igoa iā Iuliana: “E so o se taimi lava ou te fia alu ai e tafao, e tuufesili mai oʻu mātua po o fea ou te alu i ai, o ai e matou te ō, o ā a matou mea e fai ai, ma le taimi e foʻi mai ai. E moʻi o fesili ia e tatau ona fesili ai oʻu mātua, ae o loʻu ita ia pe a tele mai fesili faapena!”

Po o iā te oe le lagona i nisi taimi maʻimau e, pe a na talitonu ou mātua iā te oe? Faamata o le ā se mea e mafai ona e faia ia la talitonu ai iā te oe? Seʻi o tatou vaai muamua, pe aiseā ua faigatā ai lenei mataupu i mātua ma a latou fanau talavou.

O Faigatā o le Tuputupu Aʻe

Ua faaalia mai i le Tusi Paia e sau le taimi e “tuua ai e le tane lona tamā ma lona tinā.” (Kenese 2:24) E faapena foʻi le tamaʻitaʻi. O lea la, po o oe o se tama po o se teine, ae o le taimi o lou talavou o se taimi tāua e saunia ai mo le taimi e avea ai ma tagata matua, pe a e tuua lou aiga pe fai foʻi sau fanau.

Peitaʻi ane, e lē otometi lou avea ma tagata matua, peiseaʻī o se mea e tupu faafuaseʻi pe a atoa sou tausaga patino. Ae e mafai ona faatusa i se alasitepu o loo e laalaa atu ai, a o faagasolo lou talavou. O lea la, atonu o le a eseese tou manatu ma ou mātua, po o lē fea sitepu ua e oo i ai. Ua faamatala mai e Maria le lē talitonu o ona mātua i ana uō e faapea: “Ua 20 oʻu tausaga ae e lē talitonuina lava aʻu e oʻu mātua. E iā i laʻua le manatu e faapea, ailoga a ou ʻalo ese mai mea leaga. Ua uma ona ou fai i ai, ua iai mea faapena ua ou ʻalo ese mai ai, ae e lē taitai talitonu mai!”

E pei ona iloa mai faamatalaga a Maria, ua avea lea mataupu o le lē talitonu o matua i fanau, ma mea e latou te feeseeseaʻi ai. Pe e faapena le tou aiga? Afai o lea, o le ā se mea e fai  ina ia talitonuina ai oe e ou mātua? Ma afai ua la lē talitonuina oe ona o se mea na e faia, o le ā e tatau ona fai ia toe faaleleia ai lea tulaga?

Ia Iloa Lou Faatuatuaina

Na tusi le aposetolo o Paulo i Kerisiano i le uluaʻi senituri e faapea: “Ia suʻesuʻe ifo pea iā te outou po o faapeʻī outou.” (2 Korinito 13:5) E moni e lē o tusi atu Paulo i talavou. Peitaʻi ane, e aogā lea taʻiala. Auā e faalagolago le talitonuina o oe, i le auala e te gaoioi ai, po o oe o se tagata e faatuatuaina. E lē faapea o le a e taumafai ia e lelei atoatoa. E leai, auā e leai se isi e sao mai mea sesē. (Failauga 7:20) Ae, i le tulaga masani, po o avea au amio ma mea e faigatā ai i ou mātua ona talitonuina oe?

O se faataʻitaʻiga, na tusi le aposetolo o Paulo e faapea: “Matou te mananaʻo ina ia faia mea uma ma le faamaoni.” (Eperu 13:18) Ia e fesili ifo iā te oe lava: ‘O fai ma aʻu masani le tautala saʻo i oʻu mātua i mea ou te alu i ai ma aʻu mea e fai? Seʻi mātau mai faamatalaga a nisi talavou, ina ua latou toe iloilo ma le faamaoni i latou lava e tusa ai o lea fesili.

Lori: “Sa ou imeli i se tama ou te fia alu i ai, ae e leʻi iloa e oʻu mātua. Na iʻu ina iloa e oʻu mātua ma fai mai e tuu. Na ou folafola iā i laʻua e lē toe faia, ae na fai lava. Na atoa le tausaga o fai laʻu amio lea. Ou te imeli lava i le tama, ae a maua e oʻu mātua ona ou faatoese lea, ma folafola e lē toe faia, ae e toe fai foʻi. Na oo ina lē toe talitonuina aʻu e oʻu mātua!”

O le ā sou manatu, aiseā na lē talitonu ai mātua o Lori iā te ia, ma ina ua talanoa atu ona mātua i le taimi muamua e tusa o lona faafitauli, o le ā sa tatau ona ia faia e faaalia ai o ia e faatuatuaina? Tusi lau tali i lalo.

․․․․

Pevalī: “E leʻi talitonuina aʻu e oʻu mātua i mea tau tama, ae o lea ua ou malamalama nei i le māfuaaga. E toʻalua ni tama sa ou faatafai ma fia taalo i ai, ae e lua tausaga e matutua uma ai iā te aʻu. E lē gata i lea, e alu le taimi o matou talanoa i le telefoni, ma e na o i laʻua e tele ina ou talanoa i ai pe a fai ni faatasitasiga. Na ave ese e oʻu mātua laʻu telefoni mo le masina, ma e leʻi faatagaina aʻu e alu i faatasitasiga e ō i ai tama ia.”

O le ā sou manatu, aiseā na lē talitonu ai mātua o Pevalī iā te ia, ma o le ā e mafai ona ia faia ia toe faaleleia ai lea tulaga?

