Le Manatu o le Tusi Paia

Le Māfuaaga e ʻAlofia ai Faiga Faataulāitu

I SE tasi nuu i Asia, o loo faamanatu ai e tagata se aso mo agaga. Na taualuga i le filifilia o fafine e toʻalua, ia ulufia e agaga. Na taavavale i tua mea uli o o la mata, ma galulu o la tino e pei ua sipaka i le eletise.

I Puerto Rico, e fai e le taulāitu se faatasiga e fesootaʻi ai ma le agaga e igoa iā Changó, le atua o faititili. E taʻu mai e le taulāitu vaaiga ua ia iloa, ma ua amata ona galulu uma tino o tagata o loo iai e pei ua ulufia e agaga.

I le tele o atunuu, ua tele lava ina taatele ai faiga faaagaga. Ua tupu tele le naunau o tagata i faiga faataulāitu, ma ua tupu foʻi lo latou fia iloa e tusa o lea mataupu. I aso nei, ua taatele foʻi tusi, taaloga, ata i TV ma tifaga e faatatau i temoni, faiga faataulāitu, ma mea e tutupu e māfua mai ona o le malosi faaagaga.

Peitaʻi ane, ua faaalia mai i le Tusi Paia, o faiga faaagaga uma lava, e iai le sootaga ma faiga faataulāitu. Ma o faiga faataulāitu, e lē o se mea e ula pe taalo i ai, pe tau ina saʻili atu i mea e lē malamalama i ai. Ae o le faafesootaʻi atu lea i agaga leaga po o temoni, po o agelu na fouvale i le Atua.—Faaaliga 12:9, 12.

O le mea moni, e pei ona faaaogā e tagata faifaiva maunu, ua faapena ona faaaogā e temoni faiga faataulāitu. E fuafua e le faifaiva le maunu e faaaogā, i le ituaiga o iʻa e manaʻo e maua. Ua faapena foʻi ona faaaogā e agaga faiga faataulāitu eseese e maunu ai tagata ia latou pulea. O le taʻu o le taʻitaʻi o temoni, o “le atua o faiga o mea a lenei lalolagi [leaga].” E lelei tele o ia i le faatauasoina o manatu o tagata lē talitonu, ina neʻi o latou iloa le upu moni o le Afioga a le Atua, faapea ma lona finagalo.—2 Korinito 4:4.

Le Taunuuga o Faiga Faataulaitu

O le ʻauga o taumafaiga a agaga leaga: Ia faalavelave mai ma taʻitaʻi ese i tatou mai le maua o se faiā māfana ma Lē na faia i tatou. Ua latou tosina ese tagata ia lē usitaʻi i faatulagaga amiotonu a le Atua pe latou te iloa pe lē iloa foʻi. O le faia faapea o le a lē maua ai le finagalo malie o le Atua, ma o le a leai so latou faamoemoe ma oo ai ina faaumatia.—Faaaliga 21:8.

Ua fai mai Lui, o se alii mai Puerto Rico,  “Mai lava o oʻu laʻitiiti, sa faia e lo matou aiga faiga faataulāitu. O se vaega o le tapuaʻiga ma le olaga o le matou aiga. Sa ou manatu o se mea e masani ai le mafai ona ou iloa le lumanaʻi, ma iloa fai togafiti faataulāitu i pepa e iai ata, e tai pei o pepa o se pelē. E masani ona ou piki numera mālō o le loto, ma na aogā e maua ai tupe a isi. Na pei o se mea lelei nei tomai, ae na faalavelave mai i loʻu mauaina o le poto o le Tusi Paia, ma atiaʻe ai le ma faiā ma le Atua.”—Ioane 17:3.

Ua toʻatele tagata e manatu e leai se afāina o faiga faataulāitu, ma e iai foʻi taimi e aogā ai. Atonu latou te fai mai e iai agaga e lelei, ma e mafai ona maua le malamalama, ʻoa, ma le fiafia mai faiga faataulāitu. Ae e sesē tele lea manatu. Ua fai mai Lui, “E iai lava le taui o na mea.”

