Ua Fesili Mai Talavou

E Faapefea Ona Ou Teena Faaosoosoga?

▪ E leʻi atoa le sefulu minute talu ona taunuu Kale i le patī ae taunuu loa tama e toʻalua ma tagapepa tetelē. E na te iloa lelei mea la e i tagapepa. Ona na faalogo o ia o talanoa le aualii e faapea, o le a “tele le ʻava” i le patī. E leʻi taʻuina la e Kale le mea lea i ona mātua. Ona o lona manatu o tala ula a le aualii. Aemaise ai, o lea e faapea e iai tagata matutua e vaavaaia le patī—ae e leʻi vaai lava i se tagata matua.

Ua teʻi Kale i le faalogo atu o tautala mai i ona tua se tagata e masani ai e faapea. “O le ā le mea e te tū ai ae lē fiafia loa i le patī?” Ua liliu i tua Kale ma vaai atu i lana uō o Tesi ua tu e tofu le lima ma le fagu pia faatoʻā uma ona talai. Ua tuu atu e Tesi le isi fagu iā te ia ma fai atu, “Ia, o lenā ua e matua ua taga ona e inu!”

Ua tele le fia fai atu o Kale e lē manaʻo ai. Ae ese le malosi o le omiga e lolo atu. E leai sona lagona e fia inu. Ae o Tesi o lana uō, ma e lē manaʻo e manatu Tesi o ia e faaleaga patī. Ma o Tesi foʻi o se teine e lelei. Ma afai o lea e inu Tesi, ia, o le ā le afāina ae inu foʻi ma ia? Ua faapea ane Kale i lona loto, ‘E lē leaga le pia, e lē pei o fualaau faasāina ma feusuaʻiga.’

I LE taimi o lou talavou, e tele auala e ala mai ai faaosoosoga. E masani lava ona ala mai i le isi itupā. Ua fai mai Rimoni, e 17 ona tausaga, “E ese le faatosina o teine i le aʻoga.” * “E fia paʻi mai seʻi vaai pe e te lolo atu iā i latou. E lē taitai faalogo pe a e fai i ai e leai!” E faapena foʻi le mea na oo iā Tiana, e 17 foʻi ona tausaga. Ua fai mai o ia, “Na sau le isi alii ma faauōuō aʻu, ae na ou tago atu tuʻi lona lima ma fai i ai ‘Sole. Ta te lē masani!’”

Atonu o loo e fesagaʻi foʻi ma faaosoosoga, ma e foliga mai o le a faaauau pea. Ae e pei ona fai mai se isi Kerisiano, “o faaosoosoga, e pei o loo tuʻituʻi mai pea se isi i lou faitotoʻa, ae lē fia amanaʻia le faailo ua iai, E Faasā.” Po o fai soo foʻi lea amio o le tofotofo atu o isi iā te oe? O se faataʻitaʻiga, o ā  mea o loo taʻua i lalo ua tofotofoina ai oe?

□ Ulaula

□ Inu ʻava

□ Faaaogā fualaau faasāina

□ Matamata i ata o feusuaʻiga

□ Feusuaʻiga lē mamā

□ Isi mea

Afai na e faailoga se mea i le lisi i luga, aua e te manatu e lē mafai ona avea oe ma Kerisiano. E mafai ona e iloa pulea ou faalogona sesē, ma teena ai faaosoosoga. E faapefea? E maua le fesoasoani pe a e iloa le māfuaaga o le faaosoosoga. Mātau mai vala nei e tolu.

