Ua Fesili Mai Talavou

E Faapefea Ona Ou Maua le Olioli i le Tapuaʻiga i le Atua?

O loo taoto Iose e 16 ona tausaga, i lona moega. Ua tū mai lona tinā i le faitotoʻa o lona potu ma fai mai. “Se Iose, nofo ia i luga! Ua e iloa lelei lava o le pō lenei o le sauniga.” O le aiga o Iose e Molimau a Ieova, o se vaega masani o le latou tapuaʻiga le auai i a latou sauniga. Ae, o se lagona e leʻi leva ona iai iā Iose, ua lē fia alu i sauniga.

Ua tali musuā o ia, “E! se ō ia outou.”

Ua tali mai lona tinā, “Tuu au tala na ae fai lou ofu. Ou te lē manaʻo e toe tuai foʻi i le sauniga!” Ua liliu o ia i tua ma savali ese loa.

Ua tope atu le tala a Iose manū o lagona mai e lona tinā, “O le sauniga a oe, ae e lē o se sauniga a aʻu.” Ua iloa e Iose na lagona e lona tinā lana tala, ona ua tū. Peitaʻi e leʻi tali mai, ae faaauau ona savali ese.

Ua lagona e Iose le lē lelei o lana tala ua fai. E lē o fia faatigā i lona tinā. Ae e lē o fia faatoese foʻi ona o lana tala na fai. Pau o lea, pei e sili ai pe a . . .

Ua mapuea Iose ma tū i luga, ma fai ona ofu. Ua tomumu na o ia ma faapea ane: “E oo lava ina fai saʻu filifiliga i se taimi. E matou te lē tutusa ma isi tagata i le sauniga. Ou te lē fia Kerisiano!”

PO UA iai se taimi ua oo ai na lagona iā te oe? Po ua iai se taimi e ui o loo fiafia isi e auai i sauniga ma talaʻiga, ae iā te oe, ua tau lava ina faatino? O se faataʻitaʻiga:

▪ Po o tutusa ou lagona i le suʻesuʻeina o le Tusi Paia e pei o ou lagona i au meaaʻoga?

▪ Pe e te fāʻatu e alu e talaʻi?

▪ Po o e lagona, le fiu e alu i sauniga?

Afai o lau tali i nei fesili o le ioe, aua e te faavaivai. O le a e maua le fiafia e auauna i le Atua, pe afai e fai ni nai fetuutuunaʻiga. Seʻi vaai po o ā ni fetuutuunaʻiga e mafai ona e faia.

Faafitauli 1: Suʻesuʻeina o le Tusi Paia

Le māfuaaga e lē faigofie ai. Atonu o lou lagona, e te lē fiafia e suʻesuʻe. E lē umi se taimi e suʻesuʻe ai ae fiu, e faigatā ona nofo umi ma suʻesuʻe! E lē gata i lea, e tele foʻi au mea aʻoga o tau fai, a ea?

Le māfuaaga e fai ai. Na faagaeeina e le Atua le Tusi Paia, ma e “aogā foʻi e aʻoaʻo ai tagata ma fesoasoani ia faasaʻo i latou ma iloa ai le auala e ola ai.” (2 Timoteo 3:16, Contemporary English Version) O lou suʻesuʻe i le Tusi Paia ma mafaufau loloto i ai, o le a e malamalama ai i le tele o mea e te leʻi iloa muamua. E lē otometi le maua o se mea lelei, ona e ao ona e matuā galue ia maua. Afai e fia  lelei lau taalo i se taaloga, ia e aʻoaʻoina tulafono ma faamasani i le auala e fai ai. Afai o fia malosi lou tino, ia fai ni au faamalositino. Ma afai o e fia malamalama i Lē na faia oe, e ao ona e suʻesuʻe i lana Afioga.