O se alii talavou e igoa iā Kato, na oo iā te ia ni vaaiga e fefe ai faapea ma le faapologaina ona o le fafagu soo i taimi e moe ai. “E lē misi se pō o faataugā aʻu e temoni ma faalavelave mai. Na mafai ona taofi lea faiga ina ua ou iloa o temoni o loo osofaʻi mai, ma na ou valaau iā Ieova le Atua ia puipuia aʻu mai iā i latou.”

Le Auala e Maua ai le Puipuiga

Ina ia puipuia i tatou mai temoni, e ao ona ʻalofia mea uma e ono iai se fesootaʻiga ma faiga faataulāitu. (Kalatia 5:19-21) Ua faatonu e Ieova le Atua ona tagata ia alo ese mai faiga nei: “Aua neʻi iloa iā te oe . . . o sē fai togafiti faataulāitu, o sē iite i ao o le lagi, po o sē saʻili faailoga, po o se taulāitu, po o se ʻapele, po o sē fesili atu i aitu, po o sē ua i ai le aitu vavalo, po o sē saʻili atu i ē ua oti. Auā e inosia e Ieova o i latou uma o ē faia na mea.”—Teuteronome 18:10-12.

Ua ōgatusa nei upu ma mea ua faia e le toʻatele, ma ua latou puipuia i latou e ala i le tiaʻi o tusi po o mea e iai se sootaga ma faiga faataulāitu. Na lafoaʻia e Keni faiga faataulāitu, ma na ia fai mai: “Na ou iloilo uma aʻu mea na iai, ma o mea na ou iloa e leaga, na faatamaʻia uma.”—Tagaʻi i le Galuega 19:19, 20.

E leai se puipuiga e sili nai lo le atiaʻe o se faiā māfana ma le Atua moni o Ieova. Ia mātau mai le mea e ao ona fai e tusa o le Iakopo 4:7, 8: “O lea la, ia outou gauaʻi atu i le Atua ae ia tetee atu i le Tiapolo, ona sola ese ai lea o ia mai iā te outou. Ia outou māfuta vavalalata atu i le Atua, ona māfuta vavalalata mai lea o ia iā te outou. O outou tagata agasala e, inā fafano ia o outou lima. O outou tagata faalotolotolua e, inā faamamā ia o outou loto.”

E aʻoaʻo e Ieova ma puipuia i latou e faalatalata atu iā te ia. E latou te ‘lē vālea i togafiti a Satani’ pe faasesēina i mea e lē moni. (2 Korinito 2:11; 11:14) E lē gata i lea, o Ieova e Ona le malosi uma lava. Ma e pei ona faaalia i le mea na tupu iā Kato, e faasaʻoloto e Ieova tagata mai le faataugāina e agaga leaga.—Salamo 91:1, 2.

O lea la, ua olioli i latou e saʻo o latou loto ona o le puipuiga a le Atua i le taimi nei, faapea ma le iloaina ua toeitiiti faaumatia uma temoni ma i latou uma ua i lalo o a latou taaʻiga. E maʻeu le olioli ma le filemu o le a iai i le lalolagi pe a saʻoloto tagata uma mai faiga faataulāitu!—Isaia 11:9; Faaaliga 22:15.

PO O E TAUMĀNATU EA I NISI TAIMI?

▪ O ā faiga faataulāitu e ao i se Kerisiano ona ʻalo ese ai?—Teuteronome 18:10-12; Faaaliga 21:8.

▪ O ai o loo uunaʻia faiga faataulāitu?—2 Korinito 2:11; 11:14; Faaaliga 12:9, 12.

▪ E faapefea ona tatou puipuia i tatou mai agaga leaga?—Iakopo 4:7, 8.

[Ata i le itulau 18]

O le mea moni, e pei ona faaaogā e tagata faifaiva maunu, ua faapena ona faaaogā e temoni faiga faataulāitu