1. Lē lelei atoatoa. E i tagata uma le lagona e fai le mea sesē. E oo foʻi i le aposetolo o Paulo, o se Kerisiano e matua faaleagaga, na ia taʻutino e faapea: “Pe a ou loto atu e fai le mea lelei, ae ua iā te aʻu le leaga.” (Roma 7:21) O lea la, e oo i le tagata e sili ona sao lana amio, e iai lava taimi e oo ai iā te ia “tuʻinanauga o le tino, ma tuʻinanauga o mata.” (1 Ioane 2:16) Ae o lou mafaufau pea i faaosoosoga, e tupu tele ai le faafitauli, auā ua faapea mai le Tusi Paia: “A tō le tuʻinanau, ona fanau mai ai lea o le agasala.”—Iakopo 1:15.

2. Aafiaga mai i isi mea. Ua iai faaosoosoga i mea uma. Fai mai Trudy, “I taimi uma lava, ua talanoa tagata i aʻoga ma galuega i feusuaʻiga. I le TV ma tifaga, e faafoliga mai e manaia ma faafiafiaina ai. Ae e seāseā faaali mai iʻuga tigā e tupu mai ai!” O mea na tutupu iā Trudy na ia iloa ai le malolosi o taaʻiga faapea. Na ia manatua e faapea, “A o 16 oʻu tausaga, na ou manatu ai ua ou maua le alofa moni. Ae na talanoa lelei mai loʻu tinā ma fai mai, afai ae lē suia laʻu amio, e iʻu ina ou tō. Na ou lē fiafia i le tala a loʻu tinā! Ae o le mea lenā na tupu i le lua masina mulimuli ane.”

3. “Tuʻinanauga masani o talavou.” (2 Timoteo 2:22) Ua aofia i lea faaupuga faanaunauga uma e masani ai talavou, e pei o le manaʻo e fiafia mai isi iā te oe, pe ia manatu isi iā te oe o se tagata matua. E lē sesē ia lagona, ae a lē pulea lelei, e faigatā ai lava ona teena faaosoosoga. O se faaaʻoaʻoga, o lou manaʻo ia manatu isi iā te oe o se tagata matua, e oo ina e teena ai mea lelei ua aʻoaʻoina ai oe e lou aiga. O le mea lenā na tupu iā Sitivi i le 17 o ona tausaga. Na fai mai o ia, “Na ou tetee i oʻu mātua ma fai mea uma na la aʻoaʻoina ai aʻu e aua le faia, ae e leʻi leva talu ona ou papatiso.”

Ioe, e matuā malolosi lava faanaunauga e pei ona taʻua muamua. Ae ui i lea, e mafai lava ona e teena faaosoosoga. E faapefea?

▪ Ia muamua ona e iloa po o lē fea faaosoosoga e sili ona faigatā iā te oe. (Atonu ua uma ona e faia faapea.)

▪ Ona e fesili ifo lea e faapea, ‘O le ā le taimi e ono tupu mai ai lea faaosoosoga?’ Faailoga le taimi o loo taʻua i lalo:

□ I le aʻoga

□ I le galuega

□ Pe a na o oe

□ Isi taimi ․․․․․

 E aogā lou iloa o taimi e ono tupu ai le faaosoosoga, ina ia e alo ese ai. O se faataʻitaʻiga, toe manatu i le mea lea na tupu i le amataga o le mataupu. O le ā se mea na tatau ai ona iloa e Kale, o le a iai se faafitauli i le patī? Faamata o le ā se auala na ono mafai ai ona ia ʻalofia le tofotofoina o ia?

▪ O lea ua e (1) iloa tonu le auala e ala mai ai le faaosoosoga (2) faapea ma le taimi e ono tupu ai iā te oe, ma ua e iloa foʻi lau mea e fai. O le mea muamua e ao ona fai, ia mafaufau i le auala e faaitiitia ai, pe ia aua ai neʻi oo le faaosoosoga iā te oe. Tusi i lalo mea e mafai ona e faia.