Faamatalaga a isi talavou. “I le taimi na ou aʻoga ai i le aʻoga maualuga, sa manaʻomia ai ona fai saʻu filifiliga. E tele mea leaga na fai e isi talavou, ma na ou fesili ifo: ‘Pe ou te manaʻo foʻi e fai na mea? Pe e moni ea, o mea o loo aʻoaʻo mai e oʻu mātua, o le upu moni lava lea?’ Na ou fia iloa po o le ā tonu le saʻo.”—Tshedza.

“E leai soʻu masalosalo, o mea ia na aʻoaʻoina ai aʻu, o le upu moni lea, ae na ou fia faamautinoa. E tatau ona avea le tapuaʻiga o le mea ua ou manaʻo ai ae lē ona o le manaʻoga o oʻu mātua.”—Nelisa.

Le mea e mafai ona e fai. Fai sau faasologa o mea e manaʻomia ona e suʻesuʻeina. Filifili oe po o ā mataupu e te suʻesuʻeina. Faamata o ā mataupu e amata ai lau suʻesuʻega? E manaia foʻi ona saʻiliʻili i ou talitonuga, ma faaaogā se tusi e iai le, O ā Aʻoaʻoga Moni a le Tusi Paia? *

Faatinoga. Vaai ni mataupu se lua pe tolu o i lalo e te fiafia i ai, o loo e fia malamalama atili i ai, pe faaopoopo i ai ni mataupu e te manaʻo ai,

□ Pe e iai se Atua?

□ E faapefea ona ou mautinoa, na faagaeeina e le Atua tagata na tusia le Tusi Paia?

□ Aiseā ou te talitonu ai na iai se isi na faia mea uma, ae ou te lē talitonu i le evolusione?

□ O le ā le Malo o le Atua, ma e faapefea ona ou faamaonia e moni?

□ E faapefea ona ou faamatala loʻu talitonuga i le mea e tupu pe a oti le tagata?

□ Aiseā ou te talitonu ai, e toetutū ē ua oti?

□ E faapefea ona ou mautinoa po o lē fea le tapuaʻiga e fiafia i ai le Atua?

□ ․․․․

Faafitauli Lona 2: Auai i le Galuega Talaʻi

Le māfuaaga e lē faigofie ai. E fefe e talanoa i isi e uiga i le Tusi Paia, pe fefe foʻi ina neʻi teʻi ua tau atu i se isi e aʻoʻoga faatasi.

Le māfuaaga e fai ai. Na faatonuina e Iesu ona soo: ‘Ō atu e fai tagata ma soo ia aʻoaʻoina i latou e tausi i mea uma ua ou poloaʻi atu ai iā te outou.’ (Mataio 28:19, 20) Ae ua iai foʻi isi māfuaaga e talaʻi ai i isi. Ua iloa mai saʻiliʻiliga, i nisi vaipanoa e toʻatele talavou ua talitonu i le Atua ma le Tusi Paia, ae lē faapea ai ua latou maua se faamoemoe moni mo le lumanaʻi. Ae, e ala i au suʻesuʻega o le Tusi Paia, o lea ua iā te oe le malamalama o loo fia mauaina e le tele o talavou!

Faamatalaga a isi talavou. “Na ma saunia ma faataʻitaʻi ma laʻu uō ni faatomuaga aogā, ma iloa ona tali teteega mai le talaʻiga, ma fai ni toe asiga. Na faateleina loʻu fiafia e talaʻi ina ua fai saʻu taumafaiga e faaleleia laʻu faiva.”—Nelisa.

“E telē se fesoasoani na aumaia e se isi tuafafine Kerisiano iā te aʻu! E ono tausaga e matua ai iā te aʻu, ma e ma te ō e talaʻi ma e fai foʻi se ma mālū o le taeao i nisi taimi. Na faalaeiauina aʻu i mau e na te aumaia, na aogā e faasaʻo ai oʻu manatu. O lana faaaʻoaʻoga lelei ua uunaʻi ai aʻu e fia fesoasoani i isi. Ua sili mea ua ia fai mo aʻu nai lo se mea ou te faia mo ia!”—Shontay.

