Le Manatu o le Tusi Paia

Pe e Tatau Ona Tapuaʻia le Atua e Ala i Faatusa?

“Na aʻoaʻoina aʻu e faapea, o le a sili ona ou māfuta i le Atua, i le tapuaʻi atu e ala i faatusa.”—Mack.

“Na tumu lo matou fale i faatusa. Na matou manatu, o le a faafiafiaina ai le Atua.”—Herta.

“E matou te ifo i tupua faapitoa. E aunoa ma se manatu po o le ā se lagona o le Atua i lea mea .”—Sandra.

O LE ā sou lagona i manatu o i luga? Ua talitonu le toʻatele e aogā faatusa e tapuaʻi ai i le Atua. Pe e moni lea manatu? Ae o le mea e sili ona tāua, o le ā le finagalo o le Atua i lea mataupu? Mātau mai le mea ua taʻua i lana Afioga tusia, le Tusi Paia.

Le Silafaga a le Atua i Faatusa

O faatusa ma mea paia ua faaaogā i tapuaʻiga, o mea ua avea ma sui o se mea o loo tapuaʻia e tagata ma tuutoina i ai. E aofia ai koluse, o tupua, ata, po o se isi lava mea i le lagi ma le lalolagi ua fai sona faatusa. * E mafai foʻi ona avea fuʻa ma mea e tapuaʻi i ai.

Ua faitau afe tausaga o faaaogā e tagata faatusa i a latou tapuaʻiga. O lea, i le 1513 T.L.M., ina ua tuu atu e le Atua Tulafono e Sefulu i le nuu faatoʻā faavae o Isaraelu, na faamanino atu lana silafaga e tusa ai o faatusa. Na fetalai o ia: “Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foʻi e te auauna i ai; auā o aʻu o Ieova lou Atua, o le Atua fuā.”—Esoto 20:4, 5.

Mātau mai, e valalua le faasāsāaga a le Atua: Muamua, ia aua neʻi faia e ona tagata ni faatusa e tapuaʻi i ai, ma lona lua, ia ‘aua le ifo i ai,’ pe auauna foʻi i ai. Aiseā ua faasā ai e le Atua ona tatou faia ni faatusa? O le māfuaaga e lē faia ai se faatusa o le Atua, ona “e leai lava se tasi ua vaai i le Atua.” E lē tutusa le tino o Ieova ma tino o tagata auā o ia o le agaga, ma e afio o ia i le lagi. (Ioane 1:18; 4:24) O le isi māfuaaga e lē faia ai lava se faatusa o se isi mea ina  ia tapuaʻia, ona o Ieova o le “Atua fuā,” o lona finagalo e na o ia e tapuaʻi i ai. Ua fetalai o ia: “O loʻu mamalu foʻi ou te lē avatua lea i se tasi, ma loʻu viiga ou te lē avatua i tupua ua ta.” (Isaia 42:8) O le māfuaaga lea ua sesē ai foʻi le faia o se faatusa e tapuaʻi ai i le Atua. Ina ua faia se faatusa e Arona, o se taʻitaʻi o Isaraelu, na matuā toʻasā ai lava Ieova.—Esoto 32:4-10.

Aiseā e Lē Ifo ai i Ai?

Ua faapea mai le Tusi Paia e faatatau i faatusa: “E fai o latou gutu, a e lē feganavai i latou; e fai o latou mata, a e lē vaai i latou; e fai o latou taliga, a e lē faalogo i latou.” Ona sosoo lea ma le lapataʻiga e faapea: “O ē faia ia mea ua tutusa lava ma i latou”—e leai se ola o iai!—Salamo 115:4-8.