․․․․․

․․․․․

(Faataʻitaʻiga: Afai e masani ona tauanau oe e tamaiti pe a tuua le aʻoga e tou te ulaula, e lelei ona sui le mea e te ui ai, ia aua neʻi tou feiloaʻi ma tamaiti. Afai foʻi e teʻi lava ua auina atu iā te oe se ata lē mamā i le Initaneti, e lelei ona fai se polokalame e poloka ai mea faapena. Ma ia saʻo le upu e faaaogā e suʻe ai mea i le Initaneti, ia tipi ai le faalauaʻitele o le mataupu.)

O le mea moni, e lē mafai ona e ʻalo mai faaosoosoga uma. E iai lava le taimi e fesagaʻi ai ma se faaosoosoga faigatā, atonu o le taimi e te lē o faatalitalia ai. Faamata o le ā e tatau ona e faia i lea taimi?

Ia nofo sauni. Ina ‘ua faaosoosoina e Satani’ Iesu, na vave ona tetee atu Iesu. (Mareko 1:13) Aiseā? Ona sa ia silafia lelei lana mea e fai e tusa o faafitauli na lāgā e Satani. Ia mafaufau i lea mea. E lē faapea o Iesu o se masini. Sa ono aafia o ia i faaosoosoga ma lolo atu ai. Ae ua uma ona faia lana filifiliga, e usitaʻi i lona Tamā i taimi uma. (Ioane 8:28, 29) E faamaoni Iesu ina ua ia faapea mai: “Na ou sau mai le lagi e fai le finagalo o lē na auina mai aʻu, ae lē o loʻu loto.”—Ioane 6:38.

Tusi i lalo māfuaaga e lua e ao ai ona e teena le tofotofoga e masani ona tupu iā te oe, ma auala e lua ua e filifili e teena ai.

1. ․․․․․

2. ․․․․․

Ia manatua, a e lolo i le faaosoosoga, ua avea oe ma pologa i ou tuʻinanauga. (Tito 3:3) Aiseā o le a e tuu ai e manumalo ou tuʻinanauga iā te oe? Ia e mafaufau lelei ma pulea ou faalogona, ae aua le tuu e pule ou faalogona iā te oe.—Kolose 3:5.

[Faaopoopoga i lalo]

MEA E MAFAUFAU I AI

▪ Pe e mafai ona faaosoosoina foafoaga lelei atoatoa?—Kenese 6:1-3; Ioane 8:44.

▪Pe a e teena se faaosoosoga, ua faapefea ona aafia isi ona o lou faamaoni?—Faataoto 27:11; 1 Timoteo 4:12.

[Pusa i le itulau 25]

FAATAʻITAʻI LE MEA LEA

Tago e tuu se tapasā ia faasino lona nila i mātū. Tago e tuu se maneta i autafa o le tapasā. O le ā le mea ua tupu? Ua sesē le mea ua faasino i ai le nila o le tapasā. O lea ua faasino i le maneta ae lē o mātū.

Ua pei lou loto fuatiaifo o se tapasā. Afai e lelei ona aʻoaʻoina, o le a faasino i le itu i “mātū” ma aogā e faia ai filifiliga saʻo. Ae o uō lē lelei, e pei o se maneta, e avea a latou taaʻiga ma mea e faasesēina ai mea tonu ua e iloa. O le ā se lesona mai lea mea? Taumafai e ʻalofia tagata, faapea ma mea e faasesē ai mea tonu ua e iloaina!—Faataoto 13:20.

[Pusa i le itulau 25]

MANATU AOGĀ

Mafaufau i tali e fai atu pe a faaosoosoina oe e fai le mea sesē. Aua le popole. E lē faapea e te tali atu ai i se uiga faafiaamiotonu. Ua lava se tali e faigofie ae mautinoa, e tetee atu ai. O se faaaʻoaʻoga, afai e ofo atu e se tamaitiiti aʻoga se sikaleti iā te oe, fai i ai. “E maʻimau iā te aʻu. Ou te lē ulaula!”

[Ata i le itulau 26]

Pe a e lolo atu i se faaosoosoga, ua avea oe ma pologa o lou tuʻinanauga