“O le ā ua Tupu i Laʻu Tama?”

Na matuā faateʻia Sikoti ma Sana * ina ua savali atu le la tama teine e 15 tausaga i le potu mālōlō. Ua vali faamūmū sesega lona lauulu, ae sa poloni! Ma e la te lē o malamalama foʻi i le talanoaga lea e mulimuli ai.

“Ei, o ai na fai atu e te alu e vali lou ulu?”

“Oi, ae lua te leʻi fai mai e sā.”

“Ae na e faanoi mai?”

“Ua uma lava ona ou iloa le tali, e leai!”

O LE a vave lava ona ioe mai Sikoti ma Sana e faapea, e ese le faigatā o le taimi o le talavou o fanau, e lē gata i talavou lava latou, ae faapea foʻi ma mātua. O le mea moni, e lē o taitai lava saunia mātua i le telē o le suiga o le a iai pe a oo ina avea le la tama ma talavou. Ua fai mai Palepa, o se tinā mai Kanata: “E leai ma so ma iloa o le a matuā sui lava uiga o la ma teineitiiti. Na ou faapea ane, ‘O le ā ua tupu i laʻu tama?’ E peiseaʻī na matou momoe o iai, ae matou feala aʻe ua ese le tagata lea ua iai!”

E lē na o Palepa ua oo i ai lea tulaga. Seʻi mātau mai faamatalaga na fai e mātua mai vaega eseese o le lalolagi, i sui o le Ala Mai!

“A o talavou le ma tama tama, na teʻi lava ua fia faaali mai ona manatu ma finau mai i faatonuga e fai atu.”—Lia, mai Peretania.

“Na atili ai ona teuteu tino le ma fanau teine, aemaise lava i o la foliga.”—Ioane, mai Ghana.

“Na manaʻo laʻu tama tama e tuu atu e pule lava ia. E lē manaʻo e faatonu atu le mea e fai.”—Seline, mai Pasili.

“Na lē toe manaʻo le ma tama teine e ma te opo pe fusi iā te ia e pei ona masani ai.”—Aniteleʻa, mai Kanata.

“O le ma fanau tama, na pei ua fia malolosi. E lē fia talia faaiʻuga e ma te faia, ae faatautee ma finau mai.”—Sitivi, mai Ausetalia.

“E lē fia taʻu maia e le ma tama teine ona faalogona. E lē fia talanoa mai, ma e ita pe a ou fia talanoa iā te ia.”—Ioana, mai Mekisikō.

“Na tele ina nanā e le ma fanau mea mai iā i maʻua, ma e fia fai lava a latou mea na o i latou. E masani ona sili iā i latou le faatasitasi ma a latou uō nai lo maʻua.”—Tanielu, mai Filipaina.

Afai e iai sau fanau talavou, atonu ua e faia foʻi ni faamatalaga, e pei ona taʻua i luga. Afai o lea, e ui ua pei lau fanau talavou o ni tagata e te lē masani ai, ae ia e mautinoa, e mafai ona e maua le fesoasoani ina ia e malamalama ai iā i latou. Ma, e maua mai i le Tusi Paia. E faapefea?

Poto ma le Malamalama

Ua faapea mai se faataoto i le Tusi Paia: “Ia maua le poto, ia maua le atamai.” (Faataoto 4:5) E tāua tele nei uiga e lua i le feagai ai ma talavou. E manaʻomia le atamai, po o le malamalama, ina ia e iloa ai le māfuaaga o suiga i talavou. Ae e manaʻomia foʻi le poto ina ia mafai ai  ona e faatonutonu lelei o ia, seʻia oo ina avea ma tagata matua e faamoemoeina.

Aua le avea uiga o loo taʻua i luga o fanau talavou, ma mea e te manatu ai e latou te lē manaʻomia la outou fesoasoani faamātua. O le mea moni lava, e manaʻomia e talavou o latou mātua, ma e mananaʻo foʻi ia fesoasoani atu i lea taimi faigatā o o latou olaga. O le a faapefea ona aogā iā te oe le poto ma le malamalama, ina ia faatonutonuina ai lau fanau?

[Faaopoopoga i lalo]