O le tapuaʻi i tupua, o se faiga foʻi e lē tonu. Ia e fesili ifo e faapea, ‘O le ā soʻu lagona pe a ou ave se meaalofa taugatā i laʻu tama, ae alu o ia ma faafetai i se isi tagata, po o se mea foʻi e leai se ola?’ Atonu ua aogā lea manatu e te malamalama ai i lagona o Lē na faia i tatou ma Lē na foaʻi maia le ola, pe afai tatou te ave le faafetai ma tapuaʻi i isi, e aofia ai ma tupua e leai ni ola, ae o mea ia e ao ona avatu iā te ia.—Faaaliga 4:11.

Ia mafaufau foʻi i le lē talafeagai i le tagata, o lē ua faia i le faatusa o le Atua, ona tapuaʻi i se mea e leai se ola! (Kenese 1:27) Na tusi le perofeta o Isaia e tusa o ē na faia lea mea e faapea: “Ua latou ifo i galuega a o latou lima, o mea lava na faia i o latou tamatamaʻi lima. Ua lafotuina le tagata nuu, ua faamaulalo foʻi le alii; e te lē faamagaloina foʻi i latou.”—Isaia 2:8, 9.

Ua sili ona inosia e le Atua tapuaʻiga sesē, ona e tusa ua tapuaʻi ai i temoni, o fili ia o le Atua. Ina ua tuua e Isaraelu le tapuaʻia o Ieova ae tapuaʻi i tupua, na taʻua i le Teuteronome 32:17 e faapea: “Na latou fai taulaga i temoni, [ae] e lē o le Atua.”

Pe na tapuaʻi soo o Iesu Keriso i faatusa, pe faaaogā foʻi i a latou tapuaʻiga? E leai! Na faapea mai Ioane le soo o Iesu: “Le fanau e, ia leoleo outou mai i tupua.” (1 Ioane 5:21) Ua taʻua i le tusi Early Church History to the Death of Constantine, e faatatau i le tapuaʻiga anamua e faapea: “O le mea na sili ona inosia e soo anamua o le tapuaʻi lea i tupua.”

Le Ala Tonu e Tapuaʻi Ai

Na fetalai Iesu: “O ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o loo saʻilia e le Tamā tagata faapena e tapuaʻi atu iā te ia.” (Ioane 4:23) Ioe, e finagalo le Atua ia tatou iloa o ia, ma mea e fiafia ma lē fiafia i ai, faapea ana tapulaa ma lona finagalo mo i tatou. (Ioane 17:3) O le māfuaaga lea na tusia ai le Tusi Paia. (2 Timoteo 3:16) E lē gata i lea, “e lē o mamao [le Atua] mai iā i tatou taʻitoʻatasi,” ma e mafai ona tatou tatalo iā te ia i so o se taimi ma i so o se mea, e aunoa ma se tau fesoasoani mai o se tupua.—Galuega 17:27.

Na fai mai Sandra lea na taʻua muamua, “Ou te leʻi vaai i ni faatusa ina ua ou ulufale i le Maota mo Sauniga a Molimau a Ieova. Na faaaogā e Molimau a Ieova le Tusi Paia e faamatala mai ai uiga o le Atua ma mea o loo manaʻomia e ia. Ma na ou iloa ai tatalo i le auala e faafofoga mai ai o ia. O lea ua ou lagonaina nei, ua ou iloa moni Lē na faia i tatou, ma maua se faiā māfana ma ia.” Ioe, ua iloa e Sandra le faafouina ma le saʻolotoga moni e maua mai upu moni o le Tusi Paia. (Ioane 8:32) E mafai foʻi ona e maua.

[Faaopoopoga i lalo]

PO O E TAUMĀNATU EA I NISI TAIMI?

▪ Aiseā e ao ai ona tatou ʻalofia tapuaʻiga i so o se faatusa?—Salamo 115:4-8; 1 Ioane 5:21.

▪ O le ā le auala e tapuaʻi ai i le Atua moni?—Ioane 4:24.

▪ E faapefea ona e iloa le upu moni e uiga i le Atua, ma o ā aogā o le a e mauaina ai?—Ioane 8:32; 17:3.