 Le mea e mafai ona e fai. Afai e ioe i ai ou mātua, vaai se isi o lau faapotopotoga e matua iā te oe e mafai ona lua galulue faatasi i le talaʻiga. (Galuega 16:1-3) Ua faapea mai le Tusi Paia: “E maamaʻai le uʻamea i le uʻamea, e faapea foʻi ona faamāfanafana o le tagata i lana uō.” (Faataoto 27:17) E tele aogā e maua i le auaufaatasi ma i latou e matutua ua tele lo latou poto masani. Ua fai mai Alexis e 19 tausaga, “E faigofie pe a faatasitasi ma i latou e matutua.”

Faatinoga. Ia tusi i lalo le igoa o se isi i lau faapotopotoga e ese mai ou mātua, e mafai ona fesoasoani atu i le galuega talaʻi.

□ ․․․․

Faafitauli Lona 3: Auai i Sauniga

Le māfuaaga e lē faigofie ai. Faatoʻā uma foʻi ona saofaʻi i le aʻoga i le aso atoa, ae o lea foʻi ua sosoo ma le nofo mo le isi tasi pe lua itula i sauniga.

Le māfuaaga e fai ai. Ua timaʻi mai le Tusi Paia i Kerisiano: “Ia manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina lo tatou faapotopoto faatasi e pei o le masani a isi, a ia fefaalaeiauaʻi, ia sili foʻi ona faia faapea aemaise ua outou iloa ua matuā latalata mai le aso.”—Eperu 10:24, 25.

Faamatalaga a isi talavou. “E ao ona sauniuni mo sauniga. O nisi taimi, e manaʻomia lava ona e faamalosi e fai. Auā a e sauniuni, o le a e fiafia ona ua e iloa mea o loo talanoaina i le sauniga, ma e mafai foʻi ona fai sou sao.”—Elda.

“E iai se taimi na ou mātauina ai, afai e fai soʻu sao i sauniga, o sauniga na e sili ona ou fiafia ai.”—Jessica.

Le mea e mafai ona e fai. Sema se taimi e sauniuni ai mo sauniga, ma fai sou sao pe a mafai. E aogā lea e te lagona ai, o loo faia ai sau vaega.

O se faataʻitaʻiga: Faamata o lē fea e sili ona faafiafiaina ai oe, o le matamata i taaloga i le televise po o le taalo i le malae? O le mea moni, e sili ona fiafia le tagata o loo taalo nai lo le tagata matamata. E manaia la ae fai faapena e tusa o sauniga, a ea?

Faatinoga. Tusi i le avanoa i lalo taimi e mafai ai ona sema se 30 minute e suʻesuʻe ai ma sauniuni mo le sauniga a le faapotopotoga i vaiaso taʻitasi.

□ ․․․․

Ua tele talavou ua iloaina le moni o le Salamo 34:8, o loo faapea mai: “Ina tofotofo ia outou, ma ia outou iloa e lelei Ieova.” O le ā se lelei i le na o le faalogo i se tala o se meaʻai manaia? Pe lē sili ea lou tofo i ai?

E faapena le tapuaʻiga i le Atua. Ia e tofo ona e iloa ai lea o le tauia o le auai i meafai faaleagaga. Ua faapea mai le Tusi Paia, o lē faia le galuega ae lē na ona faalogo, “o le a fiafia ai o ia ona o lona faia.”—Iakopo 1:25.

[Faaopoopoga i lalo]

MEA E MAFAUFAU I AI

▪ Faamata o le ā le māfuaaga o le lē fiafia o talavou i meafai faaleagaga?

▪ O lē fea o vala e tolu ua talanoaina i lenei mataupu o e manaʻo e faaleleia, ma o le a faapefea ona e faaleleia?

[Ata i le itulau 20, 21]

Afai o fia malosi lou tino, ia fai ni au faamalositino. Afai o e fia malosi faaleagaga, e manaʻomia ona e suʻesuʻe i le Afioga a le Atua