Ua Fesili Mai Talavou

E Faapefea Ona Ou Feagai ma le Faaumaina o se Faigāuō?

“E ono masina o ma feoaʻi, ma e lima tausaga o ma uō. Ina ua ia manaʻo e faauma le ma faigāuō, sa lē mafai ona ia sau e taʻu mai iā te aʻu. Sa ia lē toe talanoa mai iā te aʻu. Na ou lagona le tuulafoaʻiina. Na ou lē iloa faavasega loʻu lē fiafia. Na fai ma ou fesili ifo iā te aʻu lava, ‘O le ā laʻu mea sesē na fai?’”—Rasela. *

O LE faaumaina o se faigāuō e nutimomoia ai ni manatunatuga fiafia, ae e suia i loimata o le faanoanoa. Manatu iā Sefo ma Susana, na feoaʻi mo le lua tausaga. I lenā taimi, na tupu ai lagona māfana o le tasi i le isi. A o faagasolo le aso, e avatu ai e Sefo ni feʻau iā Susana i telefoni feaveaʻi, i ni faaupuga alofa. I nisi taimi, e avatu ai e Sefo ni meaalofa iā Susana e faailoa atu ai o loo mafaufau pea o ia iā te ia. Fai mai Susana, “Sa taumafai Sefo e faalogologo mai ma malamalama iā te aʻu. Sa na o aʻu lava i lona manatu.”

E leʻi umi, ae amata ona talatalanoa Sefo ma Susana i le faaipoipoga, ma le nofoaga o le a nonofo ai o se ulugalii. Na oo lava ina fesili atu Sefo mo le telē o le mama a Susana. Ae faafuaseʻi lava ona ia faaumaina le ma faigāuō! Sa matuā mafatia lava Susana. Sa ia toe mafaufau i mea na tutupu i aso taʻitasi, ae sa pei e gagase lona tino i le teʻi. Sa ia faapea mai, “Na vaivai ai loʻu tino ma loʻu mafaufau.” *

Aiseā e Tigā Ai

Afai na oo iā te oe se tulaga e pei ona oo iā Susana, atonu la e te taumānatu, ‘Po o le a mafai ona ou toe agaʻi i luma?’ (Salamo 38:6)  Ua iloa uma ou mafatiaga. O le faaumaina o se faigāuō, o se mea matuā tigā e ao ona e onosaia. O le mea moni, ua faapea mai nisi, o le faaumaina o se faigāuō ua pei ai o le a e oti. E te ono oo foʻi oe i nei mea, ma oo ai i isi tigā matuiā:

Lē talia le mea moni. ‘E lē mafai ona uma. O le a suia lona mafaufau i aso e sosoo mai.’

Ita. ‘E faapefea ona ia faia lenei mea iā te aʻu? Vaavaai i ai pe a ma toe fetaui!’

Loto mafatia. ‘Ua lē alofagia aʻu. E leai ma se tasi e toe alofa iā te aʻu.’

Talia le mea moni. ‘Aua le popole, o le a toe sologa lelei tulaga o mea. E tigā le faaumaina o le ma faigāuō, a o lea ua uma foʻi lenā mea.’

O le tala fiafia, e mafai ona e oo i le tulaga ua e talia ai le mea moni. O le umi o le taimi o le a alu ai e faalagolago i tulaga eseese, e aofia ai pe fia le umi o le lua faigāuō ma o le ā foʻi le mamao na oo i ai. A o le taimi nei, e faapefea ona e fesagaʻia le nutimomoia o lou loto?

Agaʻi i Luma

Atonu ua e faalogo i le faaupuga, e foʻia ou manuʻa a o faagasolo le taimi. Ina ua faatoʻā faauma lau faigāuō, atonu sa paopapa lenā faaupuga. Talu ai, o le taimi, ua na o se vaega o le vaifofō. O se faataʻitaʻiga: A o faagasolo le taimi, o le a iʻu ina pē se lavea i lou tino, ae o loo tigā i le taimi nei. E manaʻomia ona taofi le tafe o le toto, ma faateʻa le tigā. E manaʻomia foʻi ona tausia ina ia aua neʻi lūgā. E faapena foʻi pe a faamanuʻalia faalogona. E tigā i le taimi nei. Ae e iai mea e mafai ona e faia, e faaitiitia ai le tigā ma taofia ai le oo ina lūgā. E tāua le lava o le taimi, ae faapefea oe? Faataʻitaʻi mea nei.

▪ Ia lava le taimi e te tagi ai. E leai se afāina o lou tagi. O loo faapea mai le Tusi Paia, o le taimi e “tagi ai” ma le taimi e “taufaitagituʻi ai.” (Failauga 3:1, 4) Pe a e tagi, e lē faapea ai e te lotovaivai. I taimi a o aasa ai faalogona ita, e oo lava iā Tavita, o se toʻa lototele, na ia taʻutino mai: “O pō uma lava e lofia ai loʻu moega i oʻu loimata; ma ua susū foʻi loʻu aluga i loimata.”—Salamo 6:6, Today’s English Version.

▪ Ia tausia lelei lou soifua mālōlōina. O le faamalositino ma meaʻai paleni o le a fesoasoani e toe faafoʻisia ai lou malosi lea na mou atu i le taimi na faauma ai lau faigāuō. O loo faapea mai le Tusi Paia, ‘e aogā le faamalositino.’—1 Timoteo 4:8.

O ā vaega o lou soifua mālōlōina e manaʻomia ona e uaʻi atu i ai?

․․․․․

▪ Ia pisi pea. Aua le taofia lou faia o mea e te fiafia i ai. Ma i le taimi nei aua lava neʻi e nofo ese na o oe. (Faataoto 18:1) O le auaufaatasi ma i latou e alolofa iā te oe, o le a e maua ai se mea patino e taulaʻi atu i ai.

O ā sini e mafai ona e faataatitia ina ia e pisi ai pea?

․․․․․

▪ Ia tatalo atu i le Atua i ou faalogona. Atonu o se luʻi lenā tulaga. Pe a faauma se faigāuō, o nisi ua lagona le tuulafoaʻiina o i latou e le Atua. Ua latou faapea mai, ‘Sa ou tatalo e lē aunoa ina ia ou maua se tasi, ae seʻi vaai i le mea ua tupu!’ (Salamo 10:1) Pe e talafeagai ona faapea ona vaai i le Atua o se suʻe paaga mai le lagi? E mautinoa lava e leai; ma e lē tuuaʻia foʻi o ia pe afai ua lē o toe faaauau se  faigāuō. A ua tatou iloa lenei mea iā Ieova: “O loo manatu mamafa mai o ia iā te [oe].” (1 Peteru 5:7) Ia sasaa atu ou faalogona iā te ia i le tatalo. Ua faapea mai le Tusi Paia: ‘Ia faailoa atu o outou faatoga i le Atua; ona leoleoina ai lea o o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.’—Filipi 4:6, 7.

O ā mataupu patino e mafai ona e tatalo atu ai iā Ieova, a o e feagai ma mafatiaga o le faaumaina o le lua faigāuō?

․․․․․

Vaavaai i Luma

Ina ua uma se taimi o tau faapepē ou manuʻa, e lelei ona e toe vaavaai totoa i le mea na tupu i le lua faiā ua mavae. A e sauni loa e faia lenā mea, o le a e iloa ai, o le a fesoasoani iā te oe le mauaina o tali i fesili nei.

▪ Pe na taʻu atu iā te oe le māfuaaga ua faauma ai le faigāuō? Afai o lea, ia tusi i lalo le māfuaaga, e tusa lava pe e te manatu sa aogā.

․․․․․

▪ O ā isi māfuaaga e te manatu na aafia ai?

․․․․․

▪ I le toe tepa i tua, pe sa iai se mea na e faia na ono suia ai le iʻuga? Afai o lea, o le ā?

․․․․․

▪ Po o ua faaalia i lenei mea na tupu ni auala na e manaʻo ai e te tuputupu aʻe faaleagaga po o tau faalogona?

․․․․․

▪ Pe afai e tupu se mea, po o le a ese se mea e te faia i se isi au faigāuō?

․․․․․

Pe afai na e aafia i se faigāuō, ae e leʻi pei o le tulaga na e faamoemoe i ai. Ia manatua le mea lenei: A o agi se matagi, e faigofie ona e uaʻi atu i le faauli mai o le lagi ma le mamafa o timuga. Ae na iʻu lava ina uma le timu ma toe lagi lelei le aso. O talavou na taʻua muamua, a o faagasolo le taimi, sa mafai ona latou manumalo mai na tulaga faigatā. Ia e mautinoa e mafai foʻi ona e faia faapena!

Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ O le ā se mea ua e iloa iā te oe mai lau faigāuō muamua?

▪ O ā mea ua e iloa mai i tagata o le isi itupā?

▪ O ai e mafai ona e talanoa atu i ai i ou faalogona mafatia ona o se faigāuō ua faauma?

[Pusa i le itulau 12]

FAUTUAGA

O Susana lea na taʻua i le amataga, na ia tusia se lisi o mau ma teu lelei, ina ia toe faitau ai i na mau, pe a ia lagona ua tau lē pulea ona faalogona. E mafai foʻi ona e faia lenā mea i nisi o mau o loo taʻua i lenei mataupu.

[Ata i le itulau 11]

O le faaumaina o se faigāuō, ua pei o se lavea e tigā, ae o le a pē a o faagasolo le taimi