․․․․

Aneta: “I le taimi a o oʻu aʻoga maualuga, ina ua uma se patī sa ma iai ma laʻu uō, sa ma ō i le fale e tofu i maʻua ma le apa pia e inu i se taimi mulimuli, e ui e lē faatagaina e o ma mātua. Na maua le apa pia a laʻu uō e lona tinā, ma na maua ai foʻi ma aʻu. O le mea na sili ona faigatā iā te aʻu, o foliga faanoanoa o loʻu tinā ina ua ia iloaina!”

Pe ana faapea la o Aneta o lou uso laʻitiiti, o le ā sau fautuaga iā te ia ina ia toe talitonuina ai o ia e le lua tinā?

․․․․

 Toe Talitonuina

Ae ā pe a faapea, ua lē talitonuina oe e ou mātua ona o au mea na fai, e pei foʻi o talavou ia na taʻua muamua? Pe afai o le tulaga lenā, ia e mautinoa, e mafai lava ona e toe faaleleia. E faapefea?

E lē taumatea o le a oo ina talitonuina oe e ou mātua, pe afai e faaauau ona e faaalia o oe e faamoemoeina. O se faataʻitaʻiga: Seʻi faapea o se tagata o loo iai sana aitalafu i le faletupe. Pe afai e toʻaga e togitogi lana aitalafu, o le a talitonuina o ia e le faletupe, ma atonu o le a talia e le faletupe se isi ana talosaga i le lumanaʻi. E faapena foʻi lou tulaga i le aiga. Afai e iloa e ou mātua o oe e faatuatuaina, e oo lava i mea iti, e lē taumatea o le a faatuatuaina foʻi oe e ou mātua i isi mea i le lumanaʻi.

Na oo ina malamalama Aneta i le mea lenā. Na ia fai mai: “E lē o iloa lelei le tāua o le faatuatuaina i le taimi lea e talavou ai. Ua ou iloa nei e tatau ona ou amio lelei, ma ia faia i se auala e tumau ai le faatuatuaina o aʻu e oʻu mātua.” O le ā se lesona? Aua le faitio ona o le lē faatuatuaina o oe e ou mātua, ae ia galue ina ia la faatuatuaina oe.

O se faataʻitaʻiga, po o oe o se tagata e faatuatuaina e tusa ai o mea o loo taʻua i lalo? Faailoga le pusa i autafa o mea ia e ao ona e galue i ai.

□ Foʻi i le fale i le taimi faatulagaina

□ Tausi taimi

□ Fai māeʻa feʻau

□ Tapena loʻu poto

□ Faaaogāina o le telefoni

□ Tausi i aʻu folafolaga

□ Faaaogā lelei aʻu tupe maua

□ E lē tau fafaguina i le taeao

□ Tautala saʻo

□ Ia ioe i soʻu sesē ma faatoese

□ Isi mea

Ae ā pe a fai sau filifiliga ia faaalia ai e faamoemoeina oe i vala ia ua e faailoga i luga? Ia e fai e tusa o le fautuaga a le Tusi Paia: “Tuu ese le tagata tuai e tusa ai ma a outou amioga sa faia muamua.” (Efeso 4:22) “Ia avea la outou upu o le Ioe, ia Ioe.” (Iakopo 5:12) “Ia taʻitasi outou ma tautala i le mea moni ma lona tuaoi.” (Efeso 4:25) “Ia usiusitai i o outou mātua i mea uma lava.” (Kolose 3:20) E sau le taimi e iloa ai e tagata lou alualu i luma, e faapena foʻi ma ou mātua.—1 Timoteo 4:15.

Ae ā pe afai o lou lagona o lenā o loo e taumafai, ae e lē o faatuatuaina lava oe e ou mātua? E lelei pe a e taumafai e talanoa i ou mātua. Aua e te faitio e faapea e tatau lava ona la faatuatuaina oe, ae fesili lelei i ai po o le ā e ao ona e fai, ia avea ai oe o sē e faatuatuaina i le la vaaiga. Ia faamatala lelei i ai ou sini i lea vala.

Aua e te faatalitalia o le a vave ona tuu mai se saʻolotoga e ou mātua. E mautinoa lava o le a la fia vāai muamua po o e tausi i lau upu. Ia faaaogā le avanoa e faaali atu ai o oe e faatuatuaina. O le a sau se taimi e faatuatuaina ai oe e ou mātua. O le mea lenā na oo iā Pevalī, lea na taʻua muamua. Na fai mai o ia: “E faigatā ona maua le faatuatuaga o mātua, ae e vave lava ona leiloa, ae i le taimi nei, o lea ua faasolo lava ina lelei, ma o se lagona e ese le manaia!”

O loo iai mataupu faaopoopo o le faasologa “Ua Fesili Mai Talavou” i le faa-Peretania i le initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ Faamata aiseā ua lē vave ai ona talitonuina oe e ou mātua e ui o loo e taumafai malosi ia faaalia o oe e faatuatuaina?

▪ Aiseā ua tāua tele ai lou tautala saʻo i ou mātua pe afai o e manaʻo e la te talitonu iā te oe?

[Faamatalaga faaopoopo i le itulau 29]

Ia e uaʻi atu i le ati aʻe o uiga, ia e faatuatuaina ai oe

[Siata/Ata i le itulau 28]

O suiga i le avea ma tagata matua mai le talavou, e pei o se alasitepu o loo e laalaa atu ai, a o faagasolo lou talavou

[Siata]

(Tagaʻi i le lomiga mo le ata atoa)

TAGATA MATUA

TALAVOU

TAMAITIITI