O le Vai e Maua ai le Ola

Na ui atu le malaga a Iesu i Samaria, i mātū o Ierusalema. Ua vaivai lava ma ua fia inu. A o saofaʻi o ia i autafa o le vaipuna, na talosaga atu i le fafine Samaria, e aumai sina vai mo ia. Na teʻi le fafine i le talosaga atu o se tagata Iutaia, ona i le uluaʻi senituri, e lē fealofani tagata Iutaia ma tagata Samaria.

Na fesili le fafine iā Iesu: “Aiseā ua e talosaga mai ai mo se vai seʻi e inu ai, o oe o le tagata Iutaia, ae o aʻu o le fafine Samaria?”

Na tali atu Iesu: “Ana e iloa le meaalofa foaʻi fua a le Atua ma lē ua fai atu iā te oe, ‘Aumai sina vai seʻi oʻu inu ai,’ semanū ua e ōle mai iā te ia, ona ia avatu ai lea iā te oe o le vai o le ola.”

Ua fetalai atili Iesu iā te ia: “O i latou uma e feinu i lenei vai, e toe fia feinu foʻi. A o lē e inu i le vai ou te foaʻiina atu, e lē toe fia inu lava o ia, ae o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.”—Ioane 4:1-15.

O lē fea vai o loo faatatau i ai le fetalaiga a Iesu?

UA TAʻU e le Tusi Paia Ieova le Atua o Lē na faia mea, o ia o “le puna o le vai ola.” (Ieremia 2:13) O le ola o le meaalofa mai le Atua, ma e faalagolago lo tatou ola i lo tatou inuina o vai faaletino ma le vai faaleagaga ua ia foaʻi mai.

Ua sili ona manaʻomia i aso nei le taʻitaʻiga a le Atua i lo o se isi lava taimi. O le mea moni, ua matuā galala tagata mo mea faaleagaga. Ua latou fia iloa le upu moni e tusa o fesili nei: O fea o iai ē ua maliliu? Pe faamata e toe feiloaʻi ma i latou? Aiseā ua lē taofia ai e le Atua puapuaga? Faamata e iai se taimi o le a mapu ai mai taua, amioga leaga, oge, ma faamaʻi? Ua talitonu Molimau a Ieova, o le a faamalieina oe i tali o loo maua e ala mai i “vai” o le Afioga a le Atua, le Tusi Paia.

 A o talanoa Iesu ma le fafine Samaria i le vaipuna, o ana upu e uiga i le vai o le ola, o loo faasino i upu moni mai le Afioga a le Atua. Ua valaaulia oe e Molimau a Ieova ina ia e tofo i nei vai mamā o le upu moni. Ua iai lea valaaulia i le tusi mulimuli o le Tusi Paia e faapea: “Ia sau foʻi so o se tasi e fia inu; ma e so o se tasi e manaʻo i ai, ia ave fua le vai o le ola.”—Faaaliga 22:17.

Ina ia malamalama atili i le auala o le a manuia ai tagata e ala i le Malo o le Atua, ia faafesootaʻi Molimau a Ieova i le tou vaipanoa, pe tusi i le tuatusi talafeagai, o loo i le itulau e 5 o lenei mekasini. Tagaʻi foʻi i le Initaneti i le www.watchtower.org.

[Pusa i le itulau 8]

PO O FAAMALIEINA E LOTU LE GALALA O TAGATA?

E lē faapea a lotu le tagata pe fiafia i le Atua ona faapea ai lea ua ia maua vai o le upu moni e faafouina ai. O le mea moni lava, e lē o foʻia e lotu faafitauli o tagata, ae ua faaopoopo i ai. Mātau mai le faataʻitaʻiga lea: I taimi o taua, ua fasioti e tagata Katoliko isi Katoliko, ma fasioti foʻi e Porotesano isi Porotesano, ae o loo taufai tatalo uma i le Atua ia malo a latou vaegaau!

E lē gata i lea, ua tele lipoti leaga o faifeʻau e faaaogā fua tupe a lotu pe faaleaga fanau iti. Ioe, e matuā lē mamā lava vai o loo faainuina ai e lotu le tele o tagata. (Faaaliga 17:4-6; 18:1-5) Ua pei lava o le faamatalaga a le Tusi Paia i le Tito 1:16: “Ua latou taʻutino atu i luma o tagata ua latou iloa le Atua, ae peitaʻi, ua latou faafitia o ia e ala i a latou galuega.” E itiiti se taumafaiga ua faia e lotu ina ia faamalieina ai le galala o tagata i lenei taimi o le galala faaleagaga.

[Pusa/Ata i le itulau 9]

E 19 mataupu o le tusi O ā Aʻoaʻoga Moni a le Tusi Paia?, ma o loo iai i ona itulau e 224 tali mai le Tusi Paia o fesili nei:

“O le ā le finagalo o le Atua mo le lalolagi?”

“O fea o iai ē ua maliliu?”

“Po ua tatou ola i ‘aso e gata ai’?”

“Aiseā ua lē taofia ai e le Atua puapuaga?”

[Ata i le itulau 9]

O le a e maua ‘vai o le upu moni’ i le Maota mo Sauniga e lata ane