O le ā e Sosoo ma Aso e Gata Ai?

O NISI e fefefe pe a mafaufau i “aso e gata ai.” (2 Timoteo 3:1) Talu ai, i o latou manatu, e na o mea faigatā e oo mai ai. Ae mai lava i le faagasologa o tausaga, e toʻatele i latou ua faanaunau ia oo mai, aiseā? Talu ai, o le a oo mai ai foʻi ma se vaitaimi lelei.

O se faaaʻoaʻoga, na talitonu Sir Isaac Newton, o le a faaiʻu le taimi o le iʻuga i se vaitaimi o le filemu ma le manuia i le lalolagi aoao, e ala mai i le Malo o le Atua i lana Pulega i le Meleniuma. Na ia taʻua o le a taunuu ai le valoaga i le Mika 4:3, ma le Isaia 2:4 e faapea: “Ona latou tuʻi ai lea i a latou pelu e fai ma uʻamea o suōtosina, o latou tao foʻi o fai e fai ma polo teu vine; e lē sii atu foʻi le pelu e le tasi nuu i le tasi nuu, latou te lē toe aʻoaʻo foʻi i taua.”

A o ia faamatala atu le taimi o le iʻuga, na augani atu Iesu i ona soo, ia latou maua se vaaiga saʻo. Ina ua uma ona taʻua tulaga faigatā o le a iai i le puapuaga tele, faapea popolega ma le mataʻu, ona ia faapea atu lea: “Pe a amata ona tutupu o nei mea uma, ia tutū i luga ma ia ea i luga o outou ulu, auā ua latalata ona laveaʻiina outou.” (Luka 21:28) Laveaʻiina mai le ā?

Folafolaga a le Atua

O taua, ma feteenaʻiga o tagata o nuu, o le solitulafono, sauā, ma le matelāina, o nisi na o mea o le a pagatia ai tagata i aso nei, ma tupu ai le fefefe ma le matataʻu. Po o e aafia i na mea? Ia mātau mai folafolaga a le Atua:

“E toe itiiti, ona leai lea o le tagata amio leaga; . . . A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:10, 11.

“E nonofo foʻi loʻu nuu i le mea e manuia ai, ma fale e saogalemu ai, ma mapusaga e filemu ai.”—Isaia 32:18.

“Ua faaiʻua e [Ieova] o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foʻi e ia kariota i le afi.”—Salamo 46:9.

“A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai.”—Mika 4:4.

“E taumafa o saito i le nuu i tumutumu lava o mauga.”—Salamo 72:16.”

“A o lē faalogo mai iā te aʻu, e nofo o ia ma le fifilemu; e filemu o ia, e lē fefe i se mea leaga.”—Faataoto 1:33.

Atonu o loo lelei tulaga o mea o loo tatou nonofo ai, ae ua tatou fesagaʻi uma lava ma le maʻi ma le oti. Ae o na mea, o le a lē toe iai i le lalolagi fou a le Atua. Ma  ua tatou maua ai foʻi ma le faamoemoe e toe feiloaʻi ma ē pele ua maliliu. Seʻi mātau mai mau nei:

“E lē fai mai foʻi se tasi ua mau ai, Ou te maʻi.”—Isaia 33:24.

‘E soloiesea foʻi e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’—Faaaliga 21:4.

“Ona faaumatia lea o le fili mulimuli, o le oti lea.”—1 Korinito 15:26.

“E oo mai le itula e faalogo ai i latou uma o loo i tuugamau i lona leo, ma latou ō mai ai.”—Ioane 5:28, 29.

E manaia le auala o loo taaofaʻi mai ai nei manatu e le aposetolo o Peteru e faapea: “E tatou te faatalitali i le lagi fou ma le lalolagi fou, e tusa ma lana folafolaga, e mau ai le amiotonu.” (2 Peteru 3:13) E ao ona aveesea uma i latou e lē fiafia i le amiotonu, ina ia faatumauina le amiotonu i le lalolagi aoao. E ao foʻi ona aveesea malo, ona o lo latou manatu faapito ua māfua ai feteenaʻiga ma le toto masaa. O le a suia pulega uma a le lalolagi, e le pulega o le Malo o le Atua e ala iā Keriso. Ma ua aumaia le faamautinoaga e tusa o lea Malo e faapea: “E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausalī i le faamasinoga ma le amiotonu, e afua mai i ia ona pō e oo i le faavavau; e faia lea mea i le maelega o Ieova o ʻau.”—Isaia 9:7.

E mafai ona e maua lenei faamoemoe i le lumanaʻi, auā ua faapea mai le Tusi Paia: “E finagalo [le Atua] ina ia faaolaina ituaiga uma o tagata, ma ia oo ina iloa lelei le upu moni.” (1 Timoteo 2:4) Aua e te faatuai i le suʻesuʻe i le poto lea e maua ai le ola e faavavau. (Ioane 17:3) Ia faafesootaʻi i latou e lomia lenei mekasini ma faailoa i ai e fia fai sau suʻesuʻega faale-Tusi Paia e aunoa ma se totogi.

[Ata i le itulau 16, 17]

E mafai ona e maua le faamoemoe o le ola e faavavau i le Parataiso i le lalolagi, lea ua lata mai, e maua ai le filemu ma le ola atoatoa