Lou Lagona o le Tofo
Pe na Teʻi ua Iai?
Lou Lagona o le Tofo
▪ O le taimi lava e te ūina ai se taumafa e sili ona e fiafia i ai, o le taimi foʻi lea e te lagonaina ai lona tofo. Ae, ua faapefea ona e iloa le tofo o se meaʻai?
Mātau mai: O lou laulaufaiva ma isi vaega o lou fofoga faapea ma lou faaʻī, o loo iai faaputuga o sela, e taʻu mai ai le tofo o mea. O le tele o nei sela, e i totonu o mea e foliga i ni tamaʻi mea ninii patupatu o loo putuputu i le pito i luga o le laulaufaiva (papillae). I totonu o sela o le tofo, e faitau selau isi sela e faailoa maia le eseesega o tofo, ma o nei sela uma, e fā ituaiga o tofo e taʻu mai ai—o le suamalie, māi, masima, ma le oona. * Ae e lē faailoa maia e sela le feū. Ona o le feū, e faailoa mai e sela e lagona ai le tigā, ae lē o sela e iloa ai le tofo! O lea la, o sela e iloa ai le tofo o taumafa, e fesootaʻi i neula, ma o vailaau e iai i taumafa e uunaʻia neula e faafesootaʻi le vaega o le faiʻai, lea e taʻu maia le tofo o se meaʻai.
Ae, e lē na o le gutu e lagona ai le tofo. O loo iai i lou isu sela e lima miliona e iloa ai le tofo, ma e tusa ma le 10,000 manogi eseese e mafai ona e lagonaina ai, ma e tāua tele ina ia e iloa ai le tofo o mea. E tusa ma le 75 pasene o mea ua lagona i le tofo, e ala mai i le sogisogi, ae lē mai i le gutu.
Ua faia e saienitisi se masini e pei o se isu, ma ina ia iloa e le masini le manogi o mea, e faaaogā ai kasa ma vailaau. Peitaʻi ane, ua fai mai John Kauer, o se fomaʻi e faapitoa i neula o le tino i le tusi Research/Penn State, e faapea: “So o se masini e kopi i se mea moni, e lē taitai ona tutusa lona lelei pe a faatusatusa i le mea moni, ona e sili mamao le lelei ma le lavelave o le mea moni.”
E ioe tagata uma o le lagona lea o le tofo, e faaopoopo i le fiafia e maua mai i se taumafataga manaia. Ae o loo iso pea saienitisi pe aiseā e fiafia ai tagata i isi tofo ae lē fiafia i isi. Ua fai mai le lomiga Science Daily, “Atonu ua malamalama saienitisi i le auala e galue ai le tino, ae e lē o atoa so latou iloa e tusa o le lagona o le tofo po o le sogisogi.”
O le ā la sou manatu? Pe na teʻiteʻi iai le lagona o le tofo? Po o se faamaoniga lea, na iai se tasi na faia?
[Faaopoopoga i lalo]
^ pala. 4 I tausaga talu ai nei na faaopoopo ai e saienitisi se isi tofo e taʻu o le umami i le lisi. O lea tofo e aofia ai masima eseese o loo maua mai polotini o meaola ma laau. O se tasi o ia masima, e taʻu o le masima saina (monosodium glutamate).
[Siata/Ata i le itulau 26]
(Tagaʻi i le lomiga mo le ata atoa)
O se vaaiga i totonu o le laulaufaiva
[Siata]
Papillae
[Ē Ana le Ata]
© Dr. John D. Cunningham/Visuals Unlimited