Pe Faamagalo e le Atua Agasala Matuiā?
Le Manatu o le Tusi Paia
Pe Faamagalo e le Atua Agasala Matuiā?
O SE tasi o uiga tāua o le Atua, o le alofa mutimutivale. (Salamo 86:15) O le ā le telē o lea uiga o Ieova? Na tusi se faisalamo e faapea: “Ioa e, afai e te mātaulia le amio leaga, le Alii e, o ai sē na te mafaia ona tulaʻi? A o iā te oe le faamagaloina o sala, ina ia mataʻutia oe.” (Salamo 130:3, 4) Ua faapea mai foʻi se isi mau: “E pei ona vava mamao o sasaʻe ma sisifo, e faapea lava ona faamamao e ia iā i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i ē matataʻu iā te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.”—Salamo 103:12-14.
Ua manino mai la, e matuā tele le alofa mutimutivale o Ieova, ma e manatua foʻi e ia, o i tatou e vaivai ma lē atoatoa, ua na o ni “efuefu.” Seʻi iloilo ni faaaʻoaʻoga mai le Tusi Paia e faaalia ai le tele o le alofa mutimutivale o Ieova.
E faatolu ona faafitia e le aposetolo o Peteru Keriso. (Mareko 14:66-72) Ma a o avea le aposetolo o Paulo ma sē e lē talitonu, na ia sauāina soo o Keriso. Ina ua faia se filifiliga e faasala nisi o i latou i le oti, na lagolago e Paulo lea filifiliga. Na ioe foʻi o ia ia fasiotia se tasi o i latou. (Galuega 8:1, 3; 9:1, 2, 11; 26:10, 11; Kalatia 1:13) A o leʻi avea nisi i le faapotopotoga i Korinito ma Kerisiano, sa masani i le onanā, e taufaavalea i isi, ma gāoi. (1 Korinito 6:9-11) Peitaʻi ane, na iʻu ina latou maua uma le finagalo malie o le Atua. O le ā le māfuaaga o le faamagaloina o i latou e le Atua?
Tolu Laasaga e Maua ai le Alofa Mutimutivale
Na tusi Paulo e faapea: “Na faaalia le alofa mutimutivale iā te aʻu, auā na ou faia faapea i loʻu lē iloa ma loʻu lē faatuatua.” (1 Timoteo 1:13) Ua manino mai i upu faamaoni a Paulo le laasaga muamua e ao ona tatou faia e maua ai le faamagaloga a le Atua, o le maua lea o le poto saʻo e uiga iā Ieova mai le Tusi Paia, faapea ma ana tapulaa lea e aveesea ai le uiga lea o le lē iloa. (2 Timoteo 3:16, 17) E mautinoa lava, afai tatou te lē iloa lelei Lē na faia i tatou, e lē mafai foʻi ona tatou faafiafiaina o ia. Na tatalo faapea Iesu i lona Tamā: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.”—Ioane 17:3.
A oo ina iloa e tagata loto faamaoni le poto saʻo, o le a latou matuā salamō lava mai mea sesē na latou faia, ma taumafai loa ia faaalia le salamō moni. O le laasaga lona lua lea i le mauaina o le faamagaloga a le Atua. Ua faapea mai le Galuega 3:19: “O le mea lea, inā salamō ia ma liliu, ina ia soloiesea a outou agasala.”
O loo taʻu mai foʻi ma le laasaga lona tolu i le mau, ia liliu. O le upu liliu, o lona uiga o le lafoaʻi lea o ala ma uiga tuai, ae ola e tusa o tapulaa ma le finagalo o le Atua. (Galuega 26:20) O lona uiga la, e iloa le moni o le salamō o le tagata, mai le auala o loo ola ai.
E Gata le Faamagalo o le Atua
Peitaʻi ane, e lē faamagaloina e le Atua agasala uma a tagata. Na tusi mai Paulo: “Afai ua tatou iloa lelei le upu moni ae ua tatou faia pea le agasala ma le loto i ai, e lē toe iai se taulaga mo a tatou agasala, ae na o le faatalitali atu ma le matataʻu i le faamasinoga.” (Eperu 10:26, 27) O le faaupuga “faia pea le agasala ma le loto i ai,” ua taʻu mai ai se loto e lē fia salamō, ua matuā leaga lava.
Na faapena le mea na tupu i le loto o Iuta le Sekara. Na faapea mai Iesu: “Sa sili ai pe ana lē fanau mai o ia.” (Mataio 26:24, 25) Na ia faapea mai e faatatau i nisi taʻitaʻi lotu i ona aso: “O outou e mai i lo outou tamā le Tiapolo. . . . Pe a tautala o ia i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.” (Ioane 8:44) O na tagata, e pei lava o Satani, e matuā leaga lava. E aunoa ma so latou salamō e tusa o le mea na latou fai, ae na atili ai ona latou faamaaa i o latou ala leaga. * E moni, ona o le lē atoatoa ma vaivaiga, e sasi ai foʻi le tagata faamaoni, pe faia foʻi se agasala matuiā. Ae ua lē faapea ai ua iā i latou se uiga leaga.—Kalatia 6:1.
Alofa Mutimutivale Seʻia Oo i le Iʻuga
E silafia e Ieova le agasala ua faia e le tagata, ma e na te mātauina foʻi ona uiga. (Isaia 1:16-19) Seʻi manatu foʻi i pagota e toʻalua ia na tautau i autafa o Iesu. Ua manino i le faamatalaga a le tasi o i laʻua, e matuiā lava a la solitulafono ona ua fai mai o ia: “Ua tauia foʻi i taʻua e tusa ma mea ua ta faia; a o lenei tagata, e leai se mea e sala ai o ia.” Ua faaalia mai i upu a le pagota, o loo iai sona malamalama iā Iesu, ma atonu ua avea lea ma mea na suia ai lona uiga. Na faaalia lea i lona augani atu iā Iesu e faapea: “Ia e manatua mai aʻu pe a e oo i lou malo.” O le ā le tali atu a Iesu i lea talosaga faatauanau? Na fetalai atu o ia: “E moni ou te fai atu iā te oe i le asō, O le a ta faatasi i le Parataiso.”—Luka 23:41-43.
O se manatu tāua lenei: O toe upu a Iesu a o soifua o ia o se tagata, na faaalia ai lona alofa mutimutivale i se tagata na fai mai ua tatau iā te ia le faasalaga oti. Maʻeu le faalaeiauina o i tatou i lea manatu! Ma ua tatou mautinoa ai, o le a agaalofa mai Iesu Keriso, faapea ma lona Tamā o Ieova, iā i latou uma e faaalia le salamō moni, e ui i agasala sa latou faia.—Roma 4:7.
[Faaopoopoga i lalo]
^ pala. 12 Tagaʻi i Le Olomatamata o Iulai 15, 2007, itulau 16-20, i le mataupu “Po Ua E Agasala i le Agaga Paia?”
PO O E TAUMĀNATU EA I NISI TAIMI?
▪ E faapefea ona e faamatala le alofa mutimutivale o Ieova?—Salamo 103:12-14; 130:3, 4.
▪ O ā laasaga e fai ina ia maua ai le faamagaloga a le Atua?—Ioane 17:3; Galuega 3:19.
▪ O le ā na folafola atu e Iesu i le pagota na i ona autafa?—Luka 23:43.
[Ata i le itulau 10]
Na faaalia e Iesu e mafai ona faamagaloina agasala